VOV4.Xơ Đăng - A rôh hôp tơbleăng tiah hmâ kơxê lơ 12/5, tiâ rơkong kơ-êng dêi khu chêh hlá tơbeăng ‘na kơxô̆ liăn tŏng kum dêi Chin phuh Việt Nam ăm mâu tơdroăng cheăng tŏng kum ƀă kuăn pơlê Ukraina, pôa Đoàn Khắc Việt, kăn phŏ tơpui kâ ăm Khu xiâm tơpui kâ tơnêi têa pin ăm ‘nâi: Việt Nam veăng tơmâng tŏng kum, khéa hơ’nêng ó khât dêi mâu kong têa tung lâp plâi tơnêi ‘na tơdroăng tŏng kum xua mâu tơdroăng ki ôh tá tơniăn a Ukraina, tối tiah kố, kal pơtê tơdrêng hlối tơdroăng ki tơplâ tơplong, rak tơniăn kring vế ăm kuăn pơlê xivil.

Ƀă hiâm mơno mê, pêi pro tiô rơkong krếo thế dêi Khu lâp kong têa, Việt Nam pơkâ kum 500 rơpâu dollars, tung mê ai 100 rơpâu ăm Khu râng liăn xúa tơdrêng CERF, 100 rơpâu dollars ăm Khu tơrŭm ngăn pơkeăng ƀă khăm pơlât lâp plâi tơnêi, 100 rơpâu dollars ăm Khu râng liăn vâi hdrêng UNICEF, ƀă 200 rơpâu dollars ing tơdroăng ki Khu lo tŏng veăng Việt Nam pơtroh ăm Khu lo tŏng veăng Ukraina, veăng kum mơnhông mâu tơdroăng tŏng kum, tŏng kum kuăn pơlê ki tro tơdjâk xua tơplâ tơplong a Ukraina.

Katarina Nga tơplôu ƀă tơbleăng