Hâi lơ 9/3, a Hà Nội, Khu xiâm pơtâng tối tơdroăng kal tiô troăng hyôh um tơvi, rơ’jíu internet rơtế ƀă Khu ngăn tơdroăng Khôp Chin phuh tơrŭm tơkŭm po mơhno Hlá tơbeăng “Tơdroăng loi tĭng tiô khôp ƀă troăng hơlâ ‘na loi tĭng tiô khôp a Việt Nam”. Kố cho kơxop hlá mơ-éa vâ kum mâu ngế ki pơchuât tung tơnêi têa ƀă a kong têa ê ‘nâi nhên ƀă tŭm ‘na troăng hơlâ loi tĭng, tiô khôp, tơdroăng dêi mâu ngế ki loi tĭng tiô khôp a Việt Nam.

Tơpui a rôh pơxiâm mơ’no  hlá “Tơdroăng loi tĭng tiô khôp ƀă troăng hơlâ ‘na loi tĭng tiô khôp a Việt Nam”, pôa Nguyễn Tiến Trọng, kăn phŏ ngăn tơdroăng loi tĭng tiô khôp Chin phuh ăm ‘nâi, kơxop hlá mơéa tơbleăng tối mâu tơdroăng ki xiâm ‘na loi tĭng tiô khôp, troăng hơlâ ‘na loi tĭng tiô khôp, mâu tơdroăng ki rak vế tơniăn hnoăng tơniăn krê ‘na tơdroăng loi tĭng tiô khôp a Việt Nam, xuân môi tơdroăng ki pơloăng mơnúa kal tơkâ luâ ƀă mâu hnoăng cheăng ki kơjo kum vâ mơdêk hnoăng tơniăn krê ‘na loi tĭng ,tiô khôp dêi kuăn pơlê.

Klêi mê,  ai mâu tơdroăng pơkâ ‘na tơdroăng loi tĭng tiô khôp, tơdroăng loi tĭng tiô khôp tung hlá mơ-éa luât pơkâ nôkố; mâu tơdroăng ki tơƀrê, pơloăng mơnúa ƀă kơjo kum dêi Việt Nam tung rak vế hnoăng tơniăn krê xua loi tĭng tiô khôp, tơdroăng khôp. Peăng ki apoăng dêi hlá mơéa tơbleăng mâu um méa ‘na tơdroăng loi tĭng tiô khôp, tơdroăng khôp a Việt Nam.