Rôh hôp tiah hmâ dêi Hô̆i đong Pêi pro tiô Khu râng liăn tŏng kum vâi hdrêng Khu lâp kong têa (UNICEF) po sap ing hâi lơ 7 – 10/2, a Tíu pêi cheăng Khu lâp kong têa a New York. Tơpui a rôh hôp, Kăn teăng mâ cho pôa Đặng Hoàng Giang, Kăn pơkuâ khu kăn teăng mâ Việt Nam a Khu lâp kong têa tối mâu tơdroăng ki klêi kơ’nâi tơƀrê ki Việt Nam pêi pro ƀlêi chiâng tung 1 hơnăm hdrối nah sap ing Khu pơkuâ UNICEF tơbleăng Tơdroăng tơnêi têa dêi Việt Nam khế 2/2022.

Kăn teăng mâ xuân mơnê ƀă mơnhên tối khât tơdroăng tŏng kum tơƀrê, teăm tơdrêng dêi UNICEF ăm Việt Nam, malối cho tŏng kum lối chât rơtuh klŏng vaccine hbrâ mơdât pơreăng kân COVID-19. Pôa Đặng Hoàng Giang vêh tối nhên kô pơtối tơrŭm krá tơniăn ƀă UNICEF vâ mơdêk ƀă rak vế mâu hnoăng ăm vâi hdrêng.