Pôa Vương Đình Huệ, Kăn xiâm hnê ngăn Kuô̆k hô̆i nếo pơkâ Tơdroăng ‘Na tơkŭm xo rơkong tơpui tối dêi Kuăn pơlê ƀă kơxop hlá mơéa Luât tơnêi tơníu ki ‘mâi hơ’lêh. Tung pơla xo rơkong ki veăng tơpui tối dêi Kuăn pơlê ‘na kơxop hlá mơ-éa Luât tơnêi tơníu ki ‘mâi hơ’lêh pơxiâm sap ing hâi lơ 3 khế 1 hơnăm 2023 ƀă mơgêi a hâi lơ 15 khế 3 hơnăm 2023. Tơdroăng pơkâ kố, ki xiâm dêi tơdroăng tơkŭm xo rơkong tơpui tối Kuăn pơlê vâ mơdêk hnoăng pơxúa, mơhnhôk tuăn ngoâ rơkê, khŏm mơ-eăm, mơhno tối hiâm mơno, tơdroăng ki rơhêng vâ dêi Kuăn pơlê vâ chêh bro klêi kơxop hlá mơéa Luât Tơnêi tơníu ki ‘mâi hơ’lêh; bro tơdroăng ki môi tuăn dêi kuăn pơlê ƀă troăng hơlâ dêi Đảng, luât dêi Tơnêi têa ‘na tơnêi tơníu.

Mơdêk ki hlê plĕng, hiâm mơno rơkê ‘na luât, hnoăng cheăng pôu râng dêi mâu ngế krê, kơ koan, khu tơrŭm tung tơdroăng ki chêh bro klêi troăng hơlâ luât tơnêi tơníu, tơtro ƀă tơdroăng mơnhông cheăng kâ kơchơ mơdró tơmiât troh troăng xah hô̆i chuh nghiah. Tơdroăng ki tơkŭm xo rơkong tơpui tối dêi Kuăn plê athế châ pêi pro tơniăn krê, rơkê, tơdrăng, pơxúa rak vế tơdroăng ki mơnhông, rơkê ƀă kơdĭng.