Mâu hâi ki kố, o Vũ Thị Giang, hok tro lâm 8, Hngêi trung râ má péa Lê Quý Đôn, cheăm Ea Bung, kong pơlê Dak Lak, phiu ro hbrâ vâ vêh a hngêi trung. O ăm 'nâi:

“Thái cô ƀă khu râ kăn pơkuâ hngêi trung, rêm râ tơmâng ngăn, mơhnhôk o hên 'nâng 'na kế tơmeăm khoăng ƀă hiâm mơno. Hngêi trung mê ăm mung hlá mơ-éa hriâm, kơdroh liăn hriâm xua rơpŏng hngêi pá puât. Tung hơnăm hriâm lâm 6 o châ hok tro rơkê, lâm 7 mê o châ hok tro rơkê. O vâ mơ-eăm tâ vâ to hok tro rơkê khât”.

Ôh tá xê to tŏng kum ăm mâu hok tro ki ai tơdroăng rêh ối pá puât, mâu cheăm bêng dêi kong pơlê Dak Lak xuân ối tơkŭm 'mâi rơnêu, mơjiâng pro nếo tơmeăm khoăng, rak tơniăn tơdroăng hnê ƀă hriâm. Klêi kơ'nâi séa ngăn hngêi trung hriâm, cheăm Krông Ana hiăng xing xoăng lối 11,3 rơtal liăn ing kơxô̆ liăn vâ pro 16 tơmeăm khoăng ăm hơnăm hriâm kố. Pôa Phan Thanh Việt, Phŏ kăn hnê ngăn Vi ƀan cheăm Krông Ana, ăm 'nâi:

“Ối ai mâu kế tơmeăm dế mơ-eăm vâ pro klêi vâ teăm ăm xúa tung hơnăm hriâm nếo. Rơtế ƀă ‘mêng rêu hngêi trung lâm hriâm, kong pơlê mơ’no mâu troăng hơlâ athế lăm ngăn, keo ko loăng, poê tơkâng loăng vâ rak tơniăn tung rơnó mê hngê khía mơhot”.

Ƀă mâu cheăm tơkăng kong, pơkâ mơ'no ôh tá xê to pêi klêi hngêi trung mê ối athế hmâ ƀă tơdroăng tơkŭm po nếo troăng hơlâ hnê hriâm. A cheăm Ia Lốp, ing 5 to hngêi trung hdrối nah, kong pơlê tơkŭm po nếo 2 to hngêi trung. Tung mê, Hngêi trung Phôh thong ai tíu kâ koi ối pơtê Râ má ƀă râ má péa Ia Lốp châ mơjiâng hâi lơ 20/7 ƀă hiăng pêi klêi tơdroăng rah xo kăn ƀô̆, thái cô ƀă tơdroăng rah xo hok tro. Pôa Bùi Tiến Hoạt, Phŏ kăn hnê ngăn Vi ƀan cheăm Ia Lốp, ăm 'nâi:

“Troh nôkố ƀô̆ khung dêi hngêi trung, cheăng tơkŭm tung dế xuân hiăng tơkŭm pêi pro tŭm, mơjiâng mâu tôh khô̆i ƀô̆ môn, klâ xoăng lâm, mê nếo cheăng rah xo hok tro, pơrá hiăng pêi pro klêi. Nôkố ngin rơtế ƀă Khu pơkuâ ngăn tơdroăng tơkêa ƀă mâu khu ki ‘no liăn pro dế mơ-eăm vâ pro klêi hbrâ mâu kế tơmeăm, pro tiah lâi vâ troh lơ 30 khế 8 pơcháu hngêi trung lâm vâ mot tung hơnăm hriâm nếo”.

Rơtế ƀă mâu tơdroăng ki hơ'lêh 'na hngêi trung lâm hriâm, khu thái cô xuân ối tung tơdroăng ki pơkâ thế tơtro ƀă mâu tơdroăng cheăng ki nếo. Pôa Phạm Thế Trường, Phŏ pơkuâ Hngêi trung râ má péa Ƀuôn Trấp, cheăm Krông Ana, ăm 'nâi:

“Hngêi trung hiăng tơkŭm po ăm thái cô hriâm tơ’nôm xuân môi tiah veăng hriâm tung mâu lâm hriâm tơdroăng cheăng dêi tơná dêi Khu ngăn hnê hriâm ƀă hnê mơjiâng ƀă Khu xiâm ngăn hnê hriâm ƀă hnê mơjiâng tuăn ngoâ rơkê. Malối, hngêi trung mơhnhôk mâu thái cô veăng hriâm a mâu lâm hriâm ‘na pơhlêh xúa internet xuân môi tiah hriâm mâu tơdroăng ki hnê hriâm nếo nôkố”.

Tơdroăng ki hbrâ tŭm sap ing kế tơmeăm khoăng, mơngế cheăng troh troăng hơlâ tŏng kum dế pro tơdroăng ăm ivá hơnăm hriâm nếo a Dak Lak pơxiâm tung tơdroăng ki hbrâ rơnáu, tơniăn ƀă hbrâ rơnáu, vâ hok tro a tá kơpong ki tơ'lêi hlâu ƀă kơpong ki xơpá ai tơ'nôm tơdroăng ki hriâm tâp, pơtâp ƀă mơnhông.