Kố cho môi tơdroăng ki kal tung pơkâ pêi pro Tơdroăng tơkêa bro 214 ‘na ‘nhê tah hngêi pơtân, hngêi xiê kơchoh ki kong pơlê Dak Lak dế pêi pro. Hâi lơ 1/3 la ngiâ, kong pơlê Dak Lak kô păng ‘nâng pơxiâm mơjiâng pro lối 4 rơpâu toăng hngêi nếo ăm mâu rơpŏng kơtiê, rơpŏng vâ chê kơtiê tung kong pơlê.

Tâi tâng kơxô̆ liăn tiô tối hdrối ăm tơdroăng ‘nhê tah hngêi pơtân, hngêi xi kơchoh pro ăm hngêi nếo cho lối 342 rơtal liăn. Nôkố mâu tíu cheăng, tơring tung kong pơlê Dak Lak hiăng mơhnhôk châ tâi tâng kơxô̆ liăn lối 193 rơtal liăn vâ pêi pro tơdroăng. Kong pơlê Dak Lak dế mơ-eăm rĕng kêi đeăng tơdroăng ‘nhê tah hngêi pơtân, hngêi xi kơchoh pro ăm hngêi nếo tung kong pơlê, kum mâu rơpŏng pá puât tơniăn tơdroăng rêh ối.