Kong pơlê Dak Lak nôkố ai dâng 13,5% pơ’leăng mâ mơngế. Tơdroăng châ pơkâ mơ’no cho vâ gum ăm mâu ngế sap ing 60 troh pá xôp 75 hơnăm ai tơdroăng rêh ối xơpá, tá hâi châ xúa troăng hơlâ tŏng gum ăm Baoh hiêm khăm pơlât, tơdrêng amê hlối veăng gum mơdêk kơxô̆ ngế châ roê ƀaoh hiêm khăm pơlât dêi kong pơlê.

Pôa Trần Mạnh Toàn, Kăn pơkuâ Ƀaoh hiêm xah hô̆i kong pơlê Dak Lak tối tiah kố, tơdroăng ki kal má môi cho Pơkâ nếo kô gum ăm dâng tơdroăng rêh ối pơlê pơla ƀă mâu ngế hơnăm hiăng krâ:

“Tơdroăng mơhnhôk mâu ngế hơnăm hiăng krâ a kong pơlê Dak Lak nâp xêh Ƀaoh hiêm khăm pơlât gá xơpá khât. Mâu ngế sap ing 60 troh 75 hơnăm mê tá hâi châ xúa troăng hơlâ tŏng gum klâi ‘na ƀaoh hiêm khăm pơlât cho ôh tá gum ‘na tơdroăng rêh ối pơlê pơla. Pơkâ kố kô rak tơniăn ăm tâi tâng ƀaoh hiêm khăm pơlât ăm mâu ngế hơnăm hiăng krâ”.

‘Na kơxô̆ liăn, Dak Lak hiăng hbrâ hdrối 38 rơtal liăn vâ pêi pro troăng hơlâ tŏng gum tung 4 khế mơ’nui hơnăm 2026. Sap ing hơnăm 2026, kơxô̆ liăn ‘no hrê kố kô châ riân tung liăn ngân dêi cheăm, bêng. Mâu kơvâ cheăng, kong pơlê chiâng pâ thế đi đo tối tơbleăng tơdroăng kal vâ mơnhên nhên mâu ngế ki châ pơxúa, ví pôi tá bô bối ƀă mâu troăng hơlâ tŏng gum ki ê.

Pôa Lương Nguyễn Minh Triết, Kăn pơkuâ hnê ngăn Đảng kong pơlê Dak Lak tối nhên, maluâ kong pơlê ối xơpá, la tơdroăng ki ‘măn kơdĭng liăn ngân vâ tŏng gum ăm pơlê pơla xuân ối kal châ kơjo gum:

“Tung tơdroăng ki xơpá kố dêi kong pơlê mê xuân athế ‘măn kơdĭng hên liăn ngân vâ tŏng gum rêh ối pơlê pơla. Pơcháu ăm Vi ƀan tí tăng ‘nâi plĕng tơdroăng cheăng ki lâi ƀă pơcháu ăm mâu Khu cheăng dêi Hô̆i đong hnê ngăn kuăn pơlê séa ngăn vâ tơbleăng a hneăng hôp dêi Hô̆i đong hnê ngăn kuăn pơlê la ngiâ”.