Dak Lak nôkố ai 81 to cheăm kơpong hdrông kuăn ngo ƀă kong ngo, ƀă lối 828.000  kuăn pơlê hdrông kuăn ngo. Klêi kơ’nâi Luât Tơnêi tơníu 2024 xêt khât, kong pơlê hiăng tŏng gum tơnêi ối ăm 238 rơpŏng, tŏng gum tơnêi pêi kâ lơ pơhlêh tơdroăng cheăng pêi ăm lối 1.300 rơpŏng. Tíu hnê hriâm, khăm pơlât kơpong hdrông kuăn ngo pơtối châ rak vế, tâi tâng cheăm ai hngêi pơkeăng cheăm, vâ chê 97% hngêi pơkeăng ai ƀok thái pơkeăng, châ 9 ngế tung môi rơpâu ngế.

Laga, kong pơlê xuân ối trâm hên xơpá. Tơnêi vâ xoăng ăm kuăn pơlê hdrông kuăn ngo rế hía rế iâ, cheăng klâ xoăng tơnêi ai xiâm kối sap ing pêi chiâk, pêt kong ối tơvâ túa pơkâ. Hên Hngêi trung phôh thong hdrông kuăn ngo ai tíu kâ koi ối pơtê ôh tá ai kĭ tuk xă, hngêi pơchên hmê, lâm hriâm ki tơdjâk; tơdroăng ki ‘no liăn ăm tơdroăng pơkâ pêi dêi tơnêi têa ối hrá, tung pơla 3 to hngêi trung hdrông kuăn ngo ai tíu kâ koi ối pơtê kơpong tơkăng kong xuân ối kal 194 rơtal liăn vâ pro klêi. ‘Na kơvâ khăm pơlât, hên kơpong hngế hngo, kơpong xơpá xuân ối kal ƀok thái pơkeăng chuyên khoa, kế tơmeăm xúa ƀă kế tơmeăm kih thuât.

Ki khât gá, kong pơlê pâ thế Kuô̆k hô̆i ƀă Vi ƀan pơkuâ Kuô̆k hô̆i rĕng ‘mâi rơnêu, chêh pro klêi mâu pơkâ ‘na tơnêi tŏng gum hdrông kuăn ngo; hnê mơhno nhên tơdroăng ki pêi pro Troăng 16 Luât Tơnêi tơníu 2024. Tơdrêng amê hlối pơkâ thế Chin phuh ƀă mâu khu xiâm kơvâ cheăng kơjo gum xing xoăng kơxô̆ liăn ăm Tơdroăng pơkâ pêi dêi tơnêi têa pơla hơnăm 2026 – 2030; ‘mot tơ’nôm liăn pêi cheăng ăm kơvâ cheăng hnê hriâm, khăm pơlât ƀă ai troăng hơlâ tơ’mot thái cô, ƀok thái pơkeăng pêi cheăng ton a kơpong xơpá.

Pôa Nguyễn Thiên Văn, Phŏ kăn hnê ngăn Vi ƀan hnê ngăn kong pơlê Dak lak tối tiah kố, kal rĕng séa ngăn, pơcháu tơnêi ai xiâm kối sap ing mâu kŏng ti pêi chiâk, pêt kong xúa ôh tá tơƀrê ‘na kong pơlê vâ pêi pro troăng hơlâ tŏng gum tơnêi ối, tơnêi pêi kâ ăm kuăn pơlê hdrông kuăn ngo.

“A kong pơlê ai 19 to kŏng ti ối tung râ Xiâm pơkuâ, ai tơnêi dâng 20.000 ha, la rêm hơnăm bu nâp ăm tơnêi têa dâng 20 troh 25 rơtal liăn. Tung pơla mê tơdroăng kal vâ tơnêi ối, tơnêi pêi kâ ăm kuăn pơlê hdrông kuăn ngo dế kal châ tơmâng ngăn khât. Mê hnoăng cheăng séa ngăn, mơnhên tối mê cho pơcháu ăm kong pơlê pơkuâ ngăn, péa cho mâu tơdroăng ki mê Khu xiâm athế lăm pêi, ai mơgêi ƀă pơcháu ăm kong pơlê vâ ngin pêi pro mâu troăng hơlâ tŏng gum tơnêi ăm vâi krâ kuăn pơlê hdrông kuăn ngo”.

A rôh pêi cheăng, jâ Trần Thị Hoa Ry, Phŏ kăn hnê ngăn Hô̆i đing Hdrông kuăn ngo dêi Kuô̆k hô̆i tơmâng xo mâu rơkong tơpui tối pâ thế dêi kong pơlê. Jâ xuân mơnhên tối khât klêi kơ’nâi pêi pro troăng hơlâ tŏng kuăn pơlê hdrông kuăn ngo dêi Dak Lak. Jâ pơkâ thế kong pơlê pơtối séa ngăn tro mơngế ki pơxúa tŏng gum, thăm mơnhông tơrŭm pơla mâu kơvâ cheăng, mơdêk tơdroăng ki hnê tối troăng hơlâ tŏng gum ƀă tơmâng ngăn ‘no liăn cheăng roê mâu kế tơmeăm ăm tíu cheăng khăm pơlât a cheăm bêng.

“Séa ngăn ki tơdjâk troh mâu ngế pêi cheăng xuân môi tiah tơdroăng pơkâ ki xing xoăng kơlo ‘na troăng hơlâ tŏng gum ăm mâu kơvâ cheăng hnê hriâm ƀă khăm pơlât vâ tơbleăng pêi pro tung la ngiâ. ‘Nâi tiah kố Dak lak kô châ pơxúa sap ing hên troăng hơlâ ki ai tơdjâk troh mâu tơdroăng pơkâ pêi dêi tơnêi têa dêi hdrông kuăn ngo ‘na mâu kế tơmeăm xúa tung khăm pơlât ăm tâi tâng kuăn pơlê, drêng pin pêi pro tơdroăng khăm ivá ăm tâi tâng kuăn pơlê mê nôkố hên tíu tá hâi pêi pro châ tơdroăng ki mê”.