Tung 6 khế apoăng hơnăm kố, rêm râ, kơvâ cheăng ƀă kong pơlê  cheăm bêng giăng mơhnhôk hên khu râ, tơbleăng hên troăng lăm tăng vâ pêi tơbrê tơdroămg Lăm tăng. Tung lâp kong pơlê hiăng tơdah xo ƀă mơnhên 500 tíu tối ‘na mơngế hlâ ai hnoăng, tơnâp ‘mé mơngế hlâ ai hnoăng.

Krê to a kơpong troăng Trường Chinh, cho dêi bêng Đăk Cấm ƀă Kon Tum, mâu khu râ pơkuâ cheăng hiăng tăng ngăn, nôkố dế chiâ tăng ƀă hiăng châ tơkŭm 3 kơxêng kiâ mơngế hlâ ai hnoăng. Kong pơlê pơtối pê klêi lơ gât lăm tăng, mơdêk mơnhên xiâm, tơkŭm tơmâng tăng ngăn, chiâng rôu a mâu kơpong ki tối ai, veăng rĕng ‘nâi inâi hơnăm ngế ki hâi teăm ‘nâi mê. Kong pơlê Quảng Ngãi mơ eăm pê klêi tâi tâng tơdroăng cheăng tăng, chiâ xo ăm mơnhên ngăn túa tung khế 10/2026.

- Kong pơlê Dak Lak pơkâ pêi klêi tơdroăng ki xo túa vâ séa ngăn ADN ƀă mâu kơxêng kiâ mố đô̆i ki tá hâi ‘nâi inâi hdrối hâi lơ 31/10 la ngiâ. Tung lâp kong pơlê nôkố ai 34 to ilâng kiâ mố đô̆i ƀă 15.222 to tơnâp kiâ, tung mê 4.124 tơnâp kiâ tá hâi ‘nâi inâi ƀă 1.784 to tơnâp bu ai iâ tê mâu tơdroăng ki kal vâ ‘nâi.

Troh nôkố, khu ki ai tơdjâk hiăng tơbleăng xo túa a 5 to ilâng kiâ mố đô̆i, châ xo 105 túa ai tŭm tơdroăng vâ séa ngăn ADN. Ƀă hnoăng cheăng tí tăng, tơkŭm kơxêng kiâ mố đô̆i, rơnó tôu pơla hdrối nah, Đô̆i K51 Khu pơkuâ ngăn lêng kong pơlê Dak Lak hiăng tơkŭm châ 27 to kơxêng kiâ mố đô̆i a Kul. Klêi kơ’nâi vêh dêi a tơnêi têa, tíu pêi cheăng pơtối lăm tăng ing 12 tơdroăng tối tơbleăng ƀă tơkŭm tơ’nôm 4 to kơxêng kiâ mố đô̆i a mâu cheăm Krông Bông ƀă Tây Sơn.