Tiô mâu kăn tối, vâ pêi châ tơƀrê kơlo tâk lối 10% tung lâp tơnêi têa sap ing kơlo 7,84% nôkố, Vi ƀan hnê ngăn kong pơlê Dak Lak kal rĕng chêh pro hlá mơ-éa, mơnhên nhên mâu tơdroăng tơkêa bro ivá, kơxô̆ liăn kô châ ‘no hrê ƀă mâu troăng hơlâ pro chiâng tơdroăng ki mơnhông. Pôa Lê Văn Cường, Ngế xiâm ngăn Túa lĕm tro – Pơlê pơla dêi Hô̆i đong hnê ngăn kong pơlê Dak Lak pâ thế:

"Á pâ thế Vi ƀan hnê ngăn kong pơlê athế mơhno nhên mâu tơdroăng cho 6 khế mơ’nui hơnăm kô ai mâu kế tơmeăm pro ki lâi, tơdroăng tơkêa bro ki lâi, liăn ngân ‘no hrê ăm tơdroăng ki lâi vâ rak tơniăn châ tâk mơnhông plâ hơnăm sap ing 10,02% tơngi klêng”.

Tơpui tối leăng mâu tơdroăng ki ối kreăng ‘na thăm mơnhông, mâu kăn Hô̆i đong hnê ngăn kong pơlê Dak Lak tối tiah kố tá tung kơvâ tơnêi tơníu, hlá mơ-éa chêh pro, pơrá ai hên tơdroăng kal ‘mâi pơhlêh. Jâ Bùi Thị Hà Giang, Kăn pơkuâ hnê ngăn Đảng ủi, Kăn hnê ngăn Hô̆i đong cheăm Ea Drăng, kong pơlê Dak lak tối ki ai khât a kong pơlê.

“Tơdroăng ki hâk vâ dêi kuăn pơlê ƀă khu mơdró kâ tung cheăng pêi pro hlá mơ-éa cho tá hâi tro. Má péa, cho hnoăng cheăng pơkuâ ngăn tơnêi têa ‘na tơnêi tơníu, hbru ăm hlá mơ-éa mơnhên hnoăng rak xúa tơnêi xuân môi tiah mâu túa pơkâ xúa tơnêi ai xiâm rêi sap ing pêi chiâk, pêt kong dế trâm hên tíu kreăng ki pin kô pá vâ pêi dêi hnoăng cheăng cho mơnhông cheăng kâ dêi cheăm ngin tối krê, dêi kong pơlê tối tơdjuôm”.

Hneăng hôp dêi Hô̆i đong hnê ngăn kong pơlê Dak Lak châ pêi pro klêi kơ’nâi kong pơlê tơbleăng Túa pơkâ ƀă tơkŭm po ƀlêi chiâng Rôh hôp pơkâ mơdêk ‘no liăn cheăng. 25 tơdroăng tơkêa bro, tâi tâng kơxô̆ liăn ‘no lối 40.200 rơtal liăn hiăng châ hbrâ ăm hlá mơ-éa mơnhên ‘no liăn cheăng. Mâu tơdroăng tơkêa bro ‘no liăn cheăng tơdjuôm dế châ tơbleăng a Dak Lak xuân ai túa pơkâ pêi kân. Laga, tiô pôa Huỳnh Gia Hoàng, Phŏ pơkuâ Khu rak liăn ngân kong pơlê Dak Lak, vâ veăng gum pêi pro ai pơxúa ăm thăm mơnhông, tá khu pơkuâ tơdroăng kal kí kal veăng pêi pro kơtăng tâ, ‘mâi mơnhông tơdroăng ki ối ‘ro ‘na troăng hơlâ xo tơnêi ƀă ‘no liăn pêi cheăng.

“Vâ ‘no liăn ngân pêi cheăng tơdjuôm, athế mơnhên nhên kố cho hnoăng cheăng tơdjuôm dêi tá khu pơkuâ tơdroăng kal kí. Malối cho tơkŭm tung mâu tơdroăng ki xo tơnêi pro tơdroăng tơkêa. Tá hâi ai hơnăm ki lâi ki kơxô̆ liăn ‘măn ăm tơdroăng ‘no liăn cheăng tơdjuôm gá hên môi tiah mê. Xua mê cho khu râ Đảng, kăn pơkuâ kong pơlê, malối cho kăn pơkuâ râ cheăm bêng, athế mơnhên nhên kố cho hnoăng cheăng ki kal vâ pêi pro tung plâ hneăng pêi cheăng”.

Mâu kăn hiăng môi tuăn tối Dak Lak dế ai hên rôh tơ’lêi hlâu vâ mơnhông drêng tơnêi tơníu châ po rơdâ, túa pơkâ hiăng châ tơbleăng ƀă tơdroăng tơmâng ngăn dêi mâu khu ‘no liăn cheăng rế hía rế hên. Laga, rôh tơ’lêi hlâu bu chiâng ivá thăm mơnhông drêng mâu tíu kreăng ‘na ‘no liăn cheăng tơdjuôm, tơnêi tơníu, túa pơkâ, hlá mơ-éa chêh pro ƀă troăng hơlâ pêi pro châ teăm tŏng gum tung mâu khế mơ’nui hơnăm.