Hô̆i đong hnê ngăn kong pơlê Dak Lak hiăng pơkâ tơdroăng kơxô̆ 19 ‘na troăng hơlâ tŏng gum tơ’nôm ăm hok tro ƀă hngêi trung phôh thong ai tíu kâ koi ối pơtê a mâu cheăm tơkăng kong ƀă tơkoh tíu tơkăng kong. Tiô Pơkâ, hok tro kâ koi ối pơtê la nôu pâ vâi chĕm mơ’rêh dêi châ gum 110.000 liăn môi ngế tung môi khế liăn kâ kơhâi dế, hok tro kâ koi ối pơtê châ tơnêi têa gum châ gum ăm 300.000 liăn môi ngế môi khế.

Hok tro hriâm ối hngế ing hngêi trung châ gum kơxô̆ liăn prôk lăm. Ƀă hok tro râ má môi, kơlo liăn gum cho 120.000 liăn rêm khế tâng kơtăn ing hngêi ối troh hngêi trung sap ing 4km troh pá xôp 15km, kơlo gum cho 240.000 liăn tâng sap ing 15 km ngi klêng. Hok tro Râ má péa châ xúa kơlo gum môi tiah mê há tâng kơtăn ing hngêi ối ối sap ing 7 km troh pá xôp 15km ƀă ing 15km ngi klêng. Hâi khế tŏng gum ôh tá luâ 9 khế tung hơnăm hriâm.

Hơnăm hriâm kố, hok tro, sinh viên tung kong pơlê Dak Lak châ liăn ngân tơnêi têa tŏng kum 55% kơlo nâp ƀaoh hiêm khăm pơlât, tơ'mô 751.410 liăn rêm ngế/hơnăm. Dak Lak xuân tiô tối hdrối xing xoăng dâng 41 rơtal liăn rôe kơxop mơ-éa hriâm vâ mâu hngêi trung tơkŭm ăm hok tro mung.

Rơtế ƀă tŏng kum tơdrêng, Dak Lak tơkŭm 'no liăn mơjiâng tơmeăm khoăng, malối cho a mâu kơpong ki ối xơpá. Hơnăm hriâm 2026-2027, Dak Lak ai tơ'nôm 3 to hngêi trung phôh thong ai tíu kâ koi ối pơtê tơdjêp râ mơhrriâm má môi ƀă má peá, a mâu cheăm tơkăng kong ƀă 1 to hngêi trung ai tíu kâ koi ối pơtê tơdjêp râ a cheăm tơkăng kong Ea Rôk. Mâu hngêi trung châ 'no liăn mơjiâng pro tơdâng tơ'mô, vâ pro tíu hriâm tâp, rêh ối tơ'lêi hlâu tâ ăm dâng 3.100 ngế hok tro kơpong tơkăng kong ƀă achê tơkăng kong.

Jâ Lê Thị Thanh Xuân, Kăn pơkuâ Khu pơkuâ hnê hriâm ƀă hnê mơjiâng tuăn ngôa rơkê Dak Lak, ăm 'nâi, kơvâ cheăng pơtối tơkŭm mơhnhôk mâu kơxô̆ liăn ing kơxô̆ liăn ton hơnăm ƀă kơxô̆ liăn ing mâu Tơdroăng pơkâ dêi tơnêi têa ăm hnê hriâm vâ 'no liăn, pro klêi hngêi trung hriâm.

Băng: "Ki ahdrối, pơkâ thế mâu cheăm bêng xing xoăng tŭm kơxô̆ liăn pêi cheăng tiah hmâ ăm tơdroăng hnê hriâm. Tung pơla mâu kơxô̆ liăn kố, kơvâ xuân hnê mơhno mâu hngêi trung xúa châ tơƀrê kơxô̆ liăn vâ 'no liăn, 'mâi rơnêu kế tơmeăm khoăng ƀă tơmeăm xúa. Ing mê, rak tơniăn tŭm tơdroăng hnê ƀă hriâm ăm hơnăm hriâm nếo, rế hía rế mơdêk ki dâi lĕm ƀă tơxâng pơkâ hnoăng cheăng tung hneăng nôkố”.