Lâp kong pơlê Dak Nông nôkố u ối lối 6.000 rơpŏng dế rêh ối tung mâu toăng hngêi ki pơtân, hngêi xi kơchoh. Tung kơxô̆ mê ai dâng 1.700 rơpŏng chiâng tơdah hngêi ối ing mâu tơdroăng pơkâ xiâm dêi tơnêi têa, troăng hơlâ dêi Tơnêi.

Pêi pro Tơdroăng mơhnhôk tah lôi hngêi pơtân, hngêi xi kơchoh dêi Ngế pro xiâm hnê ngăn Chin phuh, kong pơlê Dak Nông ai 540 rơpŏng châ tŏng gum, ƀă tâi tâng kơxô̆ liăn lối 40 rơtal liăn.

Khu kăn pơkuâ hnê ngăn Đảng, Vi ƀan kong pơlê Dak Nông hiăng thâ pêi pro tơdroăng séa ngăn, chêh inâi ƀă kĭ ăm mâu rơpŏng châ tơdah tŏng gum, tơdrêng amê pơcháu mâu khu râ, kơvâ cheăng, kong pơlê pêi kêi đeăng mâu hlá mơ-éa vâ mơjiâng hngêi ăm mâu rơpŏng kuăn pơlê. Ki vâ hrá má môi troh a mơ’nui khế 2/2025, kong pơlê Dak Nông kô pơxiâm mơjiâng pro nếo 113 toăng hngêi, châ dâng 21% kơxô̆ châ kĭ ăm phep.

Kong pơlê Dak Nông khŏm mơ-eăm, troh hdrối khế 9/2025 kô pêi kêi đeăng 540 toăng hngêi, mê cho rêm hâi kong pơlê kô tah lôi dâng 2 toăng hngêi pơtân, hngêi xi kơchoh.