Tung dế rơnó mêi khế 7/2025, rơpŏng ngoh Rơmah Huệ, ối a pơlê Dêr Sơ, cheăm Ia Me, kong pơlê Gia Lai, phiu ro tơdah toăng hngêi nếo xua Kŏng ti pêi cheăng tiô rơnó môi khu Bình Dương (ối tung Ƀinh đoân 15) mơjiâng diâp ăm. Toăng hngêi kân rơdâ dâng 50 met karê, mê cho môi kơbong koi, môi kơbong tơdah tơmối ƀă kơpong hơpiâp krê a pakong.

Rơtế ƀă rơpŏng ngoh Rơmah Huệ, a pơlê Dêr Sơ xuân ai tơ’nôm 16 rơpŏng kuăn pơlê ki ê châ tŏng gum têa tah hngêi pơtân, hngêi xi kơchoh. Ƀinh đoân 15 hiăng tŏng gum tâi tâng kơxô̆ liăn mơjiâng ăm 10 toăng hngêi a pơlê kố. Ngoh Rơ Mah Huệ tối tơdroăng ki hơniâp ro:

‘’Á mơnê nhŏng o đoân viên droh rơtăm kŏng ti 55 hiăng pro hngêi ăm rơpŏng á. Hdrối nah hngêi xi kơchoh, nôkố hiăng ai hngêi nếo. Ai peăng kŏng tŏng gum pro hngêi hmiân tuăn, ôh tá tô tuăn, bu tơkŭm pêi kâ ƀă pro kŏng nhân lĕm tro, tơniăn tơdroăng rêh ối’’.

Thươ̆ng tă Lê Đức Toàn – Kăn pơkuâ hnê ngăn Đảng ŭy, Phŏ Kăn pơkuâ Kŏng ti pêi cheăng tiô rơnó Môi khu Bình Dương (Binh đoân 15) tối ăm ‘nâi, tíu pêi cheăng hiăng kêi đeăng ƀă pơcháu 68 toăng hngêi. Tung pơla kố nah, kŏng ti hiăng mơhnhôk rơpâu hâi pêi cheăng dêi kăn ƀô̆, kŏng nhân viên ƀă mơngế pêi cheăng a pơlê. Mâu rơpŏng châ tŏng gum ki hên cho kŏng nhân dế pêi cheăng a mâu khu mơjiâng tơmeăm, ai tơdroăng rêh ối pá puât.

Rơtế ƀă Kŏng ti Bình Dương, tung hơnăm 2025, Ƀinh đoân 15 hiăng tơkŭm ivá pêi pro tơdroăng têa tah hngêi pơtân tung kơpong rơdâ. Tâi tâng ai 357 toăng hngêi hiăng châ mơjiâng nếo ƀă rơnêu, pơcháu hdrối hâi lơ 14/7, ƀă tâi tâng kơxô̆ liăn vâ chê 17 rơtal liăn. Kơnôm mê, hrĭng rơpŏng kuăn pơlê cho kŏng nhân kơtiê, rơpŏng ai hnoăng tơnêi têa ƀă kuăn pơlê hdroâng kuăn ngo drô troăng tơkăng kong Gia Lai hiăng ai toăng hngêi krá kâk. Thươ̆ng tă Lê Đức Toàn tối ăm ‘nâi.

‘’Khu kŏng nhân, ngế meăn pro a pơlê cho ôh tá ai hên. Yă tơmeăm pro hngêi to kơnâ, ai drêng, mâu tơmeăm pro hngêi tâk troh 230% tâng pơchông ƀă yă apoăng. Vâ mâu toăng hngêi châ mơjiâng krá kâk, tơniăn djâ xúa ton xŏn, ngin hiăng tơrŭm ƀă khu râ kăn pơkuâ hnê ngăn cheăng Đảng, khu râ kăn pơkuâ pêi cheăng ƀă mâu tíu pêi cheăng pơtroh ăm tơmeăm mơjiâng pro hngêi tơdâng tơ’mô kơxô̆ liăn, tơniăn ki dâi lĕm tơmeăm tơtro ƀă troăng hơlâ dêi Chin phuh’’.

Rơtế ƀă Ƀinh đoân 15 (Khu xiâm pơkuâ lêng), khu mô đô̆i Gâk tơkăng kong dêi kong pơlê Gia Lai xuân thăm veăng mơ’no ivá tung tơdroăng têa tah hngêi pơtân, hngêi xi kơchoh a tơkăng kong. Bu kơ’nâi cho môi khế sap ing Khu xiâm pơkuâ mô đô̆i mơhnhôk tơdroăng tơ’noăng, troh hâi lơ 15/4, Mô đô̆i Gâk tơkăng kong kong pơlê hiăng kêi đeăng ƀă pơcháu 10 toăng hngêi krá kâk ƀă tâi tâng kơxô̆ liăn kơnâ lối 800 rơtuh liăn, kơxô̆ liăn châ mơhnhôk ing tơdroăng veăng tơlo môi hâi liăn khế dêi kăn ƀô̆, mô đô̆i ƀă tơdroăng  tơdjuôm ivá dêi mâu ngế ki tŏng gum mơngế pá puât, khu pú hên, ngế krê ai hiâm mơno lĕm tŏng gum ngế pá puât.

Ôh tá pơtê a mê, khu mô đô̆i gâk tơkăng kong pơtối rơtế khu râ kăn pơkuâ tơdroăng cheăng Đảng, khu râ kăn pơkuâ pơlê cheăm, veăng rơpâu hâi pêi cheăng tŏng gum mơjiâng 258 toăng hngêi drô lối 20 km tơkăng kong tơkăng kong têa Kul. Đăi tă Trần Tiến Hải, Phŏ pơkuâ Khu xiâm pơkuâ lêng kong pơlê pro Kăn pơkuâ Khu hnê mơhno Mô đô̆i gâk tơkăng kong dêi kong pơlê Gia Lai tối ăm ‘nâi. tíu pêi cheăng mơnhên kố ôh tá xê cheăng pêi tiô tơdroăng cheăng pơlê pơla mê cho hnoăng cheăng đi đo. Xua kum kuăn pơlê mơjiâng pro hngêi, ôh tá xê to kum vâi ai tíu ối krá kâk, hmiân tuăn pêi cheăng, mê ối kum mơdêk tơdroăng tơrŭm môi tuăn khu lêng – kuăn pơlê, rơtế dêi pó rak krá hnoăng pơkuâ, gâk kring tơkăng kong.

‘’Tung mâu hơnăm hiăng hluâ, ngin tơtrŏng tơdroăng kum kuăn pơlê mơjiâng hngêi trăng. Xua mê ngin kơbông krếo tâi tâng mâu ngế tŏng gum mơngế pá puât, tơdroăng veăng gum dêi mâu ngế krê, khu pú hên, kăn ƀô̆ mâu mô đô̆i. Xua kố cho hnoăng cheăng ƀă kuăn pơlê kơpong tơkăng kong, tơbâ tơdroăng tuăn pâ, tơdroăng tơmâng tŏng gum dêi kuăn pơlê kơpong tơkăng kong ƀă khu mô đô̆i gâk tơkăng kong’’.

Ƀă tơdroăng ki tá hiâm mơno ƀă pôu râng hnoăng cheăng, mâu tíu cheăng khu lêng hiăng veăng kum tơmeăm, tơdjuôm ivá, diâp ăm kuăn pơlê tơkăng kong Gia Lai mâu toăng hngêi krá kâk, tơdrêng amê veăng kum tơniăn tơdroăng rêh ối, mơdêk tơdroăng kum rêh ối pơlê pơla ƀă mơjiâng xiâm kối vâ kuăn pơlê hmiân tuăn mơnhông cheăng kâ, mơ-eăm hluăn ing kơtiê.