Tiô riân ngăn, kong pơlê Dak Lak nôkố ai 34.434 rơpŏng kơtiê ƀă 27.651 rơpŏng vâ chê kơtiê. Tung kơxô̆ ki mê, ai vâ chê 5.400 rơpŏng kơtiê ƀă vâ chê kơtiê xuân dế rêh ối tung hngêi pơtân, hngêi xi kơchoh. Tiô tơdroăng tơkêa bro, kong pơlê Dak Lak kô veăng kum mâu rơpŏng ki mê pro hngêi ối ƀă kơxô̆ liăn tâk troh 342,8 rơtal liăn. Tung mê, 257 rơtal liăn kô châ ăm ing tơdroăng tŏng gum xut tah hngêi pơtân dêi Tíu xiâm tơnêi têa ƀă 85,7 rơtal liăn xo ing liăn ngân kong pơlê.

Tung pơla tơbleăng pêi tơdroăng mê pơxiâm ing nôkố ta troh tâi khế 10/2025, ƀă pơkâ pê klêi mơjiang ƀă pơcháu hngêi ăm kuăn pơlê tro tiô pơkâ, malối a rôh hôp Đảng bô̆ rêm râ. Tơdroăng mơjiâng pro hngêi kô châ séa ngăn nhên, tơniăn, tơdrăng ƀă ôh tá ăm ai tơdroăng mơ’nhiê liăn tê kơtê lơ châ kâ kơhveăm.