Hbrâ chôu phut pơtê a kơhâi dế, Trung tă Y Dhăm Ƀyă, Phŏ kăn Kŏng an cheăm Quảng Phú, kong pơlê Dak Lak vê rơxế honđa mot a ƀuôn Ea Mắp. Ngoh tăng troh krâ pơlê cho pôa Y Lưng Êban, ngế ki kuăn pơlê loi tơngah ƀă xuân cho Tôh trương Tôh kring vế - gak ngăn tơniăn dêi pơlê, vâ tơpui tơno tơdroăng cheăng, ‘nâi tơdroăng gâk kring hdrối hneăng pơtê leh Hâi mơjiâng tơnêi têa.

Lối môi hơnăm hiăng hluâ, mâu rôh trâm mâ môi tiah mê tơkŭm po đi đo. Ôh tá tơkôm troh mâu rôh ki hên tơdroăng cheăng, Trung tă Y Dhăm ƀă pôa Y Lưng krâ pơlê rak tơpui tơno tơdroăng vâ teăm ‘nâi tơdroăng ki nếo tung pơlê. Pôa Y Lưng, krâ pơlê tối:

“Ngoh Y Dhăm tơrŭm ƀă pơlê, ki rơhêng vâ tối sap ing klêi tơmot chiâng môi ƀă pêi pro khu râ kăn pơkuâ 2 râ. Ngoh đi đo mot a pơlê ‘nâi tơdroăng, ki má lối cho tíu khu dêi kuăn khôp, tơmâng tơdroăng pêi cheăng dêi khu hôm tro luât lơ ôh. Drêng ngoh lăm séa ngăn môi tiah mê, mê á xuân prôk rơtế ƀă, tơrŭm tiâ tối ƀă pơchân tối kuăn pơlê’’.

Ing mâu rôh trâm mâ ƀă krâ pơlê, tối ‘na tơdroăng rêh ối, tuăn ihiâm mơno dêi kuăn pơlê châ pơtroh khu cheăng kŏng an cheăm. Drêng ai tơdroăng ki nếo, ngế ki kuăn pơlê loi tơngah rơtế ƀă khu râ kăn pơkuâ ƀă kŏng an a cheăm tơdrêng trâm mâ, tiâ tối, mơhnhôk, ôh tá lôi ai tơdroăng pá puât ton xŏn.

Túa pêi kố hiăng châ tơ-ƀrê a ƀuôn Ea Mắp tung tơdroăng tơleăng tơdroăng tơdjâk troh tơdroăng loi tĭng tiô khôp. Kơtăn kố dâng 7 hơnăm, mâu rơpŏng kuăn pơlê veăng tơdroăng loi tĭng tiô khôp tá hâi tro tiô pơkâ. Kŏng an cheăm Quảng Phú tơrŭm ƀă khu râ kăn pơkuâ hnê ngăn cheăng Đảng, khu râ kăn pơkuâ, krâ pơlê ƀă mơngế ki châ kuăn pơlê loi nhuô̆m trâm mâ, hnê tối, hnê mơhno vâ kuăn pơlê hlê ƀă pêi pro tro tiô pơkâ luât. Lối 200 ngế klêi mê vêh tơkŭm po tơdroăng loi tĭng tiô khôp tro tiô pơkâ.

Ƀok Tin Lành inâi cho Y Nuer Bdap, Kăn pơkuâ Hngêi khôp Lutheran ƀuôn Ea Mắp tối ăm 'nâi, khu kăn pơkuâ ƀă khu kŏng an đi đo tơpui tơno, hnê mơhno vâ mâu tơdroăng pêi pro tro tiô pơkâ. Nôkố, túa pơkâ "Tơdroăng loi tĭng - pơlê hơniâp lĕm" dế châ tơbleăng tung pơlê, tơmiât troh mơjiâng pơlê pơla loi tĭng, tiô khôp tơrŭm, rêh ối lĕm tro, pêi pro tro luât ƀă veăng rak tơniăn pơlê pơla.

“Kuăn pơlê tiô khôp sôk ro drêng châ mơnhên, châ tơkŭm khôp a môi tíu hngêi khôp. Rêm ngế đi đo mơhnhôk tối dêi pó tơmâng tiô hnê mơhno, tơpui djâ dêi khu râ kăn pơkuâ, kơhnâ pêi cheăng kâ tơniăn tơdroăng rêh ối. Drêng troăng pêi ‘’Tơdroăng ki loi tơngah krá, pơlê pin tơniăn lĕm’’ mơhno mâ, kuăn pơlê châ trâm mâ tơdrêng, achê ƀă mâu khu râ kăn pơkuâ ing râ cheăm troh kong pơlê. Kuăn pơlê loi tơngah khât ƀă hmiân tuăn’’.

Klêi tơmot chiâng môi, cheăm Quảng Phú (kong pơlê Dak Lak) ai 37 thôn, pơlê ƀă vâ chê 62 rơpâu kuăn pơlê, tung mê, ai 9 pơlê ki hên cho mơngế Rơđế rêh ối. Pơlê kân rơdâ, kuăn pơlê hên hdrông mơngế, tơdroăng loi tĭng tiô khôp hên pro tơdroăng gâk kring tơniăn a pơlê cheăm pơkâ thế kăn ƀô̆ thế ‘nâi inhên pơlê ƀă hlê plĕng tơdroăng rêh ối pơlê pơla.

Cho mơngế Rơđế, châ hriâm tơdroăng cheăng kring vế, gak ngăn, Trung tă Y Dhăm Ƀyă tơ'lêi hlâu 'na nâl tơpui ƀă hlê plĕng khôi túa, vêa vong. Vâ 'nâi nhên kơpong ƀă tơleăng tơdroăng ing pơlê, ngoh đi đo lăm troh a rêm thôn, pơlê, trâm kuăn pơlê, krâ pơlê, ngế ki châ kuăn pơlê loi tơngah vâ tơmâng ƀă tăng 'nâi xiâm kối tơdroăng. Trung tă Y Dhăm Ƀyă ăm 'nâi, ing mâu tơdroăng ki tơdrêng mê, khu kŏng an cheăm kô hbrâ rơnáu tơleăng mâu tơdroăng ki ai xêh sap ing pơlê.

“Pin thế đi đo achê kuăn pơlê, tơmâng mâu tơdroăng púi vâ dêi kuăn pơlê, tơdrêng amê cho ngế ki hnê tối mâu tơdroăng ki xiâm, troăng hơlâ ing râ kơpêng vâ kuăn pơlê hlê plĕng, ‘nâi ƀă pêi tro mâu pơkâ luât. Pin xuân thế achê, lăm kơ-êng, tơpui tơno tơdroăng ƀă mâu ngế ki kuăn pơlê loi tơngah, krâ pơlê, mâu ƀok xối vâ vâi ‘nâi, hlê plĕng, ing mê pêi pro pơtâng tối tuăn pơlê pêi tiô lĕm tro tâ’’.

A mâu pơlê ki ai tơdroăng rêh ối mơhno túa lĕm tro, loi tĭng hên, rak tơniăn pơxiâm ing tơdroăng ki achê ƀă loi tơngah. Ƀă Trung tă Y Dhăm Byă, mê cho mâu rôh lăm troh a pơlê, trâm krâ pơlê, ngế ki châ kuăn pơlê loi tơngah, tơmâng kuăn pơlê vâ teăm 'nâi ƀă tah lôi mâu tơdroăng ing pơlê cheăm. Mâu tơdroăng pêi pro tơ'lêi hlâu mê veăng kum kơdroh ki kơtăn hơngế pơla kăn ƀô̆ ƀă kuăn pơlê. Um méa ngế kăn ƀô̆ tăng chôu phut pơtê kơhâi dế lăm troh a hngêi krâ pơlê xuân cho môi troăng hriâm ƀă pêi tiô Pôa: achê kuăn pơlê, achê pơlê cheăm, vâ rak tơniăn ing rêm pơlê cheăm.