Kơxo lơ 25/6, jâ Phạm Thị Thanh Trà, Kăn pơkuâ hnê ngăn cheăng Đảng tơnêi têa, Phŏ Ngế pro xiâm hnê ngăn tơnêi têa pơkuâ Hôp tơno tơdroăng kal mơgêi pêi pro hnoăng cheăng 6 khế apoăng hơnăm ƀă pêi pro hnoăng cheăng 6 khế mơ’nui hơnăm 2026 ‘na tơdroăng ti tăng, tơkŭm ƀă mơnhên inâi kơxêng kiâ mô đô̆i hlâ tung tơplâ xâ. Tiô tơbleăng, sap apoăng hơnăm troh nôkố, lâp tơnêi hiăng ti tăng, tơkŭm châ 1.255 kơxêng kiâ mô đô̆i ƀă 3 tơnâp kiâ khu pú hên a Tuyên Quang; xo, ‘măn lối 93.400 mâuh sinh phẩm nhŏng o mô đô̆i ki hlâ tung tơplâ xâ, tơdâng tơ’mô  lối 53.000 mâuh a cơ sơh dưh liê̆u.

Xông tơpui a hôp tơno tơdroăng kal, jâ Phạm Thị Thanh Trà, Phŏ Ngế pro xiâm hnê ngăn tơnêi têa tối ăm ‘nâi, sap ing kố troh mơ’nui hơnăm, lâp tơnêi têa mơ-eăm ti tăng, tơkŭm dâng 3.000 kơxêng kiâ mô đô̆i; xo mâuh ƀă pơcháu dâng 110.000 mâu kơxêng kiâ mô đô̆i, xo dâng 100.000 mâuh sinh phẩm nhŏng o mô đô̆i hlâ tung tơplâ xâ ƀă mơnhên ADN dâng 9.000 kơxêng kiâ mô đô̆i. Jâ Phạm Thị Thanh Trà, Phŏ Ngế pro xiâm hnê ngăn tơnêi têa pơkâ kơjo ki hên mơngế pêi cheăng vâ pêi pro châ tơƀrê Tơdroăng 500 hâi măng, mơdêk tơdroăng ti tăng, tơkŭm kơxêng kiâ mo đô̆i tung lâp tơnêi têa.