Tiô hlá mơ-éa pơtroh ‘na tơdroăng ki mơjiâng mâu Đảng ƀô̆ ối tung, tung mê ai: Đảng ƀô̆ Riân ngăn liăn ngân tơnêi têa; Đảng ƀô̆ Ƀơrô cheăng Kuô̆k hô̆i; Đảng ƀô̆ Hô̆i đong Hdroâng kuăn ngo; Đảng ƀô̆ Vi ƀan Luât ƀă tơdroăng mơjiâng luât; Đảng ƀô̆ Vi ƀan Cheăng kâ ƀă Liăn ngân; Đảng ƀô̆ Vi ƀan Cheăng lêng, Gâk gring ƀă Tơpui kâ; Đảng ƀô̆ Vi ƀan Túa lĕm tro ƀă rêh ối pơlê pơla; Đảng ƀô̆ Vi ƀan Khoa hok, Kong ngê̆ ƀă Kong prâi; Đảng ƀô̆ Vi ƀan Pêi tơdroăng cheăng khu kăn; Đảng ƀô̆ Vi ƀan hnê mơhnhôk ƀă Séa ngăn; Đảng ƀô̆ mâu kơ koan tí tăng ‘nâi plĕng, gum pêi cheăng ăm Đảng ủi Kuô̆k hô̆i.

Tơpui a Rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế mâu Đảng ƀô̆ rĕng tơbleăng tơdroăng cheăng pêi tiô túa ki nếo, tơrŭm ki nếo, tung mê kal rak vế tơdroăng ki pơtó pêi tro hnoăng cheăng, klêi pêi cheăng dêi mâu Đảng, Đảng ƀô̆ hdrối nah, pôi tá tro pơtê, pôi tá lôi xo xo, pôi tá lôi tơdroăng, mơdêk ki rơkê, tơƀrê mâu tơdroăng cheăng. Mâu kơ koan tơrŭm krá tơniăn, ‘nâi pơhlêh tơdroăng xơpá, tơvâ tâng ai vâ teăm tŏng gum, pêi tơƀrê; tơbleăng ăm khu ki ai hnoăng pơkuâ ngăn, pơkâ drêng kal.

Kăn xiâm hnê ngăn Kuô̆k hô̆i pơchân, rĕng séa ngăn tâi tâng khu tơrŭm kơ koan cheăng tung dế, mơjiâng mâu chi ƀô̆ ối tung tíu pêi cheăng, mơjiâng túa pơkâ pêi cheăng, xoăng nhên tơdroăng cheăng ăm rêm ngế đảng viên tung khu râ Đảng ƀă tơrŭm cheăng pêi tơdroăng cheăng ƀă mâu kơ koan ki ai tơdjâk troh vâ pêi cheăng dêi mâu Đảng ƀô̆ rak tơniăn, tơƀrê. Athế đi đo pêi pro tro tơdroăng cheăng kal kí, hiâm mơno tơmiât pêi, séa ngăn, tơmâng ngăn tơdroăng cheăng tơrŭm dêi mâu chi ƀô̆, đảng ƀô̆, rak vế tơdroăng cheăng pêi kơtăng, pơxâu phâk kơtăng tơdrăng.

Kăn xiâm hnê ngăn Kuô̆k hô̆i pơchân kal tơmâng ngăn troh tơdroăng cheăng dêi chi ƀô̆, mâu đảng viên; troăng pơkâ, tŏng gum ƀă mâu kăn ƀô̆ ki tro tơdjâk; xoăng kăn ƀô̆ athế tơdrăng tro, ngăn tung tơdroăng dêi tơdroăng cheăng tăng rah mơngế, rah xo mâu ngế ki rơkê, plĕng, ai hiâm mơno lĕm, “rế rơkê, rế hmâ”.

Pơla hdrối kố nah, Khu xiâm pơkuâ tơdroăng kal kí pơkâ Mơgêi 126, tung mê ai mâu tơdroăng kal tơdjâk troh Khô̆i Kuô̆k hô̆i, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế, Đảng ủi Kuô̆k hô̆i rĕng hriăn ngăn vâ drêng Tơnêi têa pơkâ tơdroăng nhên kal, pôi tá tro kơdrâ.

“’Mâi rơnêu, ‘mot tơ’nôm mâu pơkâ dêi Đảng, luât dêi Tơnêi têa, troăng hơlâ pơkâ tŏng gum tơdjâk troh vâ ai tơdroăng luât tơbleăng pêi pro klêi túa ki tơkŭm tâi tâng dêi khu pơkuâ tơdroăng kal kí. Môi tiah pôa Tô Lâm, Kăn xiâm pơkuâ hnê ngăn cheăng Đảng tối cho ki kơnía git môi tiah mêa vâ hbrâ ăm Hneăng hôp Đảng rêm râ, pêi pro troh hneăng hôp lâp tơnêi têa dêi Đảng; pơtối klâ xoăng tah râ cheăm tơtro ƀă túa tơkŭm po nếo; Pơkâ troăng ‘mot tơkŭm mâu tíu pêi cheăng râ kong pơlê; ‘mâi pơhlêh, ‘mot tơ’nôm mâu túa pơkâ luât, pơkâ dêi Đảng ai tơdjâk troh tơdroăng ki kal ‘na tơkŭm kơ koan cheăng “tá hlá mơ-éa ki kal khât môi tiah chiâng vâ pơhlêh Luât”, Luât Pôk kăn ƀă hên ki ê tung la ngiâ”.

Pôa Trần Thanh Mẫn, Kăn xiâm hnê ngăn Kuô̆k hô̆i púi vâ, khu râ đảng dêi mâu Đảng ƀô̆ châ mơjiâng hâi kố athế mơdêk dêi hnoăng cheăng pơkuâ tŭm têk, tơƀrê tung tơdroăng pêi pro mâu hnoăng cheăng kal kí dêi Hô̆i đong, mâu Vi ƀan, rêm kơ koan cheăng dêi Kuô̆k hô̆i; rak vế mâu tơdroăng tơbleăng, tung mê pơkâ kơtăng mâu túa tơmiât pêi, pơtối pơhlêh nếo túa mơjiâng luât, rak tơniăn krâu, nhên, rơkê, pêi châ tơdroăng pâ thế dêi tơdroăng cheăng khât; mơdêk tơƀrê tơdroăng séa ngăn ƀă tơpui tối leăng, mơdêk rơdêi troăng hơlâ tơpui tối, tơmâng xo mâu rơkong tơpui tối dêi mâu kăn Kuô̆k hô̆i ƀă Kuăn pơlê; mơdêk ki rơkê plĕng pơkâ ăm tơdroăng ki kal dêi tơnêi têa tiô troăng rế hía rế tro, teăm tơdrêng; hriăn ngăn, mơjiâng troăng tŏng gum pơhlêh kơxô̆, pơhlêh ngiât, xúa kong ngê̆ rơxông nếo, mơnhông pơxiâm pêi cheăng, pơhlêh nếo tơmiât pêi rơkê ƀă hên ki ê.

Ƀă hiâm mơno “rế pêi rế tơmiât” athế pêi nhên, krâu ƀă rĕng; hbrâ hdrối la pôi tá tơngôu, Kăn xiâm hnê ngăn Kuô̆k hô̆i tơngah ƀă loi tiah kố, tâi tâng Đảng ƀô̆ Kuô̆k hô̆i tối tơdjuôm ƀă rêm Đảng ƀô̆ ối tung kơ koan cheăng tối krê kô tơrŭm krá tơniăn, mơnhông hiâm mơno tơrŭm, pôu râng tơdroăng cheăng, pơhlêh nếo, tơmiât pêi rơkê vâ mơ-eăm pêi pro klêi mâu hnoăng cheăng, veăng gum ăm tơdroăng tơƀrê tơdjuôm dêi tơnêi têa.