Tơpui pơxiâm pơxiâm Rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên, kố cho rôh hôp ki kal khât, xua Đảng ủi Kuô̆k hô̆i ƀă Khu pơkuâ Chin phuh pơkuâ po vâ séa ngăn mâu tơdroăng cheăng ki ai tơdjâk troh hbrâ rơnáu ăm hneăng hôp ki ôh tá tối hdrối rôh má 9, Kuô̆k hô̆i hneăng 15 (po sap ing hâi lơ 12 troh hâi lơ 18/2/2025).

Kăn xiâm hnê ngăn Kuô̆k hô̆i tối nhên, Rôh hôp po tung pơla Tơnêi têa ƀă kong pơlê dế pêi pro mơgêi Pơkâ 18 xing xoăng kơ koan cheăng sap ing Tơnêi têa troh kong pơlê; tung pơla koh hâk Đảng, koh hâk rơnó Hơngui Ất Tỵ 2025, Tơbâ 95 hơnăm hâi mơjiâng Đảng Kŏng san Việt Nam. Tiah mê, hên kơ koan dêi Chin phuh, Kuô̆k hô̆i hiăng mơ-eăm hâi măng, tá hâi tơdrốu ƀă hâi tĭng ƀă hiâm mơno pôu râng dêi hnoăng khât, tơrŭm krá vâ pêi pro hnoăng cheăng châ pcơháu.

Kăn xiâm hnê ngăn Kuô̆k hô̆i ăm ‘nâi, Vi ƀan pơkuâ Kuô̆k hô̆i xuân hiăng hôp ăm rơkong veăng tơpui ‘na Luât mơjiâng Chin phuh (‘mâi pơhlêh), Luât Mơjiâng khu kăn pơkuâ kong pơlê (‘mâi pơhlêh) ƀă hbrâ mâu tơdroăng pơkâ tung hneăng hôp ki ôh tá tối hdrối rôh má 9. Mâu tơdroăng kal kố Khu kăn Kuô̆k hô̆i hiăng môi tuăn. Pôa Trần Thanh Mẫn, Kăn xiâm hnê ngăn Kuô̆k hô̆i tối nhên:

“Pin athế pơtối pơhlêh nếo túa tơmiât, túa pêi, tơkŭm khât ăm tơdroăng mơnhông dêi tơnêi têa; tơdrêng amê hlối mơdêk tơdroăng ki rơkê plĕng, hnoăng cheăng pôu râng, túa pêi dêi mâu hneăng hôp achê kố, malối cho mâu hneăng hôp má 7,8 dêi Kuô̆k hô̆i hneăng 15. Tung pơla hdrối nah, péa pâ hiăng tơrŭm tro khât, nôkố pin athế tơrŭm tro tâ nếo; hiăng tơdrăng, pôu râng dêi hnoăng, nôkố athế tơdrăng, pôu râng dêi hnoăng tâ nếo xua tơdroăng mơnhông dêi tơnêi têa. Xua tơdroăng pơkuâ dêi Khu xiâm Tơnêi têa, Khu xiâm pơkuâ tơdroăng kal kí, Khu pơkuâ ngăn Đảng ƀă Kăn xiâm pơkuâ hnê ngăn cheăng Đảng – pôa Tô Lâm hiăng hên xôh tối tiah kố, tơdroăng tơrŭm pơla Chin phuh ƀă Kuô̆k hô̆i athế châ môi tuăn khât vâ tŏng gum mâu tơdroăng ki xơpá, tung mơnhông cheăng kâ rêh ối pơlê pơla, rak tơniăn tơdroăng cheăng lêng, gâk kring ƀă mơjiâng khu xiâm pơkuâ tơdroăng kal kí”.

Kăn xiâm hnê ngăn Kuô̆k hô̆i tơbleăng, mâu tơdroăng ki kal Hneăng hôp ôh tá tối hdrối rôh má 9, riân troh nôkố, péa pâ hiăng môi tuăn mâu tơdroăng ki kal cho: séa ngăn tơbleăng 4 luât; 5 tơdroăng pơkâ gum tơdroăng cheăng xing xoăng, pêi klêi tơdroăng pơkâ, troăng pơkuâ mâu kơ koan, tíu pêi cheăng, khu tơrŭm cheăng kal kí; séa ngăn pơkâ 4 tơdroăng kal ki ê ối tung hnoăng pơkuâ, tung mê ai tơdroăng ki kal ‘na hnoăng cheăng mâu ngế cheăng; tơdrêng amê hlối ai môi rôh tối tơbleăng Kuô̆k hô̆i tiô pơkâ.

Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa mơnhên tối khât ƀă mơnê tơdroăng tơrŭm dêi Kuô̆k hô̆i, Vi ban pơkuâ Kuô̆k hô̆i ƀă Chin phuh; rế hía rế châ tơdroăng loi tơngah, tơrŭm krá tơniăn, tơƀrê ƀă dêi rơpó vâ pêi pro hên tơdroăng cheăng; malối cho pêi pro kơtăng ƀă tơƀrê mâu tơdroăng pơkâ dêi Đảng ƀă Tơnêi têa tung tơdroăng cheăng dêi Kuô̆k hô̆i môi tiah Chin phuh.

Pôa Phạm Minh Chính, Ngế pro xiâm hnê ngăn tơnêi têa tối nhên, ki xiâm pơkâ mơ’no dêi Khu pơkuâ ngăn Tơnêi têa, Khu xiâm pơkuâ tơdroăng kal kí, Khu pơkuâ hnê ngăn Đảng, hnê mơhno dêi pôa Tô Lâm, Kăn xiâm pơkuâ hnê ngăn cheăng Đảng péa pâ tơrŭm krá tơniăn, pêi hên tơdroăng tung môi hâi khế ki iâ, pêi tơƀrê la krá rơdêi ‘na tơdroăng pơkâ, hlá mơéa.

“Ngin hôp a Hneăng ki ôh tá tối hdrối rôh má 9, mơhno hiâm mơno ai tơdroăng cheăng pêi, ai tơdroăng mê athế pơkâ tơleăng. Drêng hiăng pêi, pơkâ tơleăng athế troh tui lui, tơƀrê. Hvái ngăn mâu hneăng hôp ki ôh tá tối hdrối tơtro ƀă pêi pro tung tơdroăng ki ai khât, pơkâ tơleăng châ mâu tơdroăng dêi ai khât ƀă pơkâ tơleăng cha tơdroăng púi vâ dêi kuăn pơlê. Ki xiâm rôh kố dêi Đảng pơkâ, pin dế tung tơdroăng kơdroh kơ koan cheăng tơnêi têa tiô Pơkâ 18, kố cho môi rôh kăch măng ‘na kơ koan cheăng tơnêi têa. Kơ koan iâ tơkŭm, kuăn mơngế rơkê plĕng tâ. Drêng pin pơkâ mâu tơdroăng kố, pêi pro Pơkâ dêi Tơnêi têa dêi Khu xiâm pơkuâ tơdroăng kal kí, mâu rơkong tơpui mơgêi dêi Đảng mê kô tơvâ troh mâu pơkâ dêi luât tâng hiăng châ pơkâ tiô ki ton. Tung tơdroăng dêi Tơnêi têa, Khu xiâm pơkuâ tơdroăng kal kí mê tơvâ u lâi ‘mêng u mê, tơvâ a râ ki lâi, râ ki mê athế ‘mêng”.

Tối nhên Hneăng hôp ki ôh tá tối hdrối rôh má 9 ai tơdroăng ki kal, xơpá la xua tơdroăng mơnhông tơtêk dêi tơnêi têa, pôa Trần Thanh Mẫn, kăn xiâm hnê ngăn Kuô̆k hô̆i pơkâ thế rêm pâ ki ai tơdjâk troh kal pơtối tơkŭm khât mâu tơdroăng cheăng, mâu ivá tơrŭm krá tơniăn, rĕng pêi klêi tơdroăng cheăng vâ hbrâ ăm tâi tâng tơdroăng ki kal pơtroh ăm Kuô̆k hô̆i xuân môi tiah rak tơniăn khât, veăng gum pro ƀlêi chiâng dêi Hneăng hôp.