A roh leh, Khu pơkuâ tơdroăng cheăng Đảng kơvâ cheăng lêng tơnêi têa, Khu xiâm pơkuâ mô đô̆i hiăng kheăn kơdeăn 35 khu pú hên ƀă 80 ngế krê ki kơhnâ rơkê ‘’Mơhnhôk kuăn pơlê rơkê’’ dêi Khu mô đô̆i a kơpong kuăn pơlê hdroâng kuăn ngo ƀă kong ngo hneăng hơnăm 2019 – 2024.

5 hơnăm hiăng hluâ, Khu pơkuâ tơdroăng cheăng Đảng kơvâ cheăng lêng tơnêi têa, Khu xiâm pơkuâ mô đô̆i, Kơ koan xiâm Kal kí hiăng tơmâng pơkuâ, hnê mơhno po rơdâ pêi pro tơdroăng tơ’noăng ‘’Mơhnhôk kuăn pơlê rơkê’’, mơjiâng ‘’đông lêng mơhnhôk kuăn pơlê tro lĕm’’ tơdâng tơ’mô, tâi tâng, păng ‘nâng, krá tơniăn, ai trâu hơngế, tơtro ƀă tơdroăng nôkố, tơdjêp krá tơniăn ƀă pêi pro mâu tơdroăng, mâu roh mơhnhôk dêi lâp tơnêi têa, châ tơƀrê hên ƀă túa ki rơkê tơtro kơnía...; kum pro ăm krá tơniăn tâ gâk kring tơnêi têa, kring tơniăn pơlê pơla, mơjiâng tơdroăng gâk kring tơnêi têa tâi tâng kuăn pơlê, tơdroăng gâk kring kuăn pơlê, mơjiâng tơdroăng pâ nhuô̆m tơnêi têa, tơrŭm môi tuăn krá tơniăn, rak tơdroăng loi tơngah dêi kuăn pơlê mâu hdroâng kuăn ngo ƀă Đảng, Tơnêi têa, Khu mô đô̆i; pêi pro lĕm tro tơdroăng cheăng khu lêng tơdroăng pêi cheăng, khu lêng pêi cheăng pêt mơjiâng tơmeăm, troh lâp lu um méa ‘’Mô đô̆i Pôa Hồ’’ tung chal nếo.

Sap hơnăm 2019 – 2024, mâu tíu cheăng tung tâi tâng khu lêng tơrŭm tơkŭm po pơtâng tối lối 250 rơpâu roh ƀă lối 20 rơtuh roh ngế veăng; mơhnhôk lối 11 rơpâu rơpŏng ƀă vâ chê 56 rơpâu pơ’leăng mâ ôh tá xĕn ối hmâng vâ ƀă lối 20 rơpâu ngế hok tro vêh hriâm a hngêi trung. Hiăng tơrŭm ƀă tơkŭm po hnê tơdroăng ki rơkê gâk kring tơnêi têa, gâk kring tơniăn ăm lối 18.300 roh krâ pơlê, kăn pơkuâ thôn, pơlê, ngế ki kuăn pơlê loi tơngah tung kuăn pơlê hdroâng kuăn ngo; veăng mơjiâng khu lêng kuăn pơlê, khu ki hbrâ pêi cheăng dêi pơlê, cheăm kơpong kong ngo krá rơdêi; tơleăng châ tơƀrê mâu tơdroăng ki pá puât kố ai ing pơlê pơla, ôh tá chiâng ‘’tíu ki tô’’ troh lâp lu, ton xŏn...

Thiê̆u tă lêng ki rơkê Nguyễn Thị Thúy, Kŏng ti 723, Ƀinh đoân 15 (pêi cheăng tung tơring Đức Cơ, Gia Lai) hiăng mơhnhôk châ tơƀrê mâu kuăn pơlê ki ôh tá tiô xếo tơdroăng khôp ki ôh tá tro luât vêh ƀă rơpŏng hơ’muăn:

‘’Tung môi xôh troh pơlê vâ mơhnhôk vâi krâ kuăn pơlê mê môi ngế muăn ối kŭn troh kuâ chêng á, muăn tối xăng ôi, xăng tăng nôu muăn vêh ƀă muăn, muăn pâ kô nôu ‘nâng. Cho mơngế pro nôu á ‘nâi, drêng vâi hdrêng hiăng tơpui tiah mê cho muăn hiăng ton ôh tá châ rêh ối ƀă nôu. Á ƀă mâu khu pú dêi á hiăng pơkâ djâ muăn mê mot tung kong vâ rơtế ƀă ngin mơhnhôk,  pơlông ngế nôu dêi muăn ƀă mâu kuăn pơlê vêh ƀă pơlê’’.

Xông tơpui a roh leh, Thươ̆ng tươ̆ng Trịnh Văn Quyết, Kăn pơkuâ Kơ koan xiâm Kal kí, Khu lêng kuăn pơlê Việt Nam mơnhên, kơpong kuăn pơlê hdroâng kuăn ngo ƀă kong ngo cho tíu cheăng ton xŏn ki kal tung mơnhông cheăng kâ, khôi túa lĕm tro, rêh ối pơlê pơla, gâk kring tơnêi têa, gâk kring tơniăn, tơpui kâ. Mâu tơdroăng pêi pơhlêh nếo Việt Nam hiăng mơnhên, kuăn pơlê mâu hdroâng kuăn ngo đi đo tơrŭm môi tuăn ƀă veăng gum kân ăm tơdroăng ki pơhlêh dêi Đảng, hên kơpong tơnêi chiâng pơlê kong xiâm tơplâ, păn ƀă gâk kring kăn ƀô̆, mâu lêng, rơpâu kuăn ‘nĕng mâu hdroâng kuăn ngo hiăng hâk vâ lăm pro mô đô̆i, gum rơtế kuăn pơlê lâp tơnêi têa châ ƀlêi trâng kân tung tơdroăng gâk kring Tơnêi têa.

Tơdroăng pơtâng tối mơhnhôk kuăn pơlê pơtối mơnhên Khu lêng ing kuăn pơlê mê chiâng ai, xua kuăn pơlê mê kô tơplâ. Tối nhên tơnêi têa pin dế mot tung chal mơnhông kro mơdrŏng, pơkâ thế mơjiâng tíu tơ’lêi hlâu vâ mơnhông hiâm mơno pâ nhuô̆m tơnêi têa, hiâm mơno mơ-eăm, tơmeăm ki ai hlâu, ki rơdêi dêi kuăn pơlê mâu hdroâng kuăn ngo, kum kuăn pơlê pơtối veăng kum tuăn ngôa rơkê ivá tung tơdroăng mơjiâng tơnêi têa, Thươ̆ng tươ̆ng Trịnh Văn Quyết pơkâ thế:

‘’Khu râ kănpơkuâ hnê ngăn cheăng Đảng hnê mơhno ƀă kăn ƀô̆ mâu lêng tung tâi tâng khu lêng, tung mê ai mâu khu pú hên, ngế krê ki kơhnâ rơkê châ kheăn kơdeăn hâi kố kô pơtối pêi pro lĕm tro hnoăng ki xiâm, cho tíu hgiên ki loi tơngah, rơtế kuăn pơlê tung rêm kơvâ cheăng. Tơrŭm krá tơniăn ƀă khu râ kăn pơkuâ pơtâng tối, mơhnhôk kuăn pơlê loi tơngah păng ‘nâng tung tơdroăng pơkuâ dêi Đảng, thăm veăng tung pêt mơjiâng tơmeăm, mơnhông cheăng kâ khôi túa lĕm tro pơlê pơla, thăm gâk kring tơnêi têa, gâk kring pơlê pơla, mơdêk kơchăng tơdroăng pơhlêh khŏm tơplâ mơdât mâu tơdroăng ki tăng pro ‘mêi pơlông djâ, ‘nhê dêi mâu ngế ki hêng hôu tơnêi têa vâ pro tơklâ tơdroăng tơrŭm môi tuăn tâi tâng hdroâng mơngế’’.

Klăng roh kố, Khu xiâm pơkuâ lêng mơhno mâ tơdroăng ‘’Mơngế dêi pơlê’’, mơ’no tung Um tơvi Mô đôi ƀă tơbleăng a mâu hlá tơbeăng Khu mô đô̆i vâ pơtâng tối, troh lâp lu mâu tơdroăng pêi ki kal khât, kơnía, mâu tơdroăng ki kal, um méa ‘na tơdroăng tơrŭm môi tuăn môi mơheăm chhá pơla khu lêng ƀă kuăn pơlê, tung mê ai kuăn pơlê mâu hdroâng kuăn ngo ƀă kong ngo.