Trung Tươ̆ng Phạm Thế Tùng, Phŏ ngế xiâm kŏng an, veăng hôp ƀă teăng mâ Khu xiâm Kŏng an diâp ăm kong pơlê 231 rơtal liăn- kơxô̆ liăn ki mê xua kăn ƀô̆, mâu lêng dêi Khu xiâm pơkuâ veăng tơlo, vâ rơtế ƀă kong pơlê pro tơdroăng mê. Tơbleăng hnê mơhno a rôh leh, Trung tướng Phạm Thế Tùng tối, khu xiâm Kŏng a kô tơhrâ rơtế ƀă kong pơlê Gia Lai tung tơdroăng xut hngêi pơtân, hngêi xi kơchoh, tơniăn ăm kuăn pơlê ai tiu ối tơniăn.

Pôa tối nhên, ƀă hnoăng cheăng pêi, mâu kŏng an pơtối djâ troăng ahdrối tung mơhnhôk tăng liăn, mơdêk rĕng mơjiâng pro ƀă ‘mâi rơnêu pro hngêi, ƀă hlối rak tơniăn tung pơla pêi pro tơdroăng hiăng tơhrâ. Tiô pơkâ, kong pơlê Gia Lai kô xut tah 8.485 toăng hngêi tung tơdroăng pơkâ. “Tơjuôm ivá xut tah hngêi pơtân, hngêi xi kơchoh‘’ a hơnăm 2025.