
Môi rôh lăm hnê tối trâu rơdâ hiăng châ Khu ngăn vâi kơdrâi tơring Thuận Châu (ton nah) tơrŭm krá ƀă kơvâ ngăn pơkeăng Sơn La tơbleăng lâp lu 23 to cheăm kơtiê xơpá. Ƀă tơdroăng pơkâ pêi “hnê tối hdrối, kơjo kum kơ’nâi”, mâu kăn ƀô̆ tung khu ƀă mâu ngế pêi cheăng ngăn pơkeăng hiăng lăm troh tơrêm thôn pơlê, mơ-eăm hnê tối ăm kuăn pơlê, pơ’lêh “tuăn tơmiât, túa pêi pro’’. Jâ Lường Thị Thanh Thủy, Phŏ kăn hnê ngăn Đảng ủy cheăm Thuận Châu tối, cho Kăn hnê ngăn Khu ki ngăn vâi kơdrâi tơring Thuận Châu (ton nah) ăm ‘nâi, kơxô̆ liăn kơjo kum vâ ai kuăn tơniăn ki mâu kăn ƀô̆, khu ngăn vâi kơdrâi hnê tối ăm mâu kơdrâi malối cho vâi kơdrâi kuăn ngo mê cho mâu ngế kố châ xúa luât pơkâ kơjo kum mê. Kơnôm ing mê, kơxô̆ vâi nâ o kuăn ngo châ xúa liăn tŏng gum mê hên riân sap hơnăm 2021.
“Tung pơla rôh má 1 (2021-2025), Thuận Châu hiăng tơbleăng tối nhên mâu tơdroăng kơjo kum liăn mơhum kuăn ngá a mâu hngêi pơkeăng. Xua mê, ƀă vâi nâ o hdroâng kuăn ngo châ xúa kơxô̆ liăn kơjo kum mơhum kuăn ngá tơniăn mê hên”.

Vâ tơniăn tơƀrê, Khu ngăn vâi Kơdrâi tơring Thuận Châu ton nah hiăng tơkŭm po lâp Hriâm mơdêk ivá. Ƀă mâu ngế ki veăng mê cho kăn ƀô̆ vâi kơdrâi ƀă kăn ƀô̆ ngăn pơkeăng râ cheăm, mâu ngế pơkuâ tơdroăng cheăng kơjo kum a cheăm bêng. Khu ngăn vâi kơdrâi xuân xúa tâi tâng kơxô̆ liăn kơjo kum vâ hdrê ăm mâu nôu vâi nâ kuăn ngo ki mơhum kuăn ngá tơniăn a mâu hngêi pơkeăng cheăm bêng dêi tơnêi têa.
Xuân tiô jâ Lường Thị Thanh Thủy, sap hơnăm 2021 troh tâi hơnăm 2024, tơring Thuận Châu (ton nah) hiăng kơjo kum ăm lối 1.600 ngế vâi kơdrâi kuăn ngo ‘na tơdroăng mơhum kuăn ngăn tơniăn. Tâi tâng kơxô̆ liăn hrê ăm mâu vâi nôu hiăng tâk troh lối 2,4 rơtal liăn. Kố cho môi tung mâu cheăm ki ai kơxô̆ vâi nôu kuăn ngo châ kơjo kum mơhum kuăn ngá hên má môi tung kong pơlê Sơn La.
“Hdrối vâ tơbleăng kơxô̆ liăn kơjo kum mê (hdrối hơnăm 2021), kơxô̆ vâi kơdrâi kuăn ngo troh khăm kuăn ngá tung klêa tiô rơnó ƀă ai kuăn a hngêi pơkeăng cheăm bêng ối iâ, bú dâng 600 ngế nôu tê rêm hơnăm. Laga, klêi kơ’nâi lối 3 hơnăm tơbleăng, lối 1.000 ngế kơdrâi hiăng lăm mơhum kuăn a hngêi pơkeăng cheăm bêng. Kơnôm ing mê, tơdroăng khăm pơlât ai rak ngăn ivá ngế nôu ƀă vâi hdrêng hiăng châ ‘mâi hơ’lêh nhên, kơxô̆ ngế nôu hlâ drêng mơhum kuăn hiăng kơdroh hên, kơxô̆ ngế hdrêng hlâ drêng kot mâ xuân hiăng kơdroh hên há”.
Mâu tơdroăng mê cho rôh apoăng ki kal vâ Khu ngăn vâi kơdrâi Thuận Châu pâ thế Tíu xiâm, kong pơlê ƀă mâu kơvâ cheăng pơtối tơbleăng kơxô̆ liăn mê tung pơla rôh má 2 hơnăm (2026-2030), vâ pơtối kơjo kum ăm vâi kơdrâi kuăn ngo tung kong pơlê. Ƀă vâ chê 2,5 rơtal liăn châ xo liăn ngân, lối 1.000 ngế vâi kơdrâi a Thuận Châu hiăng châ kơjo kum tơdrêng, lối môi rơpâu ngế kuăn ngá hiăng kot mâ tơniăn, lối môi rơpâu ngế nôu hiăng châ rak ngăn krâu. Na Lò Thị Hồng, môi ngế kơdrâi kuăn ngo Thái, tối:
"Hdrối nah, ngin xâu lăm mơhum kuăn ngá a hngêi pơkeăng, hlối ôh tá ai liăn. Nôkố châ mâu kăn ƀô̆ lăm pôu tơrêm hngêi hnê tối, hlối kum ăm liăn drêng mơhum, liăn kâ kế, liăn prôk vêh, ngin tâ hmiên tuăn. Kuăn pin kot mâ mo lĕm hâk mơnê ‘nâng”.
Tơdroăng tơkêa bro 8 ôh tá xê to kum liăn ăm kơpong xơpá, mê ki kal tâ, hiăng hnê ăm kuăn pơlê hlo plĕng, pơ’lêh tuăn tơmiât ƀă pơcháu ăm tơdroăng ki tơniăn ăm mơngế nôu kuăn ngo, veăng ‘no hnoăng mơjiâng môi rơxông tung la ngiâ mo lĕm ƀă hlối tơrŭm tâ ôh tá pơrah dêi rơpó.
Viết bình luận