Pêi pro hnê mơhno dêi Ngế pro xiâm hnê ngăn Chin phuh ‘na pơtối mơdêk pêi pro xut tah hngêi pơtân, hngêi xi kơchoh tung lâp tơnêi têa, troh hâi lơ 6/2/2025 kong pơlê Kon Tum hiăng pro 369 toăng hngêi, tung mê, mơjiâng nếo 320 toăng hngêi ƀă rơnêu 49 toăng hngêi. Lâp kong pơlê Kon Tum ai 2.752 toăng hngêi pơtân, hngêi xi kơchoh, tung mê, tơdroăng kal vâ mơjiâng hngêi nếo 2.186 toăng hngêi ƀă rơnêu 566 toăng hngêi ki ê.

Tâi tâng kơxô̆ liăn vâ kong pơlê Kon Tum pêi pro xut hngêi pơtân, hngêi xi kơchoh cho lối 141 rơtal 500 rơtuh liăn ƀă nôkố kong pơlê u ối tá hâi tŭm lối 54 rơtal 700 rơtuh liăn.

Xiâm kối chiâng ai tơdroăng kong pơlê Kon Tum ôh tá tŭm kơxô̆ liăn vâ xut tah hngêi pơtân, hngêi xi kơchoh xua mâu rơpŏng kuăn pơlê kal xut tah hngêi pơtân, hngêi xi kơchoh diâp ăm 1.214 rơpŏng tâng pơchông ƀă tơdroăng séa ngăn apoăng. Ki nhên tơdroăng séa ngăn roh hdrối cho 1.538 rơpŏng ƀă roh kơ’nâi cho 2.752 rơpŏng ai hngêi pơtân, hngêi xi kơchoh kal châ mơjiâng nếo ƀă rơnêu. Tiô Khu hnê mơhno xut tah hngêi pơtân, hngêi xi kơchoh kong pơlê Kon Tum, nôkố kơxô̆ liăn tŏng gum dêi Tơnêi têa ƀă mâu kơxô̆ liăn dêi kong pơlê tơniăn tŭm châ 61% tâi tâng tơdroăng kal vâ kơxô̆ liăn vâ kong pơlê pêi pro tơdroăng xut tah hngêi pơtân, hngêi xi kơchoh.