Tiô tơdroăng Tơkêa têa tah hngêi pơtân, hngêi xi kơchoh dêi Chin phuh, kong pơlê Dak Lak kô kơjo kum pro hngêi ối ăm 4.285 rơpŏng, ƀă tâi tâng kơxô̆ liăn vâ chê 343 rơtal liăn. Pakĭng mê, kong pơlê Dak Lak xuân  kơjo kum liăn ‘mâi rơnêu pro hngêi ăm lối 1.120 rơpŏng kuăn pơlê.

Tơdroăng tơkêa bro xua Kŏng an kong pơlê Dak Lak pơkuâ, tơrŭm ƀă mâu kăn mâu kong pơlê pêi pro sap apoăng khế 3 ƀă pê klêi tơdế khế 8/2025. Kơ’nâi lối 2 măng tĭng tơbleăng tơdroăng tơkêa bro têa tah hngêi pơtân hngêi xi kơchoh, kong pơlê Dak Lak hiăng mơjiâng pro lối 1.000 toăng hngêi, tiô tối hdrối kô pro klêi a khế pŭn kô ah. Mâu hngêi pro ki u ối kô pơtối pro vâ rĕng kêi hdrối hâi lơ 15/8/2025.

Krông Bông cho môi tung mâu tơring kơpong hơngế hơngo kơtiê xơpá má môi kong pơlê Dak Lak. Rôh kố tơring ai 513 rơpŏng hngêi xơpá ‘na hngêi ối châ kơjo kum mơjiâng pro nếo, ƀă tâi tâng kơxô̆ liăn lối 41 rơtal liăn; ƀă 96 rơpŏng ki ê châ kum 2,88 rơtal liăn vâ rơnêu pro hngêi.