A mâu trâm mâ kuăn pơlê dêi mâu kăn Kuô̆k hô̆i a kong pơlê Lâm Đồng, kuăn pơlê pâ thế kal xoăng râ, xoăng hnoăng pơkuâ nhên pơla péa to kong pơlê ƀă cheăm drêng pêi pro kăn pơkuâ péa râ, malối cho athế tơniăn hnoăng pơkuâ hbru mơéa mơnhên hnoăng rak xúa tơnêi ăm kuăn pơlê. Pâ thế pơtê lôi tơdroăng ki chiâ xo tơmeăm khoăng tung kơdâm tơnêi xua kơmăi kơmok ki hiăng ton pro ‘mêi hyôh kong prâi; séa ngăn xo tơvêh tơnêi pêt kong ki tá hâi pêi, vêh pơcháu ăm kong pơlê, ƀă kơjo  kum ‘no liăn cheăng ‘mêng pro troăng prôk. Pôa Liêng Jrong Ha Bri, krâ pơlê, a thôn 1, cheăm Lạc Dương, kong pơlê Lâm Đồng tối:

“Hên vâi krâ kuăn pơlê akố xuân kal mơéa hnoăng rak xúa tơnêi la nôkố cheăm pin xuân tá hâi pro, pâ thế Kuô̆k hô̆i athế ngăn ƀă tŏng gum tơleăng xua mê cho tơdroăng púi vâ dêi vâi krâ kuăn pơlê. Tơdroăng ki ê nếo cho kal vêh séa ngăn mâu kế tơmeăm ôh tá xê khât, nôkố pin hlo tâi tâng mâu tơmeăm khoăng cho ôh ti xê khât, phon rơvât xuân ôh ti xê, kơphế xuân cho tơmeăm ôh ti xê khât há. Pâ thế Kuô̆k hô̆i séa ngăn kơtăng mâu tơdroăng mê ăm kuăn pơlê”.

A mâu rôh trâm mâ kuăn pơlê, teăng mâ kăn pơkuâ cheăm, mâu khu râ, kơvâ cheăng ai tơdjâk dêi kong pơlê Lâm Đồng hiăng pơchuât tơbleăng, tơpui tối leăng, tơmâng xo mâu tơdroăng ki kal ối tung hnoăng pơkuâ. Tơdrêng amê mâu kăn Kuô̆k hô̆i xuân chêh tơkŭm tâi tâng mâu rơkong tơpui tối, pâ thế dêi kuăn pơlê pâ thế kăn pơkuâ cheăm tơmâng tŏng gum tơleăng ƀă chêh xo mâu tơdroăng ki kal pơtroh ăm Kuô̆k hô̆i ngăn.

Rôh trâm mâ kuăn pơlê mâu cheăm bêng peăng mâ hâi Lo dêi kong pơlê Dak Lak (kong pơlê Phú Yên hdrối nah) châ Khu kăn Kuô̆k hô̆i kong pơlê Dak Lak po ƀă tơdroăng ‘no tơdrêng ing um tơvi troh a mâu tíu mơ’no xiâm cho bêng Tuy Hòa ƀă tơdjêp ‘no tơdrêng ing troăng hyôh internet troh a mâu tíu mơ’no ối tung mâu cheăm bêng: Đông Hoà, Sông Cầu, Tuy An Bắc, Phú Hoà 1, Tây Hoà, Sơn Hoà, Sông Hinh ƀă Đồng Xuân. Mâu kuăn pơlê hlo tơdroăng tơmâng ngăn hnoăng cheăng pôu râng dêi Kuô̆k hô̆i, tơdrêng amê hlối tối púi rơhêng vâ Dak Lak rĕng ai troăng pơkâ pêi mơnhông nếo klêi kơ’nâi ‘mot tơkŭm. Kuăn pơlê Võ Ngọc Hiền Minh, a bêng Tuy Hòa, kong pơlê Dak Lak ăm ‘nâi:

“Kong pơlê Dak Lak hdrối nah cho ai hên túa lĕm tro Tây Nguyên kong ngo, tung pơla Phú yên cho kơpong a kĭng têa kơxĭ peăng tơdế Tơnêi têa xiâm. Tơdroăng ‘mot tơkŭm chiâng môi, tơrŭm mâu túa lĕm tro pơla têa kơxĭ, kong kế kô po rôh tơ’lêi mơnhông kân ăm kong pơlê Dak Lak nếo. Púi rơhêng vâ kăn pơkuâ mâu râ tơmâng ngăn, hnê mơhno teăm tơdrêng vâ mơjiâng kong pơlê rế hía rế kro lĕm, tơdroăng rêh ối kuăn pơlê rế hía rế tơniăn lĕm tro”.

Tung mê, kuăn pơlê a mâu cheăm peăng mâ hâi Lâ kong pơlê Dak Lak tối môi tuăn ƀă túa kăn pơkuâ 2 râ châ pơxiâm pêi ing hâi lơ 1 khế 7 troh nôkố. Kuăn pơlê pâ thế kal thăm mơnhông kơxô̆ liăn, tơkŭm po lâm hnê hriâm mơdêk ivá pêi cheăng ăm mâu kăn ƀô̆ cheăm bêng; ‘no liăn roê tơmeăm khoăng, kế tơmeăm xúa kơmăi kơmok gum cheăng pơkuâ, rak ngăn vâ rak tơniăn pơkuâ ngăn tơnêi tơníu klêi kơ’nâi pêi pro túa pêi kăn pơkuâ kong pơlê péa râ.

Tơpui a rôh trâm mâ, jâ Nguyễn Thị Thu Nguyệt, Phŏ ngế xiâm pơkuâ Khu kăn Kuô̆k hô̆i kong pơlê Dak Lak pơkâ thế rêm râ kăn pơkuâ sap ing kong pơlê troh cheăm bêng pơtối pêi pro kơtăng mâu pơkâ dêi tơnêi têa, malối cho pơkâ ‘na klâ xoăng kơ koan cheăng tơnêi têa, ing mê tŏng gum tơtro pơxúa ăm khu mơdró kâ ƀă kuăn pơlê.

“Pơkâ thế UBND kong pơlê Dak Lak pơtối séa ngăn, mơ’no mâu troăng hơlâ pêi pro nhên vâ pêi pro klêi pơkâ pei mơdêk 8% tiô tơdroăng hnê mơhno dêi Chin phuh troh hơnăm 2025, tơdrêng amê hlối mơeăm pêi châ ki tâi tâk péa kơxô̆ tung hneăng ki pơtối. Vâ pêi châ tơdroăng kố, pơkâ thế mơ’no cho athế rế tơniăn khu tơrŭm kơ koan cheăng, rế xoăng râ, xoăng hnoăng pơkuâ nhên, tơdrăng, pơcháu hnoăng cheăng pôu râng nhên ăm kong pơlê, rak tơniăn tro mâu pơkâ pêi mơnhông krá tơniăn ƀă tro hnoăng pơkuâ”.

Tung tơdroăng ki tơniăn krê, tơdrăng ƀă pêi pro, Rôh hôp trâm mâ kuăn pơlê dêi mâu kăn Kuô̆k hô̆i kong pơlê Dak Lak ƀă Lâm Đồng hlo tơƀrê khât. Mâu kăn Kuô̆k hô̆i, teăng mâ kong pơlê ƀă mâu khu râ kơvâ cheăng hiăng tơmâng xo, tơpui tối leăng hên tơdroăng ki kal; tối rơdêi kô pơtối tơmâng ƀă rơtế prôk ƀă kuăn pơlê tung pơla mơjiâng kong pơlê mơnhông rĕng, krá tơniăn.