Tơpui a tôh ‘na kơxop hlá mơéa Luât tơrŭm khu kăn pơkuâ kong pơlê ki ‘mâi pơhlêh, mâu kăn hiăng môi tuăn ƀă túa tơmiât thăm mơnhông axoăng râ, xoăng hnoăng pơkuâ, xua kố cho troăng pơkâ ki kal nôkố. Luât kố ôh ti chiâng pơkâ nhên, tơdrăng tơrêm túa pêi, mê bu pơkâ mâu tơdroăng tiô pơkâ, drêng châ diâp hnoăng pơkuâ, kong pơlê pơkâ, kong pơlê chiu pôu râng dêi hnoăng. Laga drêng diâp hnoăng pơkuâ gá kô ó rơdêi tâ ăm rêm râ kăn pơkuâ la hlối ai tá tơdroăng ki tô tuăn ‘na pro pơxúa ăm dêi tơná ing hnoăng pơkuâ. Đại Hoàng Văn Cường, ngế ki lo ing Hà Nội tối tiah kố:

“Tơmiât vâ pơkâ túa pêi tiah lâi vâ pôi tá pro pơxúa ing hnoăng pơkuâ, pro pơxúa ăm dêi tơná ing mâu tơdroăng cheăng, môi tung mâu túa pêi mê cho hnoăng prôk rơtế tiô tơdroăng tơbleăng mơhno nhên, tơdrăng, tối leăng. Drêng mê, mâu kăn ƀô̆, pêi pro châ ivá cheăng, tuăn mơno tơchĕng pêi rơkê, rơkong tơpui mơgêi 14 dêi Khu xiâm pơkuâ tơdroăng kal kí ‘na mơhnhôk mâu ngế ki khên pêi pro nếo mơnhông tơƀrê”.

Veăng tơpui tơno a tôh, pôa Tô Lâm, Kăn xiâm pơkuâ hnê ngăn cheăng Đảng pơchân: xo tơdroăng ki hâk vâ dêi kuăn pơlê vâ mơnhên tối ki tơƀrê, xêt khât dêi Chin phuh, khu kăn pơkuâ rêm râ. Tơdroăng kố ngăn tung troăng ngăn, ivá pêi cheăng rơkê pơhlêh nếo, ivá pêi pro troăng hơlâ dêi râ kăn pơkuâ.

“Mơdêk ki rơkê plĕng ăm kuăn pơlê, mơdêk tơdroăng ki veăng tơrŭm dêi pơlê pơla tung pơla mơdêk tơƀrê dêi kơ koan cheăng tơnêi têa ƀă ‘mâi mơnhông tơdroăng tơniăn. Tâng ôh tá mơhnhôk ivá dêi kuăn pơlê mê gá xơpá khât. Kal athế mơhnhôk, pơkâ môi tiah lâi vâ pêi klêi tơdroăng mê. Klâ xoăng hnoăng pơkuâ la mâu hlá mơ-éa liăn ngân xuân kal. Tâi tâng hnoăng tâi mê gá kô hía liăn ngân, hía hnoăng cheăng gum kuăn pơlê”.

Tơpui a Luât Tơrŭm Chin phuh ‘mâi pơhlêh, pôa Trần Thanh Mẫn, kăn xiâm hnê ngăn Kuô̆k hô̆i tối nhên túa tơmiât klâ xoăng râ rơdêi ăm Chin phuh vâ Chin phuh pơkâ tiô tơdroăng ki ai khât cho tơdroăng vâ tŏng gum mâu tíu ki xơpá, tro mơdât vâ pro phuâng mâu liăn ngân mơnhông tơniăn. La mâu tơdroăng hiăng châ pêi pro khât séa ngăn mơnhên mê tŏng gum tơdrêng hlối. Ƀă tơdroăng mê, Kăn xiâm hnê ngăn Kuô̆k hô̆i pơkâ thế, vâ rak vế tơniăn tơtro ƀă mâu pơkâ dêi Luât.

“Ƀă Luât tơrŭm khu kăn pơkuâ kong pơlê ki ‘mâi pơhlêh kô klâ axoăng râ rơdêi tâ ăm khu kăn pơkuâ kong pơlê tiô túa pơkâ, kong pơlê pơkâ, kong pơlê pêi, kong pơlê pôu râng hnoăng. Nôkố Kuô̆k hô̆i hiăng pơhlêh nếo túa tơmiât pêi Luât mê cho Kuô̆k hô̆i pơcháu hnoăng rơdêi tâ ăm Vi ƀan pơkuâ Kuô̆k hô̆i. Xua mâu troăng hơlâ tŏng gum dêi Vi ƀan pơkuâ Kuô̆k hô̆i cheăng rơkê tơƀrê tâ vâ pơkâ tơleăng mâu tơdroăng kal pêi tơdrêng. Ƀă Kuô̆k hô̆i tung la ngiâ ah ôh tá pơkuâ inâi tơdroăng ‘no liăn cheăng, tá Chin phuh xuân ôh tá pơkuâ vâ pơkâ troăng pơkâ pâ – ăm”.

Môi tung mâu tơdroăng pơkâ klâ xoăng hnoăng cho rak tơniăn Ngế pro xiâm hnê ngăn Chin phuh “ôh tá pơkâ mâu tơdroăng pơcháu nhên ối tung hnoăng pơkuâ dêi Ngế xiâm pơkuâ, kăn pơkuâ mâu kơ koan tơdâng khu xiâm ƀă cho ngế tơrŭm Chin phuh ƀă kơvâ cheăng ki châ klâ xoăng pơkuâ”. Pôa Nguyễn Minh Đức, ngế ki lo ing Pơlê kong kân Hồ Chí Minh pơkâ thế: Athế pơkâ nhên tơdroăng ki xoăng hnoăng pơkuâ, pơkâ thế pơkuâ, xoăng râ pơkuâ ngăn sap ing Ngế pro xiâm hnê ngăn Chin phuh tá troh mâu khu xiâm, kơvâ cheăng.

“Pơkâ thế ăm pơla Ngế pro xiâm hnê ngăn Chin phuh ƀă Ngế xiâm pơkuâ lơ Ngế ki pơkuâ mâu kơ koan mê pơkâ thế ăm mâu tơdroăng kal ki lâi? Pơkâ ăm Kăn hnê ngăn Vi ƀan hnê kong pơlê lơ pơlê kong kân ối tung Tơnêi têa pơkâ ăm hnoăng mâu tơdroăng kal ki lâi? Tung kố kal athế ai pơkâ troăng tơmiât vâ xo ah hmôi ai pơkâ hnê mơhno nhên. Tâng ôh tá ai tơdroăng sap ing ton nah hmâ kong pơlê athế ai hlá mơ-éa pâ, ai rơkong tơpui xua ôh tá nhên”.

Mâu kăn tối tiah kố, lâp tơnêi têa dế pêi pro rôh kăch măng tung khu tơrŭm kơ koan Tơnêi têa, ƀă hâi khế pêi pro rĕng, xua mê kal khât athế pơkâ tơdrêng Tơdroăng pơkâ ‘na tŏng gum mâu tơdroăng ki ai tơdjâk troh xing xoăng tơkŭm kơ koan cheăng tơnêi têa, vâ pêi pro luât xing xoăng kơ koan cheăng tơnêi têa dêi mâu kơ koan tơnêi têa a Tíu xiâm ƀă a kong pơlê.