Luât ai 5 chương, 32 troăng, kô châ xêt khât sap ing hâi lơ 1/3 la ngiâ. Pơchuât tơbleăng tơmâng xo, pôa Hoàng Thanh Tùng, Ngế cheăng tung Vi ƀan pơkuâ Kuô̆k hô̆i ăm ‘nâi, klêi kơ’nâi tơmâng mâu rơkong veăng tơpui dêi mâu kăn Kuô̆k hô̆i ‘na rak tơniăn tơdroăng ki môi tuăn dêi tơdroăng tơkêa kơxop hlá mơ-éa luât tro ƀă tơdroăng ki pơkuâ ngăn luât ƀă rak tơniăn tơdroăng ki xoăng râ, xoăng hnoăng athế tro ƀă tơdroăng pơkuâ ngăn hnoăng ƀă mơdât tơdroăng ki pro pơxúa ing hnoăng pơkuâ, Vi ƀan pơkuâ hiăng ‘mot tơ’nôm mâu troăng hơlâ luât, troăng tŏng gum ki nếo tung kơxop hlá mơéa.

Tiô pôa Hoàng Thanh Tùng, mâu troăng pơkâ tŏng gum ki nếo tối a kơpêng châ ‘mot tơ’nôm vâ pơhlêh nếo rơdêi troăng klâ xoăng hnoăng pơkuâ, xoăng râ, pơkâ ăm hnoăng pơkuâ vâ pêi pro troăng hơlâ dêi Đảng ‘na mơdêk rơdêi xoăng râ, xoăng hnoăng, thăm mơnhông hnoăng cheăng pôu râng dêi ngế ối a ko.

Pakĭng mê, mơnhông tơdroăng ki hbrâ rơnáu hdrối, tơmiât pêi rơkê, khên tơmiât khên pêi, khên pôu râng dêi hnoăng dêi mâu kơ koan ki kal dêi kơ koan tơnêi têa, teăm tŏng gum mâu tơdroăng ki pá ‘na troăng pơkâ tŏng gum, ‘na hlá mơ-éa, pro tơ’lêi hlâu mâu kơxô̆ liăn ăm mơjiâng, hbrâ rơnáu ví ƀă kong prâi pro pơhlêh dêi tơdroăng tung tơnêi têa ƀă kong têa ê, xua ki xiâm cho mơnhông, mơdêk tơdjuôm dêi tơnêi têa, tơdrêng amê hlối rak tơniăn tơdâng ƀă tơdroăng ki xiâm tơmâng xo, ‘mâi rơnêu tung kơxop hlá mơ-éa Luât tơrŭm khu kăn pơkuâ kong pơlê ki ‘mâi pơhlêh.