Hâi lơ 13/1, pơchuât tơbleăng tơdroăng kal a Rôh hôp lâp tơnêi têa ‘na mơnhông tơƀrê khoa hok, kong ngê̆, pơhlêh nếo tơmiât rơkê ƀă pơhlêh kơxô̆ tơnêi têa, pôa Trần Thanh Mẫn, Ngế cheăng tung tíu xiâm Kal kí, Kăn xiâm hnê ngăn Kuô̆k hô̆i tối rơdêi pơtối tơrŭm séa ngăn, mơgêi, mơnhên tối tơdroăng ki pêi pro troăng hơlâ luâ; môi tuăn ki hlê plĕng ‘na tơdroăng cheăng “ăm troăng hơlâ chiâng ki tơƀrê ‘na tơbriât”.

Tung tơdroăng mê, Kuô̆k hô̆i kô tơkŭm tung mâu tơdroăng cheăng, troăng hơlâ pơkâ pêi ki kal môi tiah mơdêk ki hlê plĕng, mơnhông tơƀrê ‘na pơhlêh nếo túa tơmiât ‘na tíu pêi cheăng, tơdroăng cheăng dêi khoa hok, kong ngê̆, pơhlêh nếo tơmiât rơkê, pơhlêh kơxô̆. Hâi lơ 10/01/2025, Đảng đoân Kuô̆k hô̆i hiăng pơkâ túa pêi pro kơxô̆ 3260 vâ pêi Tơdroăng pơkâ, tung mê tối nhên tơdroăng ki vâ pêi, tơdroăng pơkâ pêi, xoăng nhên tơdroăng cheăng, tơdroăng ki mơnhông nhên ƀă tơkŭm tơbleăng pêi ƀă hiâm mơno rĕng, khŏm mơ-eăm má môi; pơkâ nhên tơdroăng cheăng pôu râng dêi ngế ối a ko, kăn ƀô̆, kong chưk, viên chưk, ngế pêi cheăng; mơnhên tối tơƀrê tơdroăng cheăng ki ai tơdjâk troh, tơdroăng cheăng pôu râng; mơnhông hiâm mơno pơhlêh nếo, tơmiât rơkê, djâ troăng ahdrối, khên tơmiât, khên pêi, khên pôu râng.

“Malối, cho a Rôh hôp mơgêi dêi Chin phuh hơnăm 2024 pơla kố nah, pôa Tô Lâm, Kăn xiâm pơkuâ hnê ngăn Đảng pơtối tối nhên: troăng hơlâ luât kal châ chêh pro klêi, vâ rêm tơdroăng ki kal bu pơkâ a môi luât xo. Pơkuâ tiô tơdroăng ki tơƀrê, kal tah lôi mâu troăng ki pâ ăm ƀă tŏng gum tâi; pơhlêh nếo xoăng liăn ngân ngăn tung tơdroăng ki pêi tơƀrê, pơhlêh ing liăn séa ngăn chiâng klêi kơ’nâi séa ngăn. Troăng pơkuâ ngăn khoa hok athế pro chiâng ivá pơhlêh nếo, tơmiât rơkê môi tiah tơdroăng pơkâ “khoán 10” tung pêi chiâk pêi deăng”.

Tung tơdroăng ki Chin phuh pơtroh ƀă pêi pro Tơdroăng mơjiâng luât, luât pơkâ, Kuô̆k hô̆i kô ăm rơkong tơpui, séa ngăn tơbleăng mâu tơdroăng tơkêa Luât tung 06 kơvâ cheăng ki kal: ‘Na khoa hok, kong ngê̆, pơhlêh nếo tơmiât rơkê, kŏng ngê̆ kơxô̆: pêi pro klêi 8 Luât. ‘Na ‘no liăn cheăng ƀă liăn ngân: séa ngăn, pêi pro klêi 12 Luât: ‘Na khu tơrŭm kơ koan cheăng tơnêi têa, kăn ƀô̆, kong chưk, hnê hriâm, hnê cheăng, hnê mâu ngế cheăng: séa ngăn, ‘mêng rơnêu, pro klêi 11 Luât.

‘Na khu mơdró kâ, tê mơdró: séa ngăn, pro klêi 3 Luât. ‘Na rak vế tơniăn gâk kring, tơniăn a hbo plêng, tơdroăng kong prâi kơxô̆, séa ngăn pro klêi 3 Luât. ‘Na pơhlêh kơxô̆, xúa khoa hok, kong ngê̆, pơhlêh nếo tơmiât rơkê: pro klêi troăng hơlâ luât vâ mơdêk rơdêi mơjiâng pro, pơkuâ Kuô̆k hô̆i kơxô̆, Chin phuh kơxô̆, khu kăn pơkuâ kơxô̆. Pakĭng mê, pơtối séa ngăn, mơjiâng pro nếo mâu hlá mơ-éa luât ki ê ki tơdjâk troh. Tung tơdroăng mê, tiô pôa Trần Thanh Mẫn, Kăn xiâm hnê ngăn Kuô̆k hô̆i tối:

“Ki hdrối tâ cho kal rĕng tơrŭm hbrâ, kơhnâ tơbleăng Tơdroăng mơjiâng pro luât, luât pơkâ hơnăm 2025. Pơkâ thế Khu pơkuâ tơdroăng cheăng Đảng, Chin phuh, mâu khu xiâm kơvâ cheăng: tơtrŏng troh tơdroăng tơkŭm mơnhên tối, mơgêi pêi pro, séa ngăn, pâ thế ‘mêi pơhlêh, ‘mot tơ’nôm, mơjiâng pro nếo luât tung kơvâ khoa hok, kŏng ngê̆, pơhlêh nếo tơmiât rơkê, pơhlêh kơxô̆ kal rơkê plĕng, tơƀrê tiô pơkâ”.

Ƀă Hô̆i đong hnê ngăn kong pơlê rêm râ, ngăn tung tơdroăng ki ai khât, tơrŭm pơkâ troăng hơlâ tŏng gum tiô pơkâ vâ mơhnhôk, mơdêk hriăn plĕng khoa hok, kong ngê̆, pơhlêh nếo tơmiât rơkê, pơhlêh kơxô̆, mơdêk ki tơƀrê dêi tơdroăng cheăng, xêt, tơƀrê tơdroăng cheăng dêi mâu kơ koan tơnêi têa, khu mơdró kâ, khu tơrŭm, mâu ngế krê a kong pơlê.

Pôa Trần Thanh Mẫn, Kăn xiâm hnê ngăn Kuô̆k hô̆i tối tiah kố, ki khât dêi tơnêi têa dế pơkâ mơ’no mâu tơdroăng kal pêi pro tơdrêng kal pơkâ tơleăng, Kuăn pơlê dế tơkôm ƀă loi tơngah khât tung mâu tơdroăng pơkâ dêi Đảng, Tơnêi têa. Tung tơdroăng mê, Kuô̆k hô̆i kô pơtối pơhlêh nếo rơdêi, mơdêk ki rơkê plĕng, tơƀrê dêi tơdroăng cheăng, môi tiah rơkong tơpui dêi pôa Tô Lâm, Kăn xiâm pơkuâ hnê ngăn cheăng Đảng a Rôh hôp mơgêi tơdroăng cheăng hơnăm 2024, tơbleăng tơdroăng cheăng pêi hơnăm 2025 dêi Chin phuh ƀă khu kăn pơkuâ kong pơlê cho: dế nôkố tơnêi têa hiăng ai tŭm ivá, ai tŭm hiâm mơno ƀă khŏm mơ-eăm vâ mot tung chal ki mơeăm dêi tơná mơnhông kro dêi hdroâng mơngế; mâu rôh ki tơ’lêi hlâu mê dế troh ƀă pin athế teăm pêi tơdrêng, xua tâng ăm gá tơkâ luâ, mê pin kô ai xôi ƀă tơdroăng ton ƀă kuăn pơlê.