Ƀă tơdroăng veăng tơmâng khât dêi khu cheăng kal kí ƀă kuăn pơlê rơtế môi tuăn ‘no ivá  tơrŭm dêi rơpó, kong pơlê Lâm Đồng hiăng xut tah lối 1.000 toăng hngêi pơtân, hngêi xi kơchoh tung kong pơlê, tơ’mô ƀă lối 50% pơkâ.

Mâu hâi apoăng hơnăm 2025, rơpŏng hngêi nâ K’Uyên (kuăn ngo K’Ho) ối a thôn 3, cheăm Đinh Trang Thượng, tơring Di Linh, kong pơlê Lâm Đồng hâk phiu châ mot ối tung hngêi meăn pro lế lĕm, teăng hngêi xi kơchoh.

Hơnăm kố hía nah, lối 1.000 rơpŏng kơtiê, vâ chê kơtiê ai hngêi ối pơtân, hngêi xi kơchoh dêi kong pơlê Lâm Đòng hiăng châ kơjo gum liăn mơjiâng pro nếo ƀă ‘mâi rơnêu hngêi, tung mê ai 860 toăng hngêi châ mơjiâng pro nếo ƀă 178 toăng hngêi ‘mâi rơnêu, ƀă tâi tâng kơxô̆ liăn vâ pro mâu pro hngêi lối 47 rơtal liăn.

Kơxô̆ liăn mê xo ing “Liăn ‘măn kơdĭng gum mâu ngế kơtiê” xua Vi ƀan Măt trâ̆n tơnêi têa Việt Nam kong pơlê Lâm Đồng xo ing khu pú hên, mơngế, tíu pêi cheăng, khu mơdró tung kong pơlê veăng tơlo.

-Khu hnê mơhno tơbleăng thế ‘nhiê tah hngêi tơ’nhiê, hngêi xi kơchoh kong pơlê Gia Lai khŏm pêi klêi tơdroăng pơkâ ‘nhiê tah 8.485 toăng hngêi ki hiăng tơ’nhiê, hngêi hiăng xi kơcho tung 6 khế apoăng hơnăm 2025. Tung lâp kong pơlê Gia Lai ai 8.485 rơpŏng kal châ gum ăm hngêi ối, tung mê pro nếo 6.828 toăng ƀă ‘mêng hngêi ki ton cho 1.657 toăng ƀă tâi tâng kơxô̆ liăn ‘no tiô tối hdrối cho 460 rơtal.

Tung mê, kơxô̆ liăn ing Tơnêi têa gum 241 rơtal. Nôkố mâu tơring cheăm a kong pơlê Gia Lai dế tơkŭm kơjo pro ăm mâu ngế ki ai hnoăng ƀă mâu rơpŏng kơtiê, tơdrêng amê hlối mơhnhôk veăng tơlo tơ’nôm ing pơlê pơla ƀă khu lêng kring vế vâ rak vế tŭm kơlo pơkâ tŏng gum pro hngêi. Pôa Hồ Văn Niên, kăn pơkuâ ngăn Đảng Gia Lai pơkâ thế mâu tơring cheăm tối nhên rêm tơdroăng cheăng, hâi khế vâ pêi pro klêi hâi khế pơkâ tơdroăng ki ‘nhiê tah hngêi tơ’nhiê xi kơcho, mơhno ivá khŏm mơeăm dêi kong pơlê tung tơdroăng tŏng gum kuăn pơlê pơhlêh tơdroăng rêh ối.