Troh nôkố, Hngêi trung Phôh thong hnê Kuăn ngo ai tíu kâ koi ối pơtê péa râ má môi ƀă má péa a cheăm Thuận An hiăng pro klêi dâng 80% tơdroăng cheăng. Ngế pơkuâ mơjiâng pro tơhrâ kô pro klêi, ăm ngăn hdrối hâi lơ 30/8. Tung pơla mê, hngêi trung a cheăm Quảng Trực pêi dâng 67% tơdroăng cheăng. Tơdroăng pro hrá xua iâ mơngế pêi ƀă tơdroăng mơjiâng pro hlối a kơpong tơkăng kong.

Vâ tơniăn péa toăng hngêi trung mê teăm ăm hok tro mot hriâm tung hơnăm nếo kố, pôa Hồ Văn Mười, Kăn hnê ngăn Vi ƀan kuăn pơlê kong pơlê Lâm Đồng pơkâ thế mâu tíu pêi cheăng tăng hên mơngế veăng pêi, pêi ôh tá pơtê, pêi tá kơmăng, tâk chôu phut cheăng, pêi nhên tro tiô tơdroăng cheăng pơkâ pêi tơrêm hâi, tơrêm chôu, mơ-eăm pê klêi ƀă pơcháu tŭm péa to hngêi trung mê hdrối hâi lơ 30/8.