Klêi lối môi hơnăm mơjiâng khu kăn pơkuâ 2 râ (cheăm ƀă kong pơlê), Lâm Đồng xuân ối ai hên tơdroăng tơvâ tung pơkuâ ngăn tơnêi. Lối chât rơpâu ha xuân tá hâi chêh túa pơkâ pêi tơmeăm tung kơdâm tơnêi cho bauxite, titan hlối ối tơdjuôm ƀă kơpong kuăn pơlê rêh ối, kơphô̆ ƀă kế tơmeăm mơjiâng pro cho troăng klông; lối rơpâu rơpŏng kuăn pơlê dế rêh ối a tơnêi pêt kong lơ ối a mâu kơpong ki tá hâi châ pơkâ tíu vâ pro pơlê ăm kuăn pơlê ối. Hên ƀăng tơnêi pêi chiâk deăng ối tơxup ƀă khu ki pêi chiâk deăng, pêt kong.

Pôa Bon Yô Soan, Phŏ Hnê ngăn Vi ƀan Măt trâ̆n Tơnêi têa Việt Nam kong pơlê Lâm Đồng ăm ‘nâi, Luât Tơnêi tơníu hơnăm 2024 ƀă mâu hlá mơ-éa hnê mơhno hiăng pro pơhlêh kơhnâ, la tung pơla pêi pro xuân ối ai tơdroăng ki tá hâi chêh pro klêi ôh tá tro luât ƀă túa ki xúa tá hâi châ môi tuăn, malối cho ƀă kơvâ ki tá hâi pêi pro klêi sap ing hdrối nah:

“Kuăn pơlê púi rơhêng vâ Kuô̆k hô̆i, Chin phuh ƀă mâu Khu xiâm, kơvâ cheăng Tơnêi têa pơtối séa ngăn, chêh pro klêi mâu tơdroăng pơkâ dêi luât ‘na tơnêi tơníu tiô troăng pêi pro nhên, môi tuăn, tơ’lêi xúa, tơdrêng amê hlối ai troăng tŏng gum ƀă mâu ngế ai tơdroăng pơkâ tơleăng pro ton ví pôi tá ăm ai pơsăm tối, pơsăm tơkêng, rak tơniăn hnoăng pơxúa tro luât, tơxâng ăm kuăn pơlê”.

Séa ngăn Hneăng hôp ôh tâ xê tiah hmâ rôh má môi, Kuô̆k hô̆i hneăng XVI, kuăn pơlê kong pơlê Lâm Đồng tối rơhêng vâ troăng hơlâ tŏng gum ‘mâi rơnêu Luât tơnêi tơníu hơnăm 2024 dêi Kuô̆k hô̆i ƀă Chin phuh kô pro tơ’lêi hlâu ‘na liăn ngân xúa ăm kơvâ tơnêi ăm chal mơnhông nếo.

Ƀă yă tơnêi, teăng mâ kăn pơkuâ ƀă kơ koan cheăng kong pơlê Lâm Đồng pâ thế Tơnêi têa môi tuăn troăng pơkuâ, tơmiât pro môi yă pơkâ ki tơdrăng. Rơtế amê, kal chêh pro klêi tíu chêh ‘măn tơdroăng kal ‘na tơnêi tơníu tơbleăng tơdrăng, pro tơ’lêi hlâu ăm mâu rôh ki vâ tê roê, pơtó hnoăng rak xúa tơnêi ƀă kơdroh tơdroăng ki pro pá tung pơkuâ ngăn.

Pôa Lê Trọng Yên, Phŏ kăn hnê ngăn Vi ƀan kong pơlê Lâm Đồng tối rơkong pâ thế ‘na troăng hơlâ xo tơvêh tơnêi ai hâi khế ƀă mâu tơdroăng tơkêa bro, malối cho tơdroăng tơkêa chiâ xo tơmeăm tung kơdâm tơnêi.

 “Mâu tơdroăng tơkêa ‘na chiâ xo tơmeăm tung kơdâm tơnêi ki pin xo tơvêh hlô̆ng hlối mê gá pá khât. Xua kuăn pơlê hiăng xo tơvêh tơnêi mê pin athế ai tơdroăng tŏng gum rêh kâ ối ăm kuăn pơlê mê tiah lâi pin ôh tá ai troăng hơlâ tŏng gum ‘na xo tơvêh tơnêi tiô pơkâ hơnăm. Tơdroăng ki ‘mâi rơnêu Luât tơnêi tơníu ki tro xo tơvêh pơkâ tiô hơnăm kô kơdroh kơxô̆ liăn chêl thiê̆n tŏng gum tíu ối ƀă kơdroh kơxô̆ liăn ‘no roê ‘mot ‘na yă dêi alumin”.