Drêng khoa hok kŏng ngê̆ ƀă pơhlêh kơxô̆ ôh ti xê cho tơdroăng ki hngế hngo xếo, mê hiăng chiâng kế tơmeăm xúa ki xiâm, hên vâi kơdrâi hdroâng kuăn ngo hiăng rơkê plĕng xúa tung tơdroăng ki tơ’lêi hlâu kố. Ƀă tơdroăng ki tơmiât pêi rơkê, vâi ôh ti xê to pro kro ăm rơpŏng hngêi mê ối pro tơdjâk ki kơnía ‘na túa lĕm tro dêi hdroâng kuăn ngo tơná, veăng gum pro pơhlêh mâu tơdroăng pơkâ pêi dêi tơdroăng tơkêa 8 “pêi pro tơdâng tơ’mô kơnốu kơdrâi ƀă tŏng gum mâu tơdroăng kal pêi tơdrêng ăm vâi kơdrâi ƀă vâi hdrêng” ối tung tơdroăng tơnêi têa pơkâ pêi mơnhông cheăng kâ rêh ối pơlê pơla kơpong hdroâng kuăn ƀă kong kế.

Môi tung mâu tơdroăng ki hnê tối mê cho tơdroăng dêi Khà Thị Hạnh, ngế droh hdroâng kuăn ngo Thái lo ing Lai Châu. Xông kân a kơpong kong a’ngêi, Hạnh hlê nhên ki kơnía dêi mâu nhâ loăng pơkeăng ki chiâng tâ tá tơná. Hlo y học cổ truyền dế rế hía rế iâ vâi ‘nâi troh, nâ khŏm mơ-eăm hriâm a Hngêi trung Y Dược Lê Hữu Trác. Ƀă tơdroăng hlê plĕng hên, Hạnh ôh ti ‘nâi nhên mâu pơkeăng ton nah mê ối ‘nâi túa ki xúa khoa hok vâ pro ăm mâu pơkeăng kố ing hlá nhâ pơkeăng chiâng hmâ ƀă tơ’lêi tâ.

Xúa ivá rơdêi tơdjâk dêi TikTok, Khà Thị Hạnh hiăng pro kênh “Tây Bắc TV”. Mâu video ki cho ki khât xup xo tung pơla tí tăng, kêi xo, têng pro uâ pơliê pơkeăng rơtế ƀă mâu tơdroăng ki hnê tối tơ’lêi hlâu ‘na ki pơxúa hiăng tơ’mot hên ngế ngăn, gum pơkeăng Tây Bắc troh a chê tâ ƀă rêm ngế.

“Drêng pro kênh online Tây Bắc TV mê apoăng ngin pro môi kênh hdrối. Klêi mê, ngin hiăng ai tíu ối dêi tơná ƀă tê châ hên mâu tơmeăm pêi lo ing chiâk deăng, pơkeăng. Á hlo tiah kố, tâng bu pro môi ngế ngin pro chiâng la mâu vâi krâ kuăn pơlê ki ê gá tiah lâi? Tiah mê, ngin hiăng pro tơ’nôm hên kênh ƀă hnê mơhno ăm hên ngế nâ o a kơpong hngế hngo xuân môi tiah ngế ki pơkuâ OCOP vâ ‘nâi pro tiah lâi vâ ăm tơmeăm dêi tơná châ tê online”.

Apoăng, Khà Thị Hạnh bu tối ‘na túa ki tơná hlê. La mâu tơdroăng ki vêh tơbleăng hâk vâ ing tơmối, mâu tơdroăng ‘na mâu kế tơmeăm dêi tơná gum rêm ngế mo sêi tâ hiăng pro tơ’nôm ivá ăm nâ. Hạnh tối tiah kố:

“Á hlo kuăn mơngế pơhlêh, pơlê pơla pơhlêh. Tâng khu mơdró kâ pin ôh ti kâi pơhlêh tơkêa vâ tối pin kô chiâng hrá. Luâ tâ mê nếo Lai Châu cho môi kơpong ai hên mâu tơmeăm pêi lo ing chiâk deăng, malối cho pơkeăng kơnía. La tâng bu kơnôm to a tơmối ôm hyô troh a tíu mê gá xơpá khât, tơdroăng ki tê tơmeăm gá chiâng hrá. Ƀă á hlo tơmối vâi dế ngăn online hên tâ mê tơmối ối a lâi mê pin athế ối a mê”.

Kơpong hdroâng kuăn ngo ƀă kong ngo cho tíu rêh ối cheăng kâ dêi lối 14,6 rơtuh ngế, châ vâ chê 15% pơ’leăng mâ mơngế tung lâp tơnêi têa, ƀă kơxô̆ rơpŏng kơtiê vâ chê 22%, hên to lâi xôh tâng pơchông ƀă pơkâ tơdjuôm lâp tơnêi têa. Vâi kơdrâi hdroâng kuăn ngo cho khu ki tro tơdjâk pá má môi sap ing tơdroăng pôu râng kơklêa kơtiê. Tơ’nôm amê, kơtăn kơxô̆ xuân ối nhên: kơxô̆ hdroâng kuăn ngo xúa internet ƀă ‘nâi xúa kơmăi tĭnh ối iâ tâng pơchông ƀă pơkâ tơdjuôm, chiâng pro pá ‘na tơdroăng ki châ xúa rôh tơ’lêi hlâu sap ing cheăng kâ kơxô̆.

Laga, tung tơdroăng pơloăng mơnúa đi đo ai tơdroăng ki tơ’lêi hlâu. Vâi kơdrâi hdroâng kuăn ngo cho mâu ngế ki rak vế ki hlê plĕng a pơlê cheăm ki kơnía git, cho ngế ki pơkuâ dêi tơmeăm pêi lo ing chiâk deăng xiâm, tơmeăm pro ƀă loăng ki lĕm. Kố cho mâu tơmeăm ki lĕm tro, cho “tíu ki ai mêa” tâng châ pêi pro tro tơdroăng tung cheăng kâ nếo. Tơdroăng dêi Khà Thị Hạnh cho mơhno tơdroăng lĕm tro ăm tơdroăng ki môi ngế kơdrâi hdroâng kuăn ngo chiâng vâ tơdjêp ton nah ƀă nôkố vâ pro djâ ki pơxúa ăm pơlê pơla. Sap ing tơdroăng ki tơná pro pơkuâ kênh “Tây Bắc TV” ƀă tê mâu tơmeăm pêi lo ing chiâk deăng, pơkeăng, nâ ối hbrâ rơnáu pro tơ’nôm hên kênh ki ê, hnê ăm hên ngế nâ o kơpong hngế hngo ƀă mâu ngế ki pơkuâ OCOP túa ki tê tơmeăm online.

Hlê plĕng nhên mâu tơdroăng ki pơloăng mơnúa ƀă rôh tơ’lêi hlâu kố, Chin phuh hiăng pêi pro kơtăng. Tơdroăng tơkêa 8 tung Tơdroăng tơnêi têa pơkâ pêi cho môi tơdroăng mơhno nhên. Jâ Nguyễn Thị Tuyến, Kăn hnê ngăn vâi kơdrâi Việt Nam tối rơdêi: “Pơkâ pêi dêi tơdroăng tơkêa 8 cho mơdêk hlê plĕng, pơhlêh túa tơpui, tơmiât, rak ngăn tơdroăng rêh ối, hiâm mơno, rak vế rak ngăn vâi kơdrâi ƀă vâi hdrêng, pêi pro tơdroăng pơkâ tơdâng tơ’mô kơnốu ƀă kơdrâi ƀă mơnhông hnoăng cheăng dêi vâi kơdrâi tung mơnhông cheăng kâ rêh ối pơlê pơla.