Hơnăm hriâm nếo kố, Y Hiển Nhi, kuăn kơdrâi dêi ngoh A Trang, ối a pơlê KRam, cheăm Rờ Kơi, kong pơlê Quảng Ngãi mot hriâm lâm 1B Hngêi trung phôh thong ai tíu kâ koi ối pơtê tơdjêp râ má môi – râ má péa cheăm Rờ Kơi. Pơla péa măng tĭng hdrối, hâi ki lâi muăn xuân troh hngêi trung vâ hmâ ƀă hngêi trung ki nếo. Mâu hâi apoăng ối tơvâ tơvân, châ cô hnê mơhno, Y Hiển Nhi rế hmâ ƀă hngêi trung ki nếo.

On veăng ngoh A Trang, pêi chiâk, plâ hâi ối a chiâk xua mê tơdroăng chơ djâ dêi kuăn xuân cho môi tơdroăng ki tô tuăn. Hơnăm hriâm nếo kố, ngoh A Trang hmiân tuăn tâ drêng Hngêi trung râ má môi - râ má péa cheăm Rờ Kơi tơkŭm po hngêi trung ai tíu kâ koi ối pơtê, hngêi trung ai tíu kâ koi ối pơtê mê tơdroăng hriâm tâp, rêh ối ƀă chơ djâ dêi kuăn kô tơ'lêi hlâu tâ:

“Akố kuăn pơlê lăm pêi cheăng plâ hâi tơbrêi tơbrêh, hên drêng 'nâ ôh tá ai chôu vâ chơ djâ dêi kuăn. Tâng châ ối a hngêi trung mê gá tơ'lêi hlâu ăm nôu pâ, xua tơdroăng cheăng akố tâi tâng pêi cheăng ƀă kŏng, plâ hâi lăm pêi cheăng hơngế ing hngêi, ôh tá châ lăm xo dêi kuăn. Nôu pâ xuân phiu ro drêng mâu vâi o troh a hngêi trung châ tơniăn, bo cheăng kơnâng krúa lĕm. Tơnêi têa tŏng kum kơpong tơkăng kong tiah kố, nôu pâ ro khât. Xuân pói vâ la ngiâ ah mâu kuăn 'nĕng kô mơ-eăm hriâm, athế hriâm rơkê khât".

Hơnăm hriâm 2026-2027, Hngêi trung phôh thong ai tíu kâ koi ối pơtê tơdjêp râ má môi - râ má péa cheăm Rờ Kơi ai 1.156 ngế hok tro, châ xing xoăng 34 to lâm, mê cho 20 to lâm râ má môi ƀă 14 to lâm râ má péa. Mâu troăng hơlâ 'na kâ koi ối pơtê, tơdroăng rêh ối, gâk kring tơniăn, hbrâ mơdât on chếo, tơpâ on chếo ƀă rak tơniăn krúa lĕm kế kâ châ hbrâ rơnáu hdrối. Hngêi trung xuân tơkŭm po hnê hriâm ăm kăn ƀô̆, thái cô, mâu ngế pêi cheăng 'na pơkuâ, rak ngăn hok tro ki kâ koi ối pơtê, ối pơtân.

Hngêi trung phôh thong ai tíu kâ koi ối pơtê tơdjêp râ má môi - râ má péa cheăm Mô Rai dế tung pơla pro hiăng klêi, tá hâi chiâng xúa rôh pơxiâm mot hơnăm hriâm nếo. Cheăm mơhnhôk tá khu pơkuâ tơdroăng kal kí ƀă mâu khu lêng kuăn pơlê, Mố đô̆i gâk tơkăng kong ƀă Kŏng ti 78, Ƀinh đoân 15, tŏng kum pro klêi mâu tơdroăng cheăng ki u ối. Rêm hâi ai dâng 30 ngế pêi cheăng veăng mơgrúa, tŏng kum mâu tơdroăng cheăng vâ rĕng pro klêi tiô pơkâ.

Xua hngêi trung nếo tá hâi chiâng vâ xúa tơdrêng hlối, hok tro râ má môi ƀă râ má péa ối hriâm a hngêi trung ki ton, rak tơniăn tơdroăng pơkâ tung hơnăm hriâm. Mâu lâm ki apoăng châ tơkŭm po tơdah hok tro rĕng tiô pơkâ. Pôa Trương Công Chính, Kăn pơkuâ hnê ngăn cheăng Đảng cheăm Mô Rai ăm 'nâi, troh nôkố, khu kăn ƀô̆ pơkuâ ƀă thái cô hngêi trung hiăng châ rah xo.

Tung hneăng má 1, kong pơlê Quảng Ngãi mơjiâng pro klêi 4 to hngêi trung phôh thong ai tíu kâ koi ối pơtê tơdjêp râ a mâu cheăm Dục Nông, Sa Loong, Rờ Kơi ƀă Mô Rai a hâi lơ 5/9/2026. Kơvâ ngăn hnê hriâm ƀă hnê mơjiâng tuăn ngôa rơkê kong pơlê Quảng Ngãi tơrŭm ƀă mâu tơring séa ngăn, xing xoăng kăn ƀô̆ pơkuâ, thái cô, mâu ngế pêi cheăng; pêi klêi tơdroăng rah xo hok tro, tơkŭm hnê hriâm, xing xoăng tíu kâ koi ối pơtê ƀă rak ngăn hok tro. Mâu kế tơmeăm hnê hriâm, hngêi pế pơchên hmê kơchâi, tíu 'măn kơxop mơ-éa, kơbong pêi cheăng… hbrâ rơnáu pêi cheăng tơniăn sap ing apoăng hơnăm hriâm.

Pôa Nguyễn Ngọc Thái, Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Quảng Ngãi tối ăm 'nâi, kong pơlê ai 9 to hngêi trung châ Tơnêi têa 'no liăn, mê cho 4 to hngêi trung tung hneăng má 1 ƀă 5 to hngêi trung tung hneăng má 2, tâi tâng kơxô̆ liăn 'no vâ chê 2.000 rơtal liăn:

"Kố cho troăng hơlâ ki tro hlối achê khât, ôh tá xê to pơxúa tung hriâm tâp mê ối tơdjâk troh tơdroăng gâk kring, tơniăn, kring vế Tơnêi têa, rak tơniăn tíu tơkăng kong. Khu pơkuâ hnê hriâm ƀă hnê mơjiâng tuăn ngôa rơkê kong pơlê Quảng Ngãi hiăng tí tăng 'nâi plĕng tối ăm Vi ƀan kong pơlê Quảng Ngãi mơhnhôk tâi tâng khu cheăng, mơdêk kơxô̆ mơngế pêi cheăng, mơ-eăm pêi pro mâu tơdroăng séa ngăn nếo mâu tơdroăng pơkâ ƀă ăm mot hriâm hơnăm nếo tro tiô troăng hơlâ dêi kong pơlê".

Sap ing Rờ Kơi troh Mô Rai, Sa Loong, Dục Nông, kong pơlê Quảng Ngãi, mâu hngêi trung nếo dế rế hía rế hlo ai a kơpong tơkăng kong, djâ tơvế tơdroăng phiu ro ƀă tơngah dêi hok tro, nôu pâ ƀă thái cô. Drêng vâi hdrêng châ hriâm tŭm, kuăn pơlê hmiân tuăn rak vế tơnêi, rak vế pơlê, mơnhông cheăng kâ, rak vế kơpong tơkăng kong dêi Tơnêi têa./.