Pôa Lê Quang Tùng, Kăn xiâm pơkuâ Bơrô cheăng Kuô̆k hô̆i tơbleăng pơchuât Kơxop hlá mơ-éa Pơkâ ‘na tơdroăng cheăng, hnoăng pơkuâ nhên ƀă mâu tơdroăng pơkâ pêi khu tơrŭm dêi Hô̆i đong hnê ngăn Hdroâng kuăn ngo, mâu Vi ƀan dêi Kuô̆k hô̆i. Tơpui ăm rơkong veăng hnê tối ‘na tơdroăng kố, pôa Trần Thanh Mẫn, Kăn xiâm hnê ngăn Kuô̆k hô̆i tơmâng xo, mơnhên tối khât Khu chêh pro kơxop hlá mơ-éa hiăng rĕng tơbleăng kơhnâ tung tơdroăng mơjiâng, pêi pro klêi hồ sơ Pơkâ vâ pơtroh ăm Vi ƀan pơkuâ Kuô̆k hô̆i ngăn ăm rơkong tơpui. Tơdroăng ki pêi pro klêi, ‘mêng rơnêu mâu tơdroăng pơkâ kô veăng gum mơdêk xêt tơƀrê, tung khu tơrŭm ƀă pêi cheăng dêi mâu kơ koan dêi Kuô̆k hô̆i.

Tiô kăn xiâm hnê ngăn Kuô̆k hô̆i Pơkâ kal séa ngăn kơtăng mâu kơvâ cheăng ki ai tơdjâk troh ki xiâm dêi Hô̆i đong Hdroâng kuăn ngo, mâu Vi ƀan dêi Kuô̆k hô̆i châ pơkâ a Luât ‘mâi pơhlêh, ‘mot tơ’nôm mâu tơdroăng dêi Luât Tơrŭm Kuô̆k hô̆i; rak vế tơdroăng ki pơtó, tơdâng, môi tuăn ƀă tơ’mô pơla mâu kơ koan.

Kăn xiâm hnê ngăn Kuô̆k hô̆i hiăng môi tuăn ƀă mâu tơdroăng ki kal; tối tiah kố tung pơla tơkŭm pêi pro kô pơtối séa ngăn, mơnhên tối, pơkâ mơ’no ‘mâi pơhlêh; tơdrêng amê hlối rơhêng vâ tơdroăng pơkâ kố châ pơkâ tơdrêng hlối vâ pêi pro. Tối tơdroăng ki môi tuăn khât pơkâ ‘na troăng hơlâ tơkŭm po, tơdroăng pơkâ pêi cheăng dêi Hô̆i đong Hdroâng kuăn ngo, mâu Vi ƀan dêi Kuô̆k hô̆i, Kăn xiâm hnê ngăn Kuô̆k hô̆i tối tiah kố:

“ ’Na hnoăng cheăng, hnoăng pơkuâ nhên dêi Hô̆i đong hnê ngăn Hdroâng kuăn ngo, mâu Vi ƀan dêi Kuô̆k hô̆i, ki hdrối tâ, xuân ối pơtó ƀă tơdah xo môi tiah hmâ hnoăng cheăng, hnoăng pơkuâ dêi mâu kơ koan môi tiah hdrối vâ pêi pro klâ xoăng pơkâ hnoăng cheăng, hnoăng pơkuâ. Tơdroăng tơkŭm ‘mâi pơhlêh ki apoăng ai mâu kơvâ cheăng, mâu tơdroăng ki kal tơdroăng cheăng pơla mâu kơ koan vâ rak vế tơniăn tơdroăng ki pro tơdâng tơ’mô, tơniăn lĕm; pôi tá lôi chúa, bô bối ‘na kơvâ cheăng, hnoăng cheăng athế tro troăng hơlâ pơkâ. Vi ƀan pơkuâ Kuô̆k hô̆i môi tuăn troăng hơlâ tŏng gum, rêm kơ koan dêi Kuô̆k hô̆i tơkŭm séa ngăn mâu tơdroăng cheăng pêi ối tung hnoăng pơkuâ ai 02 – 03 Khu xiâm, kơvâ cheăng a tơnêi têa vâ rak vế tơdroăng ki tơdâng tơ’mô, tơniăn tro, ví tơkŭm tơdroăng cheăng a mâu kơ koan. Pơla hdrối kố nah, tơdroăng ki séa ngăn rế châ mơnhông, klăng, tro mâu tơdroăng kal pêi pro tơdrêng, châ kuăn pơlê kal vâ ‘nâi”.

Tung tơdroăng pơkuâ ngăn tơdroăng cheăng vâ pêi pro châ tơdroăng púi vâ pơkâ mơ’no, pơkâ kal mơnhên tối nhên tâ nếo pơla Khu kăn pơkuâ Hô̆i đong Hdroâng kuăn ngo, Vi ƀan, Kăn hnê ngăn Hô̆i đong Hdroâng kuăn ngo, ngế pơkuâ Vi ƀan ƀă Ƀơrô cheăng Kuô̆k hô̆i tung tơdroăng pơkuâ ngăn tơdroăng cheăng .

Kăn xiâm hnê ngăn Kuô̆k hô̆i pơkâ thế, nôkố, kal athế tơkŭm ăm tơdroăng ki pêi pro klêi mâu tơdroăng pơkâ ai tơdjâk troh troăng pơkâ khu tơrŭm, troăng tŏng gum pêi cheăng, tíu pêi cheăng gum tơdroăng cheăng, rak vế tơdroăng cheăng pêi, pôi tá tro pơtê tơdjâk troh tơdroăng pêi pro hnoăng cheăng, hnoăng pơkuâ dêi mâu kơ koan. Xua mê, mâu kơ koan ki tơdjâk troh rĕng chêh pro pơkâ mơ’no hlá mơ-éa pơkâ, pơkuâ ngăn mâu kăn pơkuâ cheăng kơ koan, tơdroăng cheăng dêi Hô̆i đong hdroâng kuăn ngo mâu Vi ƀan; rak vế pro tơ’lêi hlâu tơdroăng cheăng dêi Hô̆i đong hdroâng kuăn ngo, mâu Vi ƀan; ‘mâi pơhlêh, ‘mot tơ’nôm Pơkâ 22 dêi Vi ƀan pơkuâ Kuô̆k hô̆i ‘na kơvâ cheăng, hnoăng cheăng, hnoăng pơkuâ pơkâ khu tơrŭm dêi Ƀơrô cheăng Kuô̆k hô̆i.

Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế, Hô̆i đong Hdroâng kuăn ngo, mâu Vi ƀan, mâu Khu râ séa ngăn, tơmiât nhên ‘na hnoăng cheăng kăn ƀô̆ dêi tíu pêi cheăng tơná, pôi tá pro pá; rah xo kăn ƀô̆ a mâu kơvâ cheăng vâ gum Hô̆i đong hdroâng kuăn ngo, mâu Vi ƀan athế rak xo ngế chiâng pêi cheăng, khên pôu râng dêi tơdroăng cheăng, ngế ki rơkê, ai ivá ƀă malối cho athế ai hiâm mơno pơhlêh nếo.