Hâi rơpŏng ngoh K'Long Ha Juil, ối a thôn 6, cheăm Lạc Dương, kong pơlê Lâm Đồng mot ối tung hngêi nếo, lâp pơlê rơtế phiu ro. Kố cho rơpŏng má mơ'nui tung kơxô̆ 9 rơpŏng châ xut tah hngêi pơtân, mơhno tơdroăng ki lâp thôn ôh tá ai xếo hngêi pơtân. Tơdroăng rêh ối ton nah ôh tá bê kế tơmeăm, ngoh pá vâ châ kơdĭng liăn mơjiâng pro hngêi. Kơnôm troăng hơlâ tŏng kum xut tah hngêi pơtân dêi Tơnêi têa, rơpŏng 'no tơ'nôm dâng 250 rơtuh liăn, mơngế tung hdroâng hdrê veăng tơlo liăn, pơlê veăng kum hâi pêi cheăng, toăng hngêi kân rơdâ, krá kâk má mơ'nui xuân pro klêi.

“Mâu ngoh nâ o, nôu pâ, vâi krâ nhŏng o tung pơlê veăng kơjo gum, veăng gum tŭm kơxô̆ liăn mơjiâng pro môi toăng hngêi nếo, hiăng ai hngêi á hâk phiu ‘nâng, tơniăn tung rêh ối ƀă tơmâng to ‘na pêi cheăng kâ”.

A thôn 6, cheăm Lạc Dương, tíu ki vâ chê 100% kuăn pơlê tiô khôp, hiâm mơno tơrŭm, ‘na tŏng kum hiăng chiâng tơdroăng ki lĕm tung tơdroăng pêi pro rêh ối pơlê pơla. Ôh tá xê to kum dêi rơpó xut hngêi pơtân, ngế ki ai liăn ngân ối kum liăn, rơpŏng ki ôh tá ai mơngế pêi cheăng kô châ nhŏng o tung pơlê veăng kum hnoăng cheăng pêi, pêi juôm dêi rơpó tung pêi chiâk deăng. Pôa Lơ Mu Ha Djô Krâ pơlê, ngế ki châ kuăn pơlê loi nhuô̆m a thôn 6, cho môi tung mâu ngế ki veăng gum pro chiâng tơdroăng ki tơrŭm môi tiah mê. Ing mâu rôh hôp thôn ƀă mâu rôh trâm mâ rêm rơpŏng, pôa mơhnhôk kuăn pơlê mơ eăm kơhnâ pêi cheăng kâ, hơ'lêh hdrê pêt, kum dêi rơpó tơkâ luâ xơpá, tah lôi khôi túa tơlá ƀă rak vế tơniăn pơlê pơla. Ƀă pôa, rêh ối "lĕm ‘na châ ƀă pêi tơdroăng lĕm ‘na mơhúa”, lĕm tơdroăng rêh ối thế pơxiâm ing mâu tơdroăng ki ai khât.

“Xuân hnê tối ăm kuăn pơlê pro ti lâi vâ veăng gum ăm hmê, ếo, gum mâu rơpŏng ki kơklêa, va rơtế ƀă dêi rơpó ai tơdroăng rêh ối tơniăn lĕm tơdjuôm”.

Ôh tá xê to a Lạc Dương, a cheăm Sơn Điền, hên mâu krâ pơlê, Kăn hnê ngăn Chi ƀô̆ thôn, xuân kơhnâ mơhnhôk vâi krâ nhŏng o rêh ối "lĕm tung hiâm mơno, lĕm tung rêh ối tro tiô pâ xeăng hnê". Môi tiah a thôn Ka Sá, ƀă tơdroăng ki djâ troăng ahdrối dêi krâ pơlê, chi ƀô̆ ƀă khu pơkuâ ngăn thôn, vâi krâ nhŏng o hiăng kơhnâ hơ'lêh hdrê pêt, mơnăn păn, malối cho mơdêk pêt kơphế, tơdroăng rêh ối rế hía rế tơƀrê tâ. Ƀă krâ pơlê K'Lãng, pôa djâ troăng ahdrối vâi krâ nhŏng o thôn Ka Sá ôh tá xê to hnê tối, hôp tơpui tơno, mê ối djâ troăng ahdrối, ing rơpŏng hngêi tơná.

“Akố, krê vâi krâ nhŏng o ki achê mê pin lăm pôu rêm hngêi, ƀă ki tơdjuôm mê xuân ối hnê tối mơhnhôk ing mâu rôh hôp cho ki xiâm... Pin athế djâ troăng ahdrối. Ki hdrối tâ cho rơpŏng hngêi pin, rak vế khôi túa, vêa vong hdroâng kuăn ngo… pơtối hnê ăm kuăn 'nĕng cháu chái xo ah hmôi vâ pôi tá piu lôi khôi túa, vêa vong lĕm tro ".

Cheăm Sơn Điền ai lối 2.000 ngế ki tiô khôp Pâ Xeăng ƀă Tin Lành. Vâ mơdêk hnoăng cheăng dêi krâ pơlê, ngế ki châ kuăn pơlê loi tơngah ƀă mâu ngế ki tiô khôp, khu kăn pơkuâ cheăm đi đo tơrŭm hnê tối, mơhnhôk vâi krâ-nhŏng o mơnhông cheăng kâ, mơjiâng thôn pơlê nếo.

Achê kố, mâu khu tơrŭm tiô khôp tung cheăm môi tuăn ƀă tơdroăng pơkâ pêi pro túa rêh ối rơkê plĕng tung tơdroăng pơkoăng ŏng mế, mơdâm kiâ, leh mơdĭng. Tơring xuân pơkâ thế mâu ngế ki tiô khôp tơkŭm hnê tối, mơhnhôk kuăn pơlê tung mâu rôh hôp khôp rêm măng tĭng. Pôa Vũ Đức Nhuần, Kăn hnê ngăn Vi ƀan cheăm Sơn Điền mơnhên:

“Ngin hlo tiah kố, vâ châ tơ-ƀrê tiah mê hnoăng cheăng dêi mâu ƀok xối, yah chĭng cho kal khât. Ngin tối tiah kố tung pơla hdrối kố nah, hnoăng cheăng dêi mâu ƀok xối, yah chĭng cho kơhnâ khât... Tung la ngiâ ah, cheăm xuân kô pơtối mơdêk hnoăng cheăng kố dêi mâu ƀok xối, yah chĭng, vâ pro ti lâi ăm mâu ƀok xối, yah chĭng chiâng mâu ngế ki xiâm, mâu ngế ki hnê tối tung dế pơlê pơla, kum ăm vâi krâ-nhŏng o rế hía rế pêi pro tro hnoăng cheăng dêi tơná cho môi ngế kuăn pơlê ki kơhnâ rơkê dêi cheăm Sơn Điền".

Lâp kong pơlê Lâm Đồng nôkố ai vâ chê 900 ngế ki kuăn pơlê loi tơngah tung hdroâng kuăn ngo. Achê kuăn pơlê, hlê plĕng khôi túa ƀă châ kuăn pơlê loi tơngah, vâi cho kông tơdjêp pơla khu râ kăn pơkuâ ƀă kuăn pơlê, veăng kum mơhnhôk kuăn pơlê mơnhông cheăng kâ, rak vế khôi túa lĕm tro, tơrŭm môi tuăn.