Pêi pro hnê mơhno dêi Chin phuh ‘na tơdroăng tŏng gum rơpŏng kơtiê, vâ chê kơtiê ‘nhiê tah hngêi hiăng tơ’nhiê, xi kơchoh, mố đô̆i gâk tơkăng kong kong pơlê Kon Tum dế veăng gum ivá rơtế ƀă khu kăn pơkuâ ƀă mâu râ kong pơlê gum kuăn pơlê pro mâu toăng hngêi ƀă yă kơnâ tâ kơlo tŏng gum vâ ai tíu ối tơniăn ƀă lĕm tro tâ tíu tơkăng kong.

A 13 to cheăm tơkăng kong ối tung 4 tơring Đăk Glei, Ngọc Hồi, Sa Thầy ƀă Ia HDrai dêi kong pơlê pro nếo ƀă ‘mêng hngêi ki ton. Đăi tă Lê Minh Chính, Kăn pơkuâ ngăn Đảng lêng Mố đô̆i gâk tơkăng kong kong pơlê Kon Tum ăm ‘nâi, rơtế ƀă hnoăng tơnêi têa tŏng gum 60 rơtuh liăn tung môi toăng hngêi pro nếo ƀă 30 rơtuh liăn tung môi toăng ‘mêng hngêi ki ton, khu lêng mố đô̆i gâk tơkăng kong kong pơlê Kon Tum dế mơhnhôk thế veăng tơlo hên kơxô̆ liăn vâ tŏng gum tơ’nôm liăn ƀă hâi pêi cheăng vâ kuăn pơlê pro klêi mâu hngêi ki lĕm, krá tâ a tíu tơkăng kong.