Klêi kơ’nâi tơmâng mâu rơkong xông tơpui, mơgêi Hneăng hôp, pôa Phạm Minh Chính, Ngế pro xiâm hnê ngăn tơnêi têa tối nhên, pin thế kâi trâng ƀeăn ƀĕng ƀă tơdroăng nôkố tung lâp plâi tơnêi ƀă tung tơnêi têa vâ mơnhông mâu tơmeăm ki rơdêi ƀă kơdroh mâu tơdroăng ôh tá tơniăn.

Ngế pro xiâm hnê ngăn tơnêi têa tối nhên, Đảng, Tơnêi têa hiăng châ pơkâ inhên ƀă tơdroăng mơnhông mâu khu tê mơdró Việt Nam. Ai troăng hơlâ pro tơ’lêi hlâu ăm khu tê mơdró kŭn ƀă krâ kơvâ po rơdâ tơdroăng pêi cheăng, mơdêk ivá tơbriât cheăng, ivá pêt mơjiâng tơmeăm, mơnhông troăng pêi tê mơdró tiô tơdroăng pơhlêh nếo rơkê, xúa khoa hok kŏng ngê̆, cheăng kâ xúa kŏng ngê̆, cheăng kâ kum dêi pó, cheăng kâ tơtêk đi đo, cheăng kâ krúa lĕm kong prâi, rak vế kong prâi, hbrâ ví ƀă kong prâi hơ’lêh.

Ngế pro xiâm hnê ngăn tơnêi têa pơkâ mâu Khu xiâm, kơvâ cheăng pơtối séa ngăn, tơkŭm pêi kêi đeăng pơkâ pro. Thế tah lôi tơdroăng pro mơ-éa pá puât, mơdêk kơxô̆ liăn ăm kuăn pơlê khu tê mơdró. Mơjiâng hngêi trăng, troăng klông ăm kuăn pơlê, khu tê mơdró. Rơtế amê cho hnê mơjiâng mơngế pêi cheăng ki dâi lĕm vâ mơdêk pêi lo tơmeăm tung pêi cheăng ăm khu tê mơdró krâ kơvâ ƀă kŭn.