Kơxo lơ 26/8 a Hà Nội, pôa Phạm Minh Chính, Ngế pro xiâm hnê ngăn Chin phuh pơkuâ Hneăng hôp mơgêi tơdroăng ƀă tơdroăng tơ’noăng ‘’Lâp tơnêi têa tơdjuôm ivá têa tah hngêi pơtân, hngêi xi kơchoh’’. Troh nôkố lâp tơnêi têa hiăng têa tah 334 rơpâu toăng hngêi pơtân, hngêi xi kơchoh, hngêi ôh tá tơniăn tiô pơkâ 3 ‘răng; vâ chê 50 rơpâu rơtal liăn châ pêi pro tung Tơdroăng, tung mê kơxô̆ liăn mơhnhôk châ 24 rơpâu rơtal liăn.

Laga, tiô Ngế pro xiâm hnê ngăn tơnêi têa, kố cho tơdroăng ki xiâm apoăng vâ ‘’tơniăn rêh ối’’ – tung la ngiâ mâu khu xiâm, kơvâ cheăng, kong pơlê kal ai troăng hơlâ châ tơƀrê hluâ pơkâ tŏng gum vâ mâu rơpŏng kố vâ ‘’mơjiâng cheăng pêi’’, mơ-eăm troh hơnăm 2030 Việt Nam ôh tá ai rơpŏng kơtiê xếo. Pakĭng ‘’rêh ối tơniăn’’ mê thế ‘’mơjiâng cheăng pêi’’, tăng cheăng pêi, mơjiâng cheăng pêi ăm kuăn pơlê.