Ing tơdroăng dêi mâu ngế châ hlo tơdroăng rôh nah, Đô̆i K51, Khu xiâm pơkuâ Lêng kong pơlê Dak Lak hiăng tơkŭm po mơnhên, ti tăng ƀă chiâ rôu tơkŭm châ kơxêng kiâ mô đô̆i Y Chông Triêk ối a ƀuôn Trang Yôk, cheăm Krông Nô. Lối 50 hơnăm klêi kơ’nâi hlâ, pôa nếo vêh tơniăn  a pơlê xiâm. Ƀă mâu kăn ƀô̆, mô đô̆i pêi tơdroăng ti tăng, chiâ rôu tơkŭm, rêm rôh tăng hlo kơxêng kiâ mô đô̆i pơrá cho tơdroăng ki krih tơviah. Hiăng lối 20 hơnăm pêi hnoăng cheăng kố, Thiê̆u tă Nguyễn Chí Tiến, đô̆i viên Đô̆i K51 xuân ôh tá kơtôa châ ki rơrêk tung ihiâm mơno drêng ti tăng mô đô̆i hlâ tung tơplâ xâ Y Chông Triêk a kĭng têa kroăng Krông Nô.

Ôh tá xê to djâ tơdroăng hơlêm ihiâm tuăn ăm môi rơpŏng, rêm kơxêng kiâ mô đô̆i châ ti tăng hlo ối pro tơ’nôm tơdroăng ki pói tơngah ăm rơpâu nhŏng o xuân tơkôm dêi nhŏng o klêi kơ’nâi tơplâ.

Tiô séa ngăn, lâp kong pơlê Dak Lak nôkố ai 34 ilâng kiâ mô đô̆i ƀă lối 15.200 tơnâp kiâ; tung mê, lối 4.000 tơnâp kiâ mô đô̆i tá hâi mơnhên châ tơdroăng kal mơnhên inâi ƀă ADN. Pakĭng mê, khu cheăng mơnhên xuân u ối lối 6.000 tơdroăng ‘na mô đô̆i hlâ tung tơplâ xâ nah rơtế hên tơdroăng kal pơtối mơnhên. Kơxô̆ tơdroăng cheăng hên drêng amê hâi khế rế hơngế mê tơdroăng ti tăng thăm pá puât. Tíu tơplâ xâ nah hiăng pơhlêh, hô sơ rak tá hâi tơdâng tơ’mô, mơngế ki châ hlo tơdroăng rôh nah rế iâ, tơdrêng amê tơmeăm ki xúa ƀă kơxô̆ liăn gum hnoăng cheăng ối iâ.

Mơhé tiah mê, mâu tơdroăng pá puât mê ôh tá pro mơdoh kơteăng chêng mơngế lêng pêi hnoăng cheăng pâ mơnê. Tung rơnó tô khăng khoăng 2025 – 2026, Đô̆i K51, Khu xiâm pơkuâ Mô đô̆i kong pơlê Dak Lak hiăng tơkâ hluâ tíu tơnêi rơnâk ngo ngối, prôk lăm pá puât a kong pơlê Mondulkiri (Kong têa Kul), tơmâng xo tơdroăng, séa ngăn tơnêi tơníu ƀă tơkŭm châ 27 kơxêng kiâ mô đô̆i pleăng hnoăng cheăng, ngế ki rơkê Việt Nam hlâ a tơnêi pú hmâ.

Klêi kơ’nâi leh tơbâ hnoăng cheăng, ‘mé mâu mô đô̆i hlâ tung tơplâ xâ djâ vêh a tơnêi, apoăng khế 6 pơla kố nah, kăn ƀô̆, mô đô̆i pêi cheăng Đô̆i K51 pơtối lo lăm pêi Tơdroăng cheăng 500 hâi măng. Ing tơdroăng dêi kuăn pơlê ƀă mâu ngế ki châ hlo tơdroăng rôh nah, tíu cheăng hiăng tơrŭm ƀă mâu cheăm Krông Bông, Tây Sơn, Chư Prao ƀă Krông Nô ti tăng, chiâ rôu xo tơ’nôm 6 kơxêng kiâ mô đô̆i.

Tiô Đăi tă Đỗ Văn Thiệu, Cheăng kal kí Đô̆i K51, Khu xiâm pơkuâ Mô đô̆i kong pơlê Dak Lak, peăng kơ’nâi rêm kơxêng kiâ mô đô̆i châ tăng hlo cho ‘nâi to lâi hâi khế mơ-eăm tiô rêm tơdroăng, rêm kơdró cheâng ki u ối dêi tơplâ xâ.

“Tăng châ mâu meh cho pá puât ‘nâng. Nhŏng o mơnhên ối tơdroăng mê cho ối lăm tăng. Mơhé bu ai 1% pói tơngah xuân khŏm mơ-eăm pêi troh tá tui lui. Mê cho hnoăng ƀă xuân cho tơdroăng tuăn pâ dêi mâu ngế lêng hâi kố ƀă mâu rơxông prôk hdrối’’.

Rơtế ƀă tơdroăng ti tăng, Dak Lak dế xo mauh sinh phẩm, chêh ‘măn ‘noăng chư chêh tung măng internet mâu tơnâp vâ gum mơnhên ADN. Rêm mauh sinh phẩm châ rak tro pơkâ, rêm ‘noăng chư chêh châ chêh tơ’nôm tŭm kô po tơ’nôm rôh tơ’lêi mơnhên inâi ăm mâu mô đô̆i hlâ tung tơplâ xâ ki tá hâi mơnhên châ tơdroăng.

Tiô Đăi tă Ksơr Lành, Phŏ Chính ủy Khu xiâm pơkuâ Mô đô̆i kong pơlê Dak Lak, vâ Tơdroăng 500 hâi măng châ tơƀrê, pakĭng mơ-eăm dêi mâu khu pêi hnoăng cheăng, ki kal cho mơhnhôk tơdroăng ki veăng dêi lâp pơlê pơla, ki má lối cho mô đô̆i hneăng hdrối nah, mơngế ki châ hlo tơdroăng rôh nah ƀă kuăn pơlê tung tơdroăng tối tơbleăng tơdroăng.

“Ngin dế pêi pro pơtâng tối vâ kăn ƀô̆, kuăn pơlê hlê plĕng nhên ki kơnâ, tơdroăng ki thâ dêi tơdroăng pêi cheăng 500 hâi măng ‘na ti tăng, ti tăng chiâ rôu, tơkŭm, mơnhên inâi kơxêng kiâ mô đô̆i. Ing mê, tối tơbleăng hên tâ mâu tơdroăng kơnía gum tung tơdroăng ti tăng, chiâ rôu tơkŭm ƀă mơnhên inâi kơxêng kiâ mô đô̆i’’.

Tơdroăng tơplâ xâ hiăng hơngế laga troăng ti tăng mâu ngế hiăng hlâ xuân tá hâi mơgêi. Tơdroăng pêi cheăng 500 hâi măng ôh tá xê to tơdroăng ki tơ’noăng ƀă hâi khế vâ djâ mâu mô đô̆i hlâ tung tơplâ xâ ối a tíu tơplâ xâ vêh ƀă Tơnêi têa, pơlê xiâm, mê ối cho tơdroăng ki pơtối tuăn ihiâm mơno lĕm “Khoh châ niân tiah hâi kố kơnôm ai mâu jâ nôa pôa pâ hiăng pleăng mơheăm chhá hdrối nah’’ ƀă mâu tơdroăng pêi inhên, krá ƀă pôu râng hnoăng dêi khu cheăng kal kí ƀă lâp pơlê pơla. Xua tơdroăng pâ mơnê tŭm má môi cho djâ mâu ngế hiăng hlâ vêh ƀă rơpŏng ƀă châ krếo tro inâi tơná.