Ing tơdroăng ki tối ăm ‘nâi ing kuăn pơlê kong têa Kul, Đô̆i K51, Khu xiâm pơkuâ lêng kong pơlê Dak Lak hiăng tí tăng, tơkŭm tăng chiâ châ môi to kơxêng kiâ mô đô̆i a pơlê Vai Yoong, cheăm Busara, tơring Bétchanđa, kong pơlê Mondulkiri. Kơxêng kiâ mô đô̆i châ tăng hlo achê kơpong têa plông Dak Đam, rơtế ƀă hên kế tơmeăm môi tiah kơtong kơxu, kơdjiăn ếo mô đô̆i, mŏng kâ hmê meăm B52 ƀă kơ'lo pơkeăng.

Tơdroăng tơkŭm châ kơxêng kiâ mố đô̆i a mâu hâi apoăng pêi pro hnoăng cheăng rơnó mơdrăng cho tơdroăng châ tơƀrê dêi tơdroăng thâ tơdah xo, mơnhên ƀă châ ‘nâi ing kuăn pơlê. Tơdroăng châ tơƀrê kố pơtối mơnhên tơdroăng khŏm mơ-eăm dêi kăn ƀô̆, mâu lêng Đô̆i K51, Khu xiâm pơkuâ ngăn lêng kong pơlê Dak Lak tung pêi pro hnoăng cheăng tí tăng, tơkŭm kơxêng kiâ mố đô̆i; tơdrêng amê veăng 'no hnoăng lăm tăng 500 hâi măng, khŏm mơ-eăm tí tăng mâu ngế kuăn hiăng hlâ xua vâ pro tơniăn krê, tơniăn hlâu ăm Tơnêi têa, vâ djâ mâu ngoh vêh ƀă pơlê xiâm, rơpŏng hngêi.