Khu xiâm ngăn ‘na Hnê hriâm ƀă Hnê mơjiâng tuăn ngôa rơkê vêh mơnhên, troăng hơlâ dêi Khu xiâm mê cho ôh tá mơdât tơdroăng hnê tơ’nôm, hriâm tơ’nôm, la kal athế ai mâu tơdroăng pơkâ ki tơtro vâ pơkuâ ngăn lĕm tro tâ ‘na tơdroăng hnê tơ’nôm, hriâm tơ’nôm tung hngêi trung, ƀă pá kong.

Ai kuăn dế hriâm râ má môi, laga nâ Nguyễn Thu Hương ối a pơlê kân Hai Bà Trưng, pơlê kong kân Hà Nội ôh tá ăm kuăn hriâm tơ’nôm pakong hngêi trung, xua mâu vâi kuăn hiăng hriâm tung hngêi trung plâ hâi. Xua mê, drêng Khu xiâm pơkuâ hnê hriâm ƀă hnê mơjiâng tuăn ngôa rơkê tơbleăng ăm pêi pro Thông tư 29 pơkâ ‘na hnê tơ’nôm, hriâm tơ’nôm, nâ tâ phiu ro ƀă môi tuăn:

‘’Á môi tuăn ƀă pơkâ ‘na tơdroăng râ má môi mê kô ôh tá hnê tơ’nôm mâu môn ki xiâm. Xua tung tơdroăng hriâm râ má môi, á tơmiât tơdroăng ki rơkê a hngêi trung hnê ăm mâu kuăn mê hiăng tŭm, mâu vâi kuăn xuân hriâm plâ hâi a hngêi trung, tâng hriâm tơ’nôm kơmăng nếo mê kô tơbrê tơbrêh. Tâng hriâm tơ’nôm mê mâu kuăn bu hriâm tơ’nôm mâu môn ki tơná rơkê tơtro tâ drêng kố’’.

A Dak Lak, klêi kơ’nâi Thông tư 29/2024/TT-BGDĐT dêi Khu xiâm pơkuâ Hnê hriâm ƀă Hnê mơjiâng tuăn ngôa rơkê hiăng tơbleăng ai xêt khât sap hâi lơ 14/2, hên hngêi trung a kong pơlê Dak Lak hiăng pơtê pơtân tơkŭm po hnê tơ’nôm, pơhlêh pơkâ hnê vâ tơtro ƀă pơkâ nếo. Mâu hngêi trung hriâm a Dak Lak xuân hiăng tối tơbleăng tơdroăng xiâm pơkâ nếo troh thái cô, hok tro ƀă nôu pâ hok tro, tơdrêng amê pơtê pơtân hnê tơ’nôm vâ séa ngăn, pơhlêh pơkâ hnê hriâm ăm tơtro.

Pôa Võ Ngọc Nam, Thái pơkuâ Hngêi trung râ má péa Phan Chu Trinh (pơlê kong kơdrâm Ƀuôn Ma Thuột, kong pơlê Dak Lak) tối ăm ‘nâi, hngêi trung hiăng hlê plĕng pêi pro tơdroăng xiâm thông tư troh tâi tâng thái cô, nôu pâ ƀă hok tro. Tơdrêng amê, pơkâ 100% thái cô kĭ tơkêa pêi pro pơkâ hnê tơ’nôm, hriâm tơ’nôm. Pakĭng mê, hngêi trung xuâ pơkuâ, pơhlêh pơkâ pêi hnê hriâm vâ tơniăn tơtro ƀă tơdroăng pêi dêi thông tư.

Cô Nguyễn Thị Thu Hiền, cô hnê môn Ngưh văn a Hngêi trung râ má péa Phan Chu Trinh tối, Thông tư 29 cho troăng hơlâ ki tro. Ki ê nếo, hên nôu pâ xuân vâ dêi kuăn châ hriâm ki rơkê, ki rơhêng vâ tối cho hok tro lâm 9, lâm 12 dế hbrâ ăm mâu hneăng tơ’noăng ki kal. Xua mê, kal ai hnê mơhno inhên vâ nôu pâ ôh tá ‘nâi pro ti lâi, ôh tá ‘nâi thế ăm kuăn hriâm tơ’nôm ulâi.

Tiô pôa Võ Đức Tân, nôu pâ ai kuăn hriâm lâm 11 a tơring Čư Kuiñ, kong pơlê Dak Lak, Thông tư 29 kum hok tro ai tơ’nôm chôu veăng mâu tơdroăng châ tâ, kơdroh pá hriâm tâp. Laga, ƀă hok tro hriâm lâm ki mơ’nui râ, tơdroăng hriâm ƀai vâ tơ’noăng cho kal khât. Ai kuăn dế hriâm lâm 11, pôa tối, mâu râ pơkuâ kô rĕng ai hnê mơhno inhên vâ hok tro kô hriâm tâp tŭm mê ôh tá xô pơkâ.

Tiô Thông tư 29 dêi Khu xiâm pơkuâ hnê hriâm ƀă Hnê mơjiâng tuăn ngôa rơkê, ôh tá tơkŭm po hnê tơ’nôm hok tro râ má môi, ôh tá tối mâu ngế: hriâm ‘na ngê̆ thuât, ivá, pơtâp tơdroăng rêh ối. Thái cô kô ôh tá hnê tơ’nôm pa kong hngêi trung ai xo liăn ƀă hok tro ki thái cô mê dế châ hngêi trung xing xoăng hnê hriâm. Pơkâ kố vâ kơdroh tơdroăng djâ hok tro dêi tơná lo pa kong hnê tơ’nôm, pơklât nôu pâ hok tro djâ dêi kuăn lăm hriâm tơ’nôm, tơdrêng amê xuân mơdêk hnoăng pơkuâ dêi thái cô pơkuâ hngêi trung ƀă thái cô ối tung pơkuâ dêi tơná veăng hnê tơ’nôm pakong hngêi trung.

Tiô jâ Khúc Thị Huệ, Cô pơkuâ hngêi trung râ má pái Ngọc Hồi, tơring Thanh Trì, Hà Nội, mâu pơkâ tung thông tư 29 kô kum tơleăng mâu tơdroăng ki kuăn pơlê tô tuăn, ing nôu pâ hok tro tơdjâk troh tơdroăng hnê tơ’nôm, hriâm tơ’nôm tung hngêi trung ƀă pa kong hngêi trung nôkố. Hngêi trung xuân pêi pro kơtăng mâu pơkâ tiô Thông tư xuân môi tiah hnê mơhno dêi Khu pơkuâ Hnê hriâm ƀă Hnê mơjiâng tuăn ngôa rơkê Hà Nội.

‘’Hngêi trung pơtê tơdroăng rơbot vế ăm hok tro sap ing hâi lơ 14/2. Hơnăm kố xuân pơtối rơbot ăm mâu vâi o hok tro ki hriâm ôh tá rơkê lâm 12 kal hnê tơdroăng ki rơkê ăm hneăng tơ’noăng mơgêi râ má pái hriâm tê kơtê. Hok tro lâp 12 dêi hngêi trung mê cho hên mê hngêi trung xuân dế mơnhên troăng prôk la ngiâ ôn tâp ăm mâu vâi o mê hlối pêi pro mâu tơdroăng tung tiêt ki hnê tiah hmâ, mâu thái cô xuân pơkâ mâu đê cương, mâu tơdroăng xiâm ôn tâp. Tâng ôn tâp klêi kơ’nâi khế 5 mê nôkố hngêi trung tá hâi mơjiâng châ pơkâ pêi xua tâng tá khŏm mê tơdjâk troh kơxô̆ liăn rơbot ăm hok tro mê cho ‘nâng’’.

Tung tơdroăng ki ai khât hnê tơ’nôm, hriâm tơ’nôm cho tơdroăng kal vâ ki tơxâng khât cho tơdroăng ki ai khât dêi thái cô, hok tro ƀă rơpŏng hok tro. Pôa Phạm Ngọc Thưởng, Phŏ Ngế xiâm pơkuâ hnê hriâm ƀă hnê mơjiâng tuăn ngôa rơkê mơnhên, troăng tơmiât dêi Khu xiâm cho ôh tá mơdât tơdroăng hnê tơ’nôm, hriâm tơ’nôm, laga kal thế tơbleăng mâu pơkâ vâ pơkuâ tơtro tâ tơdroăng kố:

‘’Tâng thái cô xúa tŭm ƀă hnê tro chôu dêi tơná ƀă mơnhên tơtro mâu mâu vâi kuăn mê ki xiâm cho ôh tá kal hriâm tơ’nôm, mê hiăng tơxâng pơkâ tíu lo dêi tơdroăng pêi pro kố. Laga xuân ôh tá chiâng tâi tâng ôh. Xua môi tiah hiăng tơpui tối cho ai tơdroăng kal vâ tơxâng, ai mâu vâi o hriâm tơ’nôm vâ mơdêk hlê plĕng dêi tơná ai mâ vâi o kal hriâm tơ’nôm dêi tơdroăng rơkê. Troăng tơmiât tơtro dêi khu râ kăn pơkuâ Khu xiâm pơkuâ hnê hriâm ƀă hnê mơjiâng tuăn ngôa rơkê cho pơkuâ tơdroăng xiâm kố ăm gá tro pơkâ, pro tơdroăng hnê tơ’nôm, hriâm tơ’nôm  ƀă pơkuâ tơdroăng dêi thái cô yăo gá tơtro lĕm ƀă vêh tơniăn, pro ăm ngiâ méa kơvâ hnê hriâm, dêi thái cô châ khât châ nhuô̆m khât’’.

Thông tư 29 dêi Khu xiâm pơkuâ Hnê hriâm ƀă Hnê mơjiâng tuăn ngôa rơkê tơbleăng drêng hơnăm hriâm dế tơkŭm po xua mê môi iâ tơdjâk roh pơkâ hnê hriâm apoăng hơnăm dêi mâu hngêi trung ƀă hok tro dêi hngêi trung,  ki rơhêng vâ tối cho hok tro hriâm hơnăm má mơ’nui câ̆p. Mơhé tiah mê, hên rơkong tơpui xuân mơnhên, tâng mâu hngêi trung, thái cô, khu râ kăn pơkuâ pêi pro kơtăng mâu pơkâ hiăng tơbleăng ăm pêi pro tung Thông tư 29 kô djâ tơdroăng hnê tơ’nôm, hriâm tơ’nôm prôk tro troăng, kơdroh tơdroăng pơklât hok tro hriâm tơ’nôm pro tô tuăn tung pơlê pơla.