Tơdroăng mơnhên xiâm ki rơdâ dêi troăng têa kơxĭ Kung king peăng kơnhŏng tơnêi têa cho vâ ‘nâi hnoăng pơkuâ kring gak dêi Việt Nam tiô mâu pơkâ dêi tơdroăng Kĭ tơhrâ dêi Khu lâp kong têa ‘na Luât têa kơxĭ  hơnăm 1982  (UNCLOS) hlối vâ tơtro ƀă Luât têa kơxĭ Việt Nam hơnăm 2012.

Troăng ki xiâm ăm ‘nâi xúa vâ riân ngăn ki rơdâ dêi troăng têa kơxĭ Việt Nam tung Kung king peăng kơnhŏng châ ngăn xiâm ki vâ ’nâi nhên mâu pơkâ dêi UNCLOS, tơtro ƀă tơnêi tơníu têa kơxĭ ƀă ki pin ai dêi Kung king Peăng kơnhŏng hlối ôh tá tơdjâk troh mâu tơdroăng tơhrâ dêi lâp plâi tơnêi  ki Việt Nam veăng lơ tung khu.

Troăng xiâm vâ ki riân ki rơdâ dêi troăng têa kơxĭ Việt Nam tung Kung kĭng Peăng kơnhŏng cho xiâm vâ ‘nâi nhên tơkăng kong ƀă mâu kơpong têa kơxĭ dêi Việt Nam tiô mâu pơkâ dêi UNCLOS ƀă tơdroăng kĭ tơhrâ xoăng Kung king Peăng kơnhŏng pơla Việt Nam ƀă Sinuâ kĭ a hơnăm 2000, pro ai xiâm ki tro luât vâ kring vế ƀă pêi pro tro hnoăng pin pơkuâ,  hnoăng ki pin chiâng tơpui ngăn dêi Việt Nam, pơxúa ăm tơdroăng mơnhông cheăng kâ, rak ngăn têa kơxĭ hlối mơdêk tơrŭm ƀă lâp plâi tơnêi.