Tơdroăng tŏng gum tê kơtê 3.320 xiâm hdrê loăng pơkeăng kong sâm Ngọc Linh kum 40 rơpŏng kơtiê, vâ chê kơtiê hdroâng kuăn ngo Rơteăng a 2 cheăm Đăk Na ƀă Văn Xuôi châ Vi ƀan tơring Tu Mrông pêi pro tung hâi lơ 11/2/2025.

Pôa Võ Trung Mạnh, Kăn hnê ngăn Vi ƀan tơring Tu Mrông, tối ăm ‘nâi, tơdroăng xing xoăng ăm hdrê loăng pơkeăng kong sâm Ngọc Linh pêi pro sap ing Tơdroăng xiâm tơnêi têa kơdroh kơtiê krá tơniăn tŏng gum pêt mơjiâng tiô troăng ki kơnâ ƀă ai tâi tâng ki kơnâ vâ chê 1 rơtal liăn. Tâi tâng kơxô̆ xiâm loăng pơkeăng sâm Ngọc Linh tŏng gum kuăn pơlê hiăng châ mơdâ rak ngăn 1 hơnăm, tơniăn ôh tá ai pơreăng ƀă dế xông kân lĕm tro.

Klêi kơ’nâi tơdah hdrê loăng pơkeăng sâm, 35 rơpŏng a cheăm Đăk Na ƀă 5 rơpŏng kuăn pơlê a cheăm Văn Xuôi châ kăn ƀô̆ kih thuât hnê mơhno pêt, rak ngăn pá kơdâm kong hiăng krâ tung kơpong ngo Ngọc Linh.