
Tơdroăng tơkêa bro 8, xua Khu pơkuâ vâi kơdrâi Việt Nam pơkuâ, hiăng pêi pro rế hía rế châ tơƀrê tâ tơdroăng tơdâng tơ’mô pơla kơdrâi kơnốu ƀă tơleăng mâu tơdroăng ki thâ ƀă vâi kơdrâi ƀă vâi hdrêng. Vâ mơnhông tơdroăng châ tơƀrê ƀă prôk hơhngế tâ tung hneăng má II (2026 – 2030), Tiên sih Lê Ngọc Thắng tối pŭn tơdroăng ‘na kal châ tơleăng inhên tŭm tâi tâng. Má môi cho Tơ’mot pơtâ pơla kơdrâi kơnốu lơ mơ’no liăn cheăng krê? Tiô pôa, hiăng troh drêng kal pơhlêh tuăn tơmiêt. Tâng hdrối nah tơdroăng tơ’mot pơtâ pơla kơdrâi kơnốu tung mâu tơdroăng ki ê cho kal khât vâ mơdêk hlê plĕng, mê ‘na ton xŏn, tơdâng tơ’mô pơla kơdrâi kơnốu kal châ kơjo mơ’no liăn cheăng krê.
‘’Tiô á, tơdroăng tơdâng tơ’mô pơla kơdrâi-kơnốu cho dêi tơdế pơlê pơla... Thăm iâ tơ’mot pơtâ rế lĕm tro, xua tơdâng tơ’mô pơla kơdrâi kơnốu kal châ ngăn cho môi kơvâ kơjo mơ’no liăn krê, ôh tá xê cho tơdroăng ki tŏng gum’’.
Tơdroăng má 2 cho tơdroăng kâi trâng ƀă pơhlêh pro mơ-éa tơnêi têa. Tơdroăng rah xo bro lế lĕm tro khu pêi cheăng tơnêi têa bu u ối péa râ khu râ kăn pơkuâ cho râ kong pơlê ƀă râ cheăm ai tơdroăng kơ-êng kân ‘na tơdroăng tơrŭm dêi Khu vâi kơdrâi ƀă ivá pêi pro dêi kăn ƀô̆ a pơlê cheăm. Tơdroăng kố pơkâ thế thăm pơtâp, mơdêk ivá pêi cheăng ăm khu kăn ƀô̆ Khu râ kong pơlê ƀă râ cheăm vâ vâi hlê plĕng păng ‘nâng ƀă pêi pro tơdroăng tơkêa bro châ tơƀrê.

Tơdroăng ki má 3 cho pơkâ ‘na mơgêi khoa hok. Tiô Tiê̆n sih Lê Ngọc Thắng, kal ai môi tơdroăng mơgêi 10 hơnăm (2021 – 2030) tiô khoa hok ƀă tơdroăng nôkố vâ tiâ rơkong kơ-êng: Tơdroăng tơkêa bro 8 hiăng păng ‘nâng mơjiâng mâu tơdroăng pơhlêh ki klâi ing tơdroăng tơdâng tơ’mô pơla kơdrâi kơnốu ăm vâi kơdrâi hdroâng kuăn ngo? Mâu tơdroăng mơnhên kố kô cho xiâm kối krá tơniăn ăm tơdroăng pơkâ troăng hơlâ tung la ngiâ.
Ƀă tơdroăng má pŭn cho tơdjêp hưh cơ ƀă mâu tơdroăng pơlê pơla ki kal. Tơdâng tơ’mô pơla kơdrâi kơnốu ôh tá păng klâ mâu tơdroăng ki tô tuăn môi tiah xo on veăng tá hâi tro hơnăm, xo on veăng ối achê hdroâng hdrê mơheăm chhá, tơdroăng ki tơlôi dêi pó drêng vâi kơdrâi lăm pêi cheăng kâ hơngế, pro tơdroăng pơlăm pơlối lơ tê mơdró mơngế. Tơdroăng tơkêa bro 8 kal mơnhên ƀă tơleăng mâu tơdroăng kố, ngăn mê cho môi tơdroăng ôh tá păng lôi tung tơdroăng diâp hnoăng ăm vâi kơdrâi.
Tiê̆n sih Lê Ngọc Thắng pơkâ hneăng la ngiâ kal châ achê tâi tâng laga thế ai ki xiâm. Pơtối pêi tiô mâu pơkâ ki xiâm: mơdêk hlê plĕng, gâk kring hnoăng pơkuâ ƀă pơxúa tơtro luât, rak ngăn tơdroăng rêh ối kế tơmeăm, hiâm mơno ƀă ki rơhêng vâ tối cho mơdêk hnoăng cheăng kâ ăm vâi kơdrâi.
‘’Troăng hơlâ tŏng gum hdroâng kuăn ngo cho tơdroăng ki tơdjêp kơvâ, hên kơvâ, tơdjâk troh kuăn mơngế - ôh tá xê 53 hdroâng kuăn ngo mê tá pơlê pơla mơngế Xuăn. Tá ai tá mâu kơvâ khăm pơlât, khôi túa lĕm, hnê hriâm, xăm kơklêa kơdroh kơtiê. Xua mê, mâu tơdroăng tơkêa bro tung Tơdroăng xiâm Tơnêi têa kal châ séa ngăn tâi tâng. ‘Na troăng tơmiât châ achê, á môi tuăn ƀă tơdroăng pêi tiô pơkâ, mơngế ƀă tíu hiăng mơnhên tung tơdroăng, ki rơhêng vâ tối cho kơjo mâu pơlê ki pá puât’’.
Tơdroăng tơkêa bro 8 ôh tá xê to môi tơdroăng pêi pro mê cho mơnhên ăm tơdroăng khŏm mơ-eăm kal kí ki kân dêi Đảng ƀă Tơnêi têa. Ƀă hnoăng djâ troăng ahdrối Khu pơkuâ vâi kơdrâi Việt Nam, tơdroăng tơkŭm a mâu tơdroăng pêi ki nhên, tơleăng mâu tơdroăng ki thâ ƀă chôa ‘lâng la ngiâ ngăn tơdâng tơ’mô cho môi kơvâ mơ’no liăn cheăng tơdrêng kô cho kế ki po vâ mơjiâng mâu tơdroăng pơhlêh krá tơniăn, mơjiâng môi pơlê pơla tơdâng tơ’mô.
Viết bình luận