VOV4.Sêdang - Tiô mâu ngế hriăn plĕng, tung pơla mâu kong pơlê, pơlê kong kân dế pơkâ thế kuăn pơlê klâ ối kơtăn krê tiô tơdroăng Pơkâ 16, tơdroăng ki môi tuăn ‘’po troăng pơto chơ tơ’lêi’’ tối tơchoâm, po rơdâ tơdroăng chơ mơ’no troăng têa tối krê hiăng veăng kum châ chơ pơto mâu tơmeăm pêi lo ing chiâk deăng tung kong pơlê ƀă mâu kong pơlê ki tơdjêp dêi pó cho kal păng ‘nâng vâ khoh châ mơ’no tê kế tơmeăm, chơ pơto mâu báu, phái, prá, alâi, kơchâi, plâi, pôm, phon, hdrê loăng tơniăn ăm tơdroăng pêi chiâk deăng klêi kơ’nâi COVID-19.

Pôa Dương Thanh Tùng, Kăn pơkuâ ngăn ‘na chiâk deăng ƀă mơnhông thôn pơlê kong pơlê Bắc Giang tối ăm ‘nâi, ing tíu ki tâ tú pơreăng hên má môi tung lâp tơnêi têa, troh nôkố, Bắc Giang dế tơkŭm tŭm mâu kế tơmeăm vâ thăm mơdêk ‘na tơdroăng pêi chiâk pêi deăng, troh nôkố, Bắc Giang dế tơkŭm tŭm mâu tơdroăng vâ thăm mơdêk tơdroăng pêi chiâk pêi deăng, veăng kum mâu khu mơdró kâ ‘mâi mơnhông pêi chiâk deăng, rak tơniăn ăm tơdroăng pêi chiâk deăng ƀă tơdroăng ki hbrâ vâ tơplâ mơdât pơreăng.

Klêi kơ’nâi hlo ki păng ‘nâng tung pêi chiâk deăng ăm ‘nâi, tơdrêng ƀă tơdroăng tơplâ mơdât pơreăng ki tơniăn mê, tơdroăng ki tŏng kum pro tơ’lêi hlâu tung pơto chơ kế tơmeăm chiâk deăng dêi kong pơlê 6 khế apoăng hơnăm tâk hên luâ tâ 3 hdroh tâng vâ pơchông ngăn ƀă tơdroăng pơcháu ƀă dế khŏm châ pêi pro dâng 4,6%, luâ tâ 2% tâng vâ pơchông ngăn ƀă tơdroăng pơcháu dêi hơnăm kố:

‘’Hbrâ rơnáu ăm tơdroăng tơplâ mơdât pơreăng xuân môi tiah tơdroăng vêh séa, mơnhên ngăn mâu tơdroăng ki kô trâm pá vâ tơkŭm hnê djâ pêi chiâk deăng, pơto chơ kế tơmeăm ƀă châ tê tơmeăm tơniăn, kong pơlê Bắc Giang xuân tŏng kum mâu tơmeăm khoăng ki kal khât ăm mâu kong pơlê ki ê, môi tiah: tâk chĕm chu, phon rơvât, mâu hdrê loăng, hdrê mơnăn ki pơto chơ mot tung kong pơlê vâ pêi chiâk deăng, păn mơnăn mơnôa ki tơniăn má môi. Tiô khu ki rơkê plĕng ăm ‘nâi, tâng séa ngăn nhên ƀă hbrâ mâu troăng hơlâ, tơdroăng pơkâ rak vế tơniăn mâu tơdroăng cheăng ki tơniăn tung hbrâ mơdât COVID-19, ƀă hnối kring vế tơniăn rế mơnhông pêi chiâk pêi deăng - rêh ối pơlê pơla, tung mê, kal athế rak vế tơdroăng cheăng chiâk deăng’’.

Ƀă tơdroăng ki ai hên hno, thông têa, tâi tâng mâu hngêi kơmăi ki pêi cheăng, uâ báu kô châ pơto ƀă plong troh a kĭng têa kroăng, kơno, malối, báu phái ki pêt mơjiâng a kơpong Tơbăng kroăng Cửu Long lối 90% châ pơto ƀă troăng têa. Xua ti mê, tơdroăng ki ăm phep pơto chơ troăng têa kô veăng kum tơ’lêi hlâu ăm tơdroăng tê rôe ƀă châ tê mơ’no phái ki pêi lo ing klâng chiâk.

Maluâ ti mê, tiô pôa Nguyễn Tấn Nhơn, Kăn phŏ ngăn ‘na chiâk deăng ƀă mơnhông thôn pơlê dêi pơlê kong kân Cần Thơ tối, mâu troăng hơlâ, troăng pơkâ tơchoâm cho vâ ai troăng hơlâ tah lôi ki xahpá hiăng châ mơ’no, la ối tơkôm tơrêm kong pơlê, pơlê kong kân ‘na tơdroăng ki hlê ƀă xúa vâ pêi pro ga ti lâi ăm tơtro, mê cho ki kal.

‘’Pâ thế Khu xiâm ngăn ‘na chiâk deăng ƀă mơnhông thôn pơlê ai rơkong tơpui tối ƀă Khu xiâm ngăn ‘na troăng prôk vâ hnê mơhno ăm kong pơlê ăm hlá mơ-éa pro tơ’lêi hlâu tung pơto chơ ƀă rơxế, vâ mâu plong lăm pơto chơ rôe báu phái i tơ’lêi. Kal athế mơjiâng troăng phôn ki tơpui tơno pơla mâu kong pơlê môi tiah lâi vâ tah lôi ki tơvâ tơvân ăm mâu khu mơdró kâ ki lăm rôe báu phái kuăn pơlê. Nôkố, ai mâu tơdroăng pơkâ kơtăng khât, hên hdroh khu mơdró kâ troh a tíu mê ôh tá ‘nâi khĕn, krếo ngế ki lâi vâ tơngah tŏng kum’’.

Tối tơbleăng dêi Khu cheăng ki kal peăng Hdroh, dêi Khu xiâm ngăn ‘na chiâk deăng ƀă mơnhông thôn pơlê ăm hlo, riân troh tơdế khế 8, báu rơnó Xeăng Têa a mâu kong pơlê, pơlê kong kân kơpong Tơbăng kroăng Cửu Long hiăng châ pôe dêi lối 800 rơpâu ha, châ 4 rơtuh 500 rơtuh tâ̆n. Tiô tối hdrối, rơnó ki pôe hên báu cho tung khế 8 ƀă mơgêi tung pơla dế khế 9.

Laga, ki pá má môi dế nôkố ƀă kơvâ ngăn ‘na chiâk deăng, mê cho tơdroăng ki pêi pro tiô pơkâ 16 a mâu kong pơlê, pơlê kong kân peăng Hdroh, ing mê khoh chiâng pá puât ‘na tơdroăng vâ pơto chơ mâu báu, phái, kế tơmeăm ing chiâk deăng troh a hngêi kơmăi ƀă ing hngêi kơmăi troh a kơno tuk vâ mơ’no tê troh kong têa ê. Kuăn pơlê dế pôe xo dêi báu tung pơla mâu râ cheăm, thôn, kơtâo dế xúa pêi pro hên tơdroăng hbrâ, tơplâ, mơdât pơreăng ƀă hên mâu tơdroăng ki ê. Ing mê, khoh chiâng trâm pá ‘na mơngế pêi cheăng tiô rơnó a klâng chiâk, ing ngế ki rôe troh a ngế ki pôe báu, ngế ki xoi kơxâk báu chu troh a plong.

Ki hmâ hlo, kuăn pơlê hmâ xúa plong ki vâi pro dêi xêh vâ pơto chơ mâu báu, prá, alâi ing klâng chiâk, maluâ ti mê, dế nôkố, mâu plong kố ôh tá khoh chiâng prôk ing pơlê kố troh pơlê ki ê, maluâ cho a kơpong hno, thông têa trâm hên pá puât tung pơla tơdroăng vâ pơto báu phái. Pôa Nguyễn Quốc Toản, Kăn ngăn ‘na tơdroăng uâ báu ƀă mơnhông tê mơ’no kế tơmeăm pói thế:

‘’Kơpong tơbăng kroăng Cửu Long hmâ prôk troăng têa cho ki xiâm vâ pơto chơ báu ing klâng chiâk troh a hngêi kơmăi vâ têng, uâ. Pói tơngah ‘nâng ai pro troăng tơ’lêi hlâu a troăng rơxế xuân kal ai troăng prôk ki tơ’lêi hlâu a troăng têa, mê kal ai môi tuăn pơla mâu Khu ngăn ‘na troăng prôk, troăng têa, Khu séa mơnhên ngăn troăng têa mâu kong pơlê, pơlê kong kân xuân athế ai hlá mơ-éa môi tiah dêi pó ing tơdroăng ki apoăng tíu prôk tá troh a tíu ki troh, vâ tah lôi mâu tơdroăng tơvâ tơvân’’.

Tah lôi tơdroăng ki tơvâ tơvân tung pơto chơ kế tơmeăm, tŏng kum hlâu tung pơto chơ kế tơmeăm pêi lo ing chiâk deăng cho tơdroăng kal athế rĕng pêi pro tơdrêng. Xua mê, kal rĕng ai mâu tơdroăng ki hnê tối vâ mâu kong pơlê, pơlê kong kân tung hnê tối, pơkâ pêi pro mâu tơdroăng ki xahpá tung pơto chơ kế tơmeăm, ƀă pơto mâu tơmeăm pêi lo ing chiâk deăng, malối mâu tơmeăm ki pêi lo ing chiâk deăng ki dế troh rơnó pôe xo.

Ai tơdjâk ‘na tơdroăng kố, Khu xiâm ngăn ‘na mơdró kâ ƀă cheăng kơmăi hiăng ai hlá mơ-éa tơdrêng pâ thế Ngế pro xiâm hnê ngăn Chin phuh séa ngăn, pơcháu ăm Khu râ, kơvâ cheăng ki ai tơdjâk rĕng hriăn plĕng vâ po ‘’troăng chơ pơto tơ’lêi hlâu’’ ăm mâu plong tuk. Xuân ing túa cheăng ki nếo nôkố, Khu xiâm ngăn ‘na troăng prôk xuân hiăng ai hlá mơ-éa pơkâ thế Khu ngăn ‘na troăng prôk mâu kong pơlê, pơlê kong kân rĕng tối tơbleăng ăm Vi ƀan hnê ngăn kong pơlê, pơlê kong kân tŏng kum tơ’lêi hlâu ăm kuăn pơlê, khu mơdró kâ vâ châ pơto chơ kế tơmeăm a troăng tê, vâ tah lôi ki tơvâ tơvân tung pơto chơ kế tơmeăm, logistic kum ăm tơdroăng cheăng chiâk deăng, ƀă pơtroh kế tơmeăm ăm kuăn pơlê.

Minh Long -  VOV1

Nhat Lisa tơplôu ƀă tơbleăng