VOV4.Sêdang - Vâ hbrâ mơdât pơreăng COVID-19, hâi lơ 26/4, Khu ki pêi dêi hnoăng cheăng dêi Viện Vệ sinh Dịch tễ Tây Nguyên hiăng lăm pôu ƀă pêi cheăng ƀă mâu đông mố đô̆i gak tơkăng kong ‘na hbrâ mơdât pơreăng COVID-19 a kong pơlê a troăng tơkăng kong tơring Ea Súp, kong pơlê Dak Lak. Tơring Ea Súp ai dâng 27 km troăng tơkăng kong tơdjêp ƀă kong têa Kul, akố ai 4 to đông Mố đô̆i gak tơkăng kong dế pêi hnoăng cheăng lăm pơtrui ngăn, rak vế troăng tơkăng kong.

Séa ngăn hnoăng cheăng hbrâ mơdât pơreăng a tíu ki gak dêi đông mố đô̆i gak tơkăng kong 739

Lăm pôu ngăn ƀă pêi cheăng ƀă mâu đông mố đô̆i gak tơkăng kong a Ea Súp, pôa Viên Chinh Chiến, kăn pơkuâ Viện Vệ sinh Dịch tễ Tây Nguyên mơnhên tối khât hnoăng cheăng tơkŭm pơkâ thế hbrâ mơdât pơreăng COVID-19 dêi kăn ƀô̆, lêng mố đô̆i gak tơkăng kong.

Séa ngăn hnoăng cheăng hbrâ mơdât pơreăng a đông mố đô̆i gak tơkăng kong Ia Rvê

Pôa tối tiah kố, pơreăng COVID-19 dế ôh tá tơniăn tung lâp plâi tơnêi, ki rơhêng vâ tối cho peăng Kul, tơnêi têa ki ai tơdjuôm troăng tơkăng kong xŏn ƀă Việt Nam, khu lêng ki hbrâ mơdât pơreăng kong pơlê athế tơrŭm krá, mơdêk tơdroăng ki hbrâ kơchăng, vâ hbrâ mơdât tơdrêng mâu ngế ki mot tung tơnêi têa pin ôh tá tro luât.

Katarina Nga tơplôu ƀă tơbleăng