VOV4.Sêdang - A hneăng hôp má 2, Kuô̆k hô̆i hneăng má 15, Hlá mơ-éa chêh tơkŭm mâu rơkong tơpui tối, pói vâ, pâ thế dêi kuăn pơlê pơtroh ăm Kuô̆k hô̆i xua pôa Đỗ Văn Chiến, kăn pơkuâ ngăn tíu xiâm Đảng, kăn hnê ngăn Vi ƀan xiâm Măt trâ̆n Tơnêi têa Việt Nam pơchuât tối nhên: Kuăn pơlê tơmâng ngăn khât troh hnoăng cheăng hbrâ mơdât pơreăng COVID-19. Pơkâ thế ai troăng hơlâ i nhên, ton xŏn ‘na tơdroăng ki pâk vaccine, malối cho vaccine pâk ăm mâu ngế ki pá xôp 18 hơnăm; Tơmâng ngăn, tơleăng mơnhên mâu troăng hơlâ, tŏng kum mâu ngế ki vêh sap ing kơpong ki ai pơreăng rĕng tơniăn cheăng pêi ƀă rêh ối. Tơdrêng amê hnối mơnhên tối tâi tâng ‘na ki rơkê plĕng tung hnê ƀă hriâm ing troăng hyôh internet ăm hok tro rêm râ hriâm.

Kuăn pơlê vâ môi tuăn ƀă tơdroăng pơkâ thế dêi Đảng, Kuô̆k hô̆i, Chin phuh hiăng pơkâ hên hlá mơ-éa hnê mơhno dêi mâu kăn, hnê mơhno tơdroăng cheăng hbrâ mơdât pơreăng ƀă tơdroăng ‘’plâ mơdât pơreăng môi tiah plâ xâ’’, pơkâ ivá mo lĕm, châ chăn kuăn pơlê mê ki ahdrối. Mâu tơdroăng ‘na rak tơniăn tung rêh ối, pơtối châ tơmâng tí tăng xiâm, klâ kơtăn, klâ ối krê, rak ngăn khăm pơlât ivá ăm kuăn pơlê châ  pêi pro tơdrêng a cheăm bêng ƀă troăng rơhlâ pơkâ ‘’prôk tơrêm hơlâ troăng, pôu tơrêm hngêi, séa ngăn tơrêm ngế’’. 

Troăng rơhlâ ƀă mâu tơdroăng pơkâ hbrâ mơdât pơreăng châ tơbleăng pêi pro tung pơla hdrối kố nah vâ tối tơ-tro, châ tơ-brê mâu pơkâ tí tăng ngăn rĕng, kơtăng tung hnê mơhno pêi pro. Laga kuăn pơlê ối tô tuăn:

“Kuăn pơlê tối tiah kố, tơdroăng plâ mơdât pơreăng ối ai mâu tơdroăng pá tơvâ tơvân. Tơdroăng tối tơbleăng hdrối ai drêng hâi tro khât ƀă tơdroăng ki hlo tung rêh ối. Ai drêng ‘nâ, ai tíu ‘na ối tơngôu, oh tá vâ rĕng tơmâng, khăng ko, ôh tá pêi pro tơdrêng môi hdroh tung khu kăn pơkuâ, tung hnê mơhno pêi mâu tơdroăng cheăng drêng trâm mâu tơdroăng, lơ drêng kơdrâ. Ối pá tung tơdroăng tí tăng ngăn mơnhên vâ tơbleăng tro ‘ló troăng rơhlâ pơkâ iâ hâi xuân môi tiah ton hâi vâ hbrâ mơdât pơreăng, hlối mơnhông cheăng kâ - rêh ối.

Tơdroăng pơkâ hên hlá mơ-éa hnê mơhno, pơkuâ, tung mê ai tá mâu hlá mơ-éa ki hâi tro khât, hâi tŭm vâ pêi pro, chiâng pá ăm kuăn pơlê ƀă khu mơdró. ‘Na hngêi pơkeăng-kơmăi kơmok, tơmeăm xúa tung khăm pơlât ƀă iá cheăng tung rak ngăn dêi rêm râ, ăm hlo hên tơdroăng ki ôh tá rơkê; vâ tối mâu kơmăi kơmok, tơmeăm xúa khăm pơlât, pơkeăng, tơmeăm xúa, vaccine ƀă hên ki ê xuân thế rôe ing kong tea ê, mê chiâng ôh tá teăm, ôh tá châ hbrâ hdrối, kơxô̆ liăn ‘no rôe kơnâ há”.

Kuăn pơlê ối tô tuăn xua GDP tung 9 khế hơnăm 2021 ôh tá ai tiô pơkâ; tơdroăng xo liăn ngân liăn vâ ‘no mơjiâng tơmeăm khoăng ối hrá; mâu kơlo pơkâ cheăng kâ - rêh ối ki kal hơnăm 2021 bú iâ tâng vâ pơchông ƀă Pơkâ dêi Kuô̆k hô̆i. Khu mơdró kâ puí vâ Chin phuh, mâu kong pơlê ai pơkâ troăng rơhlâ teăm tơdrêng vâ tê tơmeăm, chơ tơmeăm, kế tơmeăm pơtối xúa tung pêi pro, tê mơdró; ai pơkâ luât tŏng kum ‘na bro hnoăng mơhá; kơdroh kơxô̆ liăn nâp liăn, liăn mung tơnêi; pro mơdon khế hơnăm, hdró liăn chĕn, kơdroh liăn rơkâ mung a hngêi râk liăn; ai pơkâ luât tŏng kum pơtối rak vế mơngế pêi cheăng...

Vâ khu mơdró ‘mâi mơnhông pêi cheăng kâ. Kuăn pơlê tối hên ngế xơpá hâi châ xo kơxô̆ liăn tŏng kum rêh ối; pro hlá mơ-éa tŏng kum ối tơvâ tơvân, pro hên túa hlá mơ-éa, tơdroăng xo liăn ngân hrá há; hên tíu kuăn pơlê trâm pá xua pơreăng tâ tú la hâi châ tŏng kum; xuân ối tơdroăng ki hriăn vâ pro pơxúa ăm tơná tung pro hlá mơ-éa xo liăn tŏng kum ăm kuăn pơlê ki xơpá, chiâng pá khât, hên kuăn pơlê chiâng hêng hôu. Kuăn pơlê tô tuăn ‘na tơdroăng ki hôm tơ-ƀrê, pơxúa dêi tơdroăng hnê hriâm tung internet, malối ƀă mâu vâi o hok tro râ má môi, tơdroăng thế trâm đi đo kơmăi điê̆n tưh kô tơdjâk hên ki pro ‘mêi troh ivá vâi o hok tro.

Khu kăn hnê ngăn Vi ƀan xiâm Măt trâ̆n tơnêi têa Việt Nam pâ thế Kuô̆k hô̆i, Chin phuh, mâu khu xiâm, kơvâ cheăng, kong pơlê thế rĕng pơ’lêh. Tối mơgêi dêi Khu kăn xiâm Đảng roh má 4 ‘na tơdroăng hbrâ mơdât pơreăng COVID-19 ƀă ‘mâi mơnhông cheăng kâ rêh ối. Pôa Đỗ Văn Chiến tối nhên:

“Tơleăng mơnhên ăm tơtro, tơniăn ton ‘na tơdroăng vaccine, malối vaccine ki pâk ăm mâu ngế pá xôp 18 hơnăm; mơdêk ‘no liăn mơjiâng pro, rôe tơmeăm ăm hngêi pơkeăng râ cheăm ƀă tơmâng tung tơdroăng cheăng ‘na pơkeăng ki hbrâ rơnáu; mơjiâng xiâm ‘na tơdroăng cheăng ƀă kơmăi kơmok ki xúa tơchoâm lâp tơnêi têa tung hbrâ, mơdât COVID-19; tơmâng tơleăng mơnhên ‘na tơdroăng rêh ối, mơngế pêi cheăng, tơdroăng rêh ối dêi kuăn pơlê; vâ tơmeăm xúa tung khăm pơlât, tơmeăm vâ séa ngăn, khăm ngăn châ chêh tung inâi tơmeăm Tơnêi têa rak ngăn pro tơniăn yă.

Tơmâng tơleăng mâu pơkâ tŏng kum, tơveăng mâu ngế ki vêh ing kơpong tâ pơreăng châ tơniăn ‘na cheăng pêi ƀă tơdroăng rêh ối. Tối tâi tâng ‘na ki tơ-brê tung hnê ƀă hriâm tung măng internet ăm hok tro rêm râ; ai pơkâ hnê tơ’nôm, ƀă hnê tơ’nôm ăm mâu hok tro, malối cho hok tro râ má môi’’.

Khu kăn hnê ngăn Vi ƀan xiâm Măt trâ̆n tơnêi têa Việt Nam xuân pâ thế pơkâ tơdroăng tâi tâng ‘nâ ‘mâi mơnhông ƀă mơdêk cheăng kâ, rĕng châ pơkâ mâu kơxô̆ liăn tŏng kum, mơnhông khu mơdró, kuăn pơlê ‘no liăn cheăng kâ, ôh tá châ pơtê tơdroăng ki pêi lo, tê tơmeăm; ai pơkâ luât pro tơniăn kơxô̆ mơngế pêi cheăng  ăm mâu khu mơdró, chôa lâng tăng hngêi ối ăm mâu ngế kŏng nhân rơtế ƀă mâu kơpong hngêi kơmăi, ‘mâi hơ’lêh tơdroăng ‘no liăn cheăng tê mơdró, kơdroh mâu khu mơdró lo ing khu mơdró; pơtối pơkâ troăng rơhlâ ăm tơtro vâ mơdât liăn to kơnâ, tơniăn ăm tơdroăng cheăng kâ rĕng ‘mâi mơnhông, tơ-ƀrê.

Klêi po hneăng hôp, Kuô̆k hô̆i hiăng tơmâng tối tơbleăng séa ngăn tơdroăng tơleăng mơnhên, tiâ tơdroăng kuăn pơlê kơ-êng pơtroh ăm roh hôp má 11, Kuô̆k hô̆i hneăng 14. Pôa Dương Thanh Bình, Ngế pơkuâ hnê mơhnhôk cheăng Kuô̆k hô̆i ăm ‘nâi; ing mâu roh trâm mâ kuăn pơlê, hiăng ai 807 tơdroăng pâ thế tâi tâng tơkŭm pơtroh ăm mâu kơ koan râ kơpêng tơleăng mơnhên. Pâ thế kuăn pơlê tơdjâk troh tâi tâng mâu kơvâ cheăng tung rêh ối dêi kuăn pơlê, tung mê, ai mâu tơdroăng pơtối châ kuăn pơlê tơmâng: Môi tiah tơmeăm khoăng, hyôh kong prâi; luât pơkâ tŏng kum ƀă mâu ngế ai hnoăng tơnêi têa, pêi cheăng ‘na rêh ối; pêi chiâk, kuăn pơlê ki pêi chiâk, thôn pơlê; tơkŭm mâu khu kăn xiâm tơ’nêi têa ƀă troăng rơhlâ pơkâ ƀă mâu kăn ƀô̆, mâu kăn pơkuâ mâu tíu pêi cheăng.

Troh nôkố, ai tâi tâng tơdroăng kơ-êng pâ thế mê hiăng châ tiâ. Pôa Dương Thanh Bình xuân tối mâu tơdroăng pâ thế, tung mê ai pâ thế mâu kơ koan Kuô̆k hô̆i mơdêk tâ nếo hnoăng cheăng séa ngăn tơdroăng pơkâ hlá mơ-éa luât; séa ngăn mâu tơdroăng ki nếo ‘nâi tơdjâk troh tơdroăng rêh ối dêi kuăn pơlê.

“Mâu khu kăn Kuô̆k hô̆i kal thế mơdêk ki tơ-ƀrê tâi tâng, tiâ mơnhên mâu tơdroăng kuăn pơlê kơ-êng, teăm pơtroh ăm mâu kơ koan râ kơpêng tơleăng mơnhên tro tiô luât. Pakĭng mê, pâ thế Chin phuh hnê mơhno mâu khu xiâm, kơvâ cheăng xiâm séa ngăn, tơleăng mơnhên mâu pơkâ ki dế tung pơla tơleăng, vâ tơniăn kâi tơleăng mơnhên tơƀrê, tro tơdroăng. Pakĭng mê, mơdêk ki tơ-ƀrê chêh hlá mơ-éa luât tro tiô luât, tơniăn má môi tung mâu hlá mơ-éa luât ki chêh tro luât.

Lại Thị Hoa

Gương tơplôu ƀă tơbleăng