VOV4.Sedang - Kơxê lơ 21/5, Hô̆i đong tâ phĭu tơnêi têa hiăng tơkŭm po hôp pơtâng, tối tơbleăng tơ’nôm mâu tơdroăng kal ‘na hnoăng cheăng hbrâ ăm hâi tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn kuăn pơlê rêm râ hơnăm 2021 -2026. A rôh hôp tơbleăng, teăng mâ Hô̆i đong tâ phĭu tơnêi têa ăm’nâi, troh nôkố, mâu tơdroăng hbrâ ăm hâi tâ phĭu hiăng klêi, rak tơniăn tro tơdroăng, hbrâ rơnáu ăm hâi tâ phĭu.

A 16 to kong pơlê, pơlê kong kân tung lâp tơnêi têa hiăng tâ phĭu a mâu tíu, hnoăng cheăng tâ phĭu pơrá tơniăn, tro tiô luât. Teăng mâ Hô̆i đong tâ phĭu tơnêi têa ăm’nâi, lâp tơnêi têa kô ai lối 69 rơtuh ngế kuăn pơlê lăm tâ phĭu a vâ chê 85 rơpâu kơpong tâ phĭu.

Nôkố, mâu hlá mơ-éa chêh ƀă túa pơkâ vâ rak tơniăn tơƀrê hâi tâ phĭu, rak tơniăn hnoăng dêi kuăn pơlê, malối cho a mâu kong pơlê dế trâm pá xua kong mê khía mơhot, pơreăng tâ tú, ai hên ngế athế klâ ối krê xuân hiăng châ hbrâ rơnáu nhên.

Katarina Nga tơplôu ƀă tơbleăng