VOV4.Sêdang - Ƀă mâu tơdroăng châ tơƀrê lĕm tung tơdroăng mơnúa, hên tơdroăng pói vâ vaccine Nano Covac hbrâ mơdât COVID 19 apoăng dêi Việt Nam tiô tối hdrối kô châ ăm phêp xúa rơdâ tâng drêng kal thâ a khế 9 hơnăm kố. Vaccine Nano Covax xua Hok viê̆n Kuân y hriăn plĕng mơjiâng pro hiăng hluâ 2 hneăng mơnúa. Hdrối mê, hneăng má 1 pêi pro a khế 12/2020 ƀă 560 ngế pleăng vâ pâk vâ mơnhên ki tơniăn a mơngế, hneăng má 2 sap ing khế 2 hơnăm kố mơnúa ƀă 554 ngế vâ pơtối mơnhên tơniăn ƀă séa ngăn ivá kâi hbrâ mơdât virus SARS CoV-2.

Tŭm péa hneăng pơrá tơniăn lĕm tro. Tung khế 6 kố tơkŭm mơnúa pâk hneăng má 3 vaccine Nano Covax ƀă 13 rơpâu ngế ƀă pâk pơkeăng ki iâ má môi 25mcrogam. Xiâm kối dêi tơdroăng mơnúa pâk hneăng má 3 vâ pơtối mơnhên ki tơniăn, xêt khât rak vế châ chăn dêi vaccine tung pơlê pơla hiăng ai pơreăng xông tâ tú.

Nôkố, Hok viê̆n kuân y ƀă mâu tíu ki tơdjâk dế thâ tơkŭm pêi pro mâu roh mơnúa rĕng. Tâi tâng mâu troăng pêi tiô pơkâ kơtăn, tiô pơkâ dêi lâp plâi tơnêi. Ing mê, Khu xiâm ngăn pơkeăng ƀă khăm pơlât ai xiâm kối khoa hok kô ăm phêp thâ, xúa drêng ai vaccine Nano Covax a tơnêi têa pin.

A Sa Ly tơplôu ƀă tơbleăng