VOV4.Sêdang - Tung rơxông nôkố, ngế kơdrâi ôh tá xê to pôu râng hnoăng cheăng pơkuâ rơpŏng mê vâi ối kơhnâ veăng tung mâu kơvâ pêi cheăng pơlê pơla. Xua mê, vâ rak vế rơpŏng ƀă mơjiâng môi rơpŏng  hơniâp lĕm, vâi kal tơdâng tung  tơdroăng cheăng péa xôh – rơpŏng ƀă pơlê pơla dêi tơná, tơrŭm ƀă mơhnhôk veăng kum ing mâu rơpŏng.

Cho ngế pơkuâ xiâm môi Tíu tơkŭm hnê ‘na tơdroăng rêh ối ăm vâi hdrêng, a Pơlê kong kơdrâm Ƀuôn Ma Thuột, kong pơlê Dak Lak, la tơdroăng cheăng dêi nâ Dương Thị Thu Hiền ôh tá pêi cheăng to tung kơphô̆ mê nâ ối lăm prôk troh lâp kong pơlê Dak Lak, thăm nếo mâu tơdroăng cheăng a hên kong pơlê, pơlê kong kân tung lâp tơnêi têa.

Tŭm prếi on veăng nâ đi đo lăm hơngế tung pơla ton hâi, mê tơdroăng on veăng pêi iâ hên ai drêng tơhôu dêi rơpó. Nâ Dương Thị Thu Hiền tối, vâ tơdâng tơ-‘mô tung rêh ối tung pêi cheăng ƀă rơpŏng hngêi, má on veăng xuân mơdêk tơdroăng hlê plĕng, ki ‘nâi hơ-ui pâ dêi rơpó ƀă ‘nâi  hnê tối ăm ngế ki ê.

“Tơdroăng ngế kơ nốu hlê hnoăng cheăng pêi dêi ngế kơdrâi,‘nâi hơ-ui ôh tá ‘nhó dêi rơpó, hlê ƀă tối ăm dêi rơpó ‘nâi mâu tơdroăng tung on veăng rơpŏng hngêi cho tơdroăng ki kal. Tơdroăng cheăng tung rơpŏng hngêi cho tơdroăng cheăng tơchoâm. Ƀă vâ hlê tơdroăng mê ki kal, ngế kơnốu thế hlê kơ ngế kơdrâi ƀă ngế kơdrâi thế hlê kơ ngế kơnốu. Ti mê vâ tơxoăng dêi rơpó, veăng kum dêi rơpó tung rêh ối.

Vâ tơxoăng ƀă dêi rơpó thế tŭm péa ngế ối ‘nâi tơpui tơno, ‘nâi mơnê ƀă mơjo pâ dêi rơpó ƀă hnoăng cheăng dêi ngế ki tá ƀă môi tơdroăng ki pâ khât ăm dêi on veăng rơpŏng hngêi tơná. Ƀă tơdroăng pêi pro kố mê tơná pin xuân hiăng pro pơlĕm  tơdâng tơ’mô tơdroăng hơniâp ro tung on veăng rơpŏng hngêi”.

Mơhé tơvâ hên tơdroăng cheăng pơlê pơla, nâ Lưu Thị Thu Hiền (ếo trĭng) xuân mơdoh hên chôu ăm dêi rơpŏng hngêi, rơtế ƀă kuăn ‘nĕng tung mâu tơdroăng

Tiô nâ Lưu Thị Thu Hiền, môi ngế mơdró kâ a kong pơlê Dak Lak tối vâ tơ’nôm ăm ai tơdroăng hơniâp lĕm tung on veăng rơpŏng hngêi, ngế kơdrâi mơhé vâ tơvâ hên tơdroăng cheăng to lâi xuân thế mơhno ăm hlo ki tơná pâ kơ  on veăng rơpŏng hngêi ƀă tơdroăng tơná pêi pro. Xua mê, mơhé vâ pơkuâ môi hdrôh 2 kŏng ti, la ki iâ gá rêm măng tĭng ai môi péa hdroh, athế pơchên hmê kơchâi kâ ăm dêi on veăng kuăn ‘nĕng kâ. Rêm hâi, tá rôh kâ hmê kơhâi dế; mơ’nui măng tĭng rơtế ƀă dêi rơpó tá kơnốu kuăn ‘nĕng rơtế kâ hmê ƀăng dêi rơpó.

Rêm hâi, rêm ngế tung rơpŏng hngêi kâ kơhâi dế, mơ’nui măng tĭng rơtế kâ kơxo má, hlối tơpui tơno ƀă dêi rơpó; ai tơdroăng ki klâi nếo ‘lo tối ăm dêi rơpó ‘nâi, thăm nếo tơpui êng tiâ ƀă dêi rơpó... cho mâu tơdroăng veăng kum pro ăm rơpŏng hngêi châ hơniâp ro krá kak.

“Kơnốu á xuân tối á ai “môi kơpeăng kŏng ki rơkê’’ vâ mơhnhôk djâ dêi kơnốu ƀă mâu kuăn ‘nĕng veăng pêi mâu tơdroăng cheăng tung hngêi trăng ƀă á. Laga ki khât gá á xuân hiăng pleăng hên hnoăng tơná tung pơla á ăm dêi kơnốu ƀă kuăn ‘nĕng hmâ ƀă túa ki á pêi cheăng mơjiâng pro, mê cho ngăn kal  tơdroăng cheăng tung rơpŏng hngêi, pế hmê pơchên kơchâi ƀă á xuân pơtối rak vế tơdroăng kâ hmê môi hâi 3 hdrôh tung rơpŏng hngêi’’.

Nâ Dương Thị Thu Hiền tối, vâ tơdâng tơ’mô tơdroăng cheăng ƀă on veăng rơpŏng hngêi, prếi on veăng xuân mơdêk ki hlê plĕng dêi rơpó, hiâm mơno ‘nâi pâ hơ-ui ƀă ‘nâi tối ăm dêi rơpó tŭm tơdroăng

Tiô  Tiê̆n sih Tâm lĭ hok Lý Thị Mai – Ngế pơkuâ kŏng ti ‘na tâm lĭ hok ứng dụng Pơlê kong kân Hồ Chí Minh, tung tơdroăng rêh ối chal nếo nôkố ai tŭm tơmeăm kơmăi kơmok, vâi kơdrâi thăm rế mơhno hnoăng dêi tơná ƀă tơdroăng cheăng tơná tung hên tơdroăng tung rêh ối.

Laga, hnoăng cheăng vâi tung tung rơpŏng hngêi cho kal păng ‘nâng. Kơdrâi cho ngế kăn tung rơpŏng hngêi, cho ngế “răk on” vâ pro ăm hơniâp ro tung  rơpŏng hngêi, tơdjêp ƀă mâu ngế tung rơpŏng hngêi. Mê hlối cho hnoăng cheăng  ki vâi thế pôu râng pêi pro. A rơpŏng hngêi ki lâi xuân môi tiah mê, vâ pê klêi tá hnoăng cheăng ƀă tá hnoăng cheăng tung rơpŏng hngêi ƀă vâ pêi cheăng, ngế kơdrâi thế mơ-eăm hên tâ nếo.

Pakĭng mê, vâi ối thế pro tơdâng tơ’mô bro tơdâng tŭm 2 tơdroăng cheăng pêi mê. Vâ kâi chiâng pro tơdroăng mê, ki hdrối ngế kơdrâi thế ai tuăn ngôa rơkê ƀă rơkê tơpui tơno ‘na tơdroăng tơdah tơpui tơno ƀă mơngế ki ê, ‘nâi xĭng xoăng mâu tơdroăng ki hmâ.

“Pin thế ai môi tơdroăng ‘nâi nhoăm dêi rơpó, tơkéa vâ tối, pin lăm pêi cheăng alâi ‘lo xuân ai vâi pú, ai mâu kăn râ kơpêng veăng kum, ai mâu râ pá xôp veăng tơrŭm ƀă pin. Mê cho môi khu ki pin kal vâ ai tơdroăng ki tơpui rơkê, rơkê tung tơpui tơno vâ pin tơpui ƀă mâ ki mê vâ vâi tối ăm pin, rơtế veăng pêi mâu tơdroăng cheăng ƀă pin ‘na tơdroăng cheăng pơlê pơla. ‘Na rơpŏng hngêi vâ vâi nhoăm dei rơpó mê pin ôh tá chiâng pêi pro xêh môi ngê, thế veăng tơrŭm ƀă dêi kơnốu, kuăn, thăm nếo ƀă mâu ngế ki ê tung rơpŏng hngêi, pơtối rak vế tơdroăng ki tơrŭm pơla mâu ngế tung pŏng hngêi”.

Ôh tá xê pêi to tơdroăng cheăng tung rơpŏng hngêi pế pơchên kế kâ, vâi kơdrâi chal nôkố hiăng lo pêi cheăng pá gong, prôk tơkâ luâ hên tơdroăng ki pá tơvâ tơvân vâ mơhno ăm hlo hnoăng cheăng pêi dêi tơná. Vâ pro tơ’lêi hlâu ăm vâi kơdrâi châ pơtối rak vế ivá pêi cheăng dêi tơná tung mơnhông hnoăng cheăng  ƀă pro ăm on veăng rơpŏng hngêi châ rêh ối hơniâp, kal thế veăng ai kơjo kum, veăng hnê tối ing mâu ngế tung rơpŏng hngêi.

Ai tiah hmê ‘nôi vâi kơdrâi nếo kâi pêi hnoăng cheăng dêi tơná pro kơdrâi, pro nôu tung rơpŏng hngêi, hlối pêi klêi hnoăng cheăng tơná drêng veăng pêi mâu tơdroăng cheăng tung rêh ối pơlê pơla.

H’Xíu H’Mok

Gương tơplôu ƀă tơbleăng