VOV4.Sêdang - Troh hâi lơ 13/9, mâu tíu pêi cheăng dêi Vi ƀan pơkuâ hdroâng kuăn ngo dêi Chin phuh hiăng pêi klêi tơdroăng ki chêh tơkŭm inâi mâu ngế F0 cho kuăn pơlê hdroâng kuăn ngo ối tung rơpŏng kơtiê, rơpŏng vâ chê kơtiê, xơpá, tí tăng ‘nâi plĕng ăm kăn pơkuâ Vi ƀan hdroâng kuăn ngo séa ngăn, tŏng kum rôh má 2.

Tiah mê, tung rôh má 2 kố Vi ƀan hdroâng kuăn ngo kô kum tâi tâng 1.088 rơpŏng hdroâng kuăn ngo ki xơpá tro tâ pơreăng COVID-19 tung lâp tơnêi têa. Pakĭng mê, Vi ƀan hdroâng kuăn ngo xuân dế pơtối tí tăng, ‘mot tơ’nôm mâu ngế ki F0 ối tung rơpŏng kơtiê, vâ chê kơtiê, rơpŏng ai tơdroăng rêh ối xơpá vâ pâ thế kăn pơkuâ Vi ƀan hdroâng kuăn ngo séa ngăn, tŏng kum tung rôh má 3.

Katarina Nga tơplôu ƀă tơbleăng